Kabokoshi Ka Mepuzho

◼ Nanchi ‘kalume wa kishinka ne wa maana’ uswisha tumabumba twa ku mbaji twa Bakamonyi basambakena pamo na kupesapesa Binembelo nangwa kwichocheka nyi?—Mat. 24:45, 47.

Ine, kechi uswisha ne. Pano bino, mu mapunzha avula mwaya ntanda, balongo bamo ba mu jibumba jetu balenga tumabumba twiikajila tupesapesa pa mitwe imo yalamata ku Baibolo. Bamo balenga tumabumba twa kufunda Kihebelu ne Kingiliki kya mu Baibolo na nkebelo ya kukeba kuyuka kuluñama kwa Baibolo wa New World Translation. Bakwabo nabo bapesapesa pa mitwe ya bya sayansi yalamata ku Baibolo. Babika Makeyala pa Intaneti a kwisambilamo na nkebelo ya kupimpuzhanya milanguluko ne kwichochekapo. Bekala ne na bipwilo ne kunemba mabuku abena kumwesha bintu byo batana kabiji ne kunungapo pa byobya byanengezhiwa pa kupwila kwetu kwa bwina Kilishitu ne byobya biji mu mabuku etu.

Kuzhokoloka ntanda yonse, bantu ba Yehoba babena kutambwila mikambizho yavula ya ku mupashi ne lutundaiko pa kupwila kwa kipwilo, pa kupwila kukatampe kabiji ne kupichila mu mabuku a jibumba ja Yehoba. Kupichila mu lutangijilo lwa mupashi wanji wazhila ne bukine bwa Mambo anji, Yehoba ubena kupana byonse bikebewa kuba’mba bantu banji bonse bakonshe ‘kulamankana pamo na muchima umo ne milanguluko imo’ kabiji ne kutwajijila ‘kukoselamo mu lwitabilo.’ (1 Ko. 1:10; Kolo. 2:6, 7) Ee kine, tubena kusanchila bingi Yehoba pa kajo ka ku mupashi ko abena kwitupa mu ano moba apelako. Onkao mambo, ‘kalume wa kishinka ne wa maana’ kechi uswisha mabuku aji onse, bipwilo bya ku mbaji nangwatu Makeyala a pa Intaneti o abula kunengezha nangwa kutangijila ne.—Mat. 24:45-47.

Kijitu bulongo bantu kwingijisha bulume bwabo bwa kulanguluka na nkebelo ya kutundaika mambo awama. Pano bino, bya kupesapesa bya bantu bene kechi byafwainwa kunyanchijila bintu byo abena kuba Yesu Kilishitu kupichila mu kipwilo kyanji kya panopantanda lelo jino ne. Mu myaka kitota kitanshi, mutumwa Paulo wajimwineko pa mambo a kwisamba pa mitwe yatutu itaishatu kimye nabiji ‘bya kulondolola bisemi bibula kupela, ne byobya bibusha bya kwipuzhaipuzha, bibula kwingila bukalama bwa Lesa bwa mu lwitabilo.’ (1 Timo. 1:3-7) Bena Kilishitu bonse bafwainwa kwibikishako ‘kuchina mepuzho a kukosama, ne bya kulondolola bisemi, ne mapata ne lutobo pa mambo a Mizhilo; mambo byo byatu bya kubula kumwenamo kintu.’—Titu. 3:9.

Aba bakeba kufunjilapo bikwabo pa lufunjisho lwabo lwa Baibolo ne bya kupesapesa, tubena kwibatundaika kwingijisha, buku wa Insight on the Scriptures, “All Scripture Is Inspired of God and Beneficial,” ne mabukutu akwabo nabiji oa aamba pa bungauzhi buji mu buku wa mu Baibolo wa Danyela, Isaya ne Lumwekesho. Mu ano mabuku muji bintu byavula bingi byakonsha kwitukwasha pa lufunjisho lwa Baibolo ne kulanguluka langulukapo, pa kuba’mba tukonshe ‘kuyula maana a kuyukisha kyaswa muchima wanji mu maana onse ne milangwe ya bumupashi, twendenga mwafwainwa Nkambo mwa kumutokeshesha ku muchima to, kasa tupanga bipangwa mu mingilo yonse yawama, ne kuya na kukoma mu maana a kuyuka Lesa.’—Kolo. 1:9, 10.