Mazubo Etu Azhila a Kupwilamo
1. Ñanyi wafwainwa kutotwa pa uno mwingilo wa kushimika Mazubo a Bufumu awama?
1 Mu 1999 kyaambiwe kuba’mba Mazubo a Bufumu 1,500 o akebewenga muno mu Zambia. Kufuma mu yewa mwaka kufika lelo, kwashimikwa kala mazubo kukila pa 1,300. Konse konse muntu ko akonsha kuya muno mu Zambia, wakonsha kumona’mba Yehoba ubena kunengezhezha bapopweshi banji mazubo awama a kupwilamo. Ano mazubo abena kuletela bingi jizhina ja Yehoba lutotelo. Javula tumvwa bantu sabamba’mba Bakamonyi ba kwa Yehoba ‘bakumbanya kyalo kyonse na Mazubo a Bufumu.’ Bipwilo byavula luno byaleka kupwila pangye, kusonkela makalasilumu nangwa kupwila mu bishimikwa byabulanga kuwama kupopwelamo Lesa. Kwa kubula nangwa kuzhinaukatu ne, ‘uno mwingilo waingijiwa na bukwasho bwa Lesa wetu.’—Ne. 6:16; Zeka. 4:6.
2. Tufunjilako ka ku byaubile Isao pa mambo a kumwesha lusanchilo ku bintu bya ku mupashi?
2 Kumwesha Lusanchilo: Kumwesha lusanchilo ku bintu bya ku mupashi ke kintu kikebewa bingi ku bapopweshi ba Yehoba. Ku byaubile Isao, tufunjilako kuba’mba kubula lusanchilo kwakonsha kulengela kubula kutalwa bulongo kwi Yehoba. Twafwainwa kufunjilako ka ku byaubile Isao? Twafwainwa kumweshanga lusanchilo pa kwikala na mazubo azhila a kupopwelamo.
3, 4. Twakonsha kumwesha byepi lusanchilo ku Mwingilo wa Kushimika Mazubo a Bufumu (a) pa muntu pa muntu? (b) kipwilo kyonse?
3 Jishinda jimo jo twakonsha kumwesheshamo lusanchilo ke kupanangako mali ku Mwingilo wa Kushimika Mazubo a Bufumu. (2 Ko. 9:6, 7) Nzubo ya Bufumu saka ikyangye kushimikwa, kipwilo kyumvwañana mali anga o kikapananga pa ñondo pa ñondo. (Mali a Nzubo ya Bufumu a Kupana pa Ñondo pa Ñondo.) Umvwe satupana mali kwesakana na byo twaumvwañene, ko kuba’mba tubena kumwesha lusanchilo lukatampe ku lunengezho lwa Yehoba lwa kwikala na nzubo yakatataka. (Yako. 5:12) Ano mali engijishiwa kushimikilamo Mazubo a Bufumu akwabo ku boba babulao.—2 Ko. 8:14.
4 Byo kiji kuba’mba bipwilo byavula byakwashiwa kushimika Mazubo a Bufumu kechi bibena kukonsha kwipaina abyo bine mali a uno mwingilo ne, jibumba ja kalume jafuukwilepo kukwasha bino bipwilo. Bipwilo bya uno mutundu bituma mali abyo pa ñondo pa ñondo ku ofweshi wa musampi, kechi nobe a kubwezha ku nkongole ne, bino ekala a kupanako ku Mwingilo wa Kushimika Mazubo a Bufumu. Ano mali amweshiwa pa sitetimenti ya pa ñondo pa ñondo ifuma ku ofweshi wa musampi.
5. (a) Mu ñanyi jishinda jikwabo mo twakonshesha kumwesha lusanchilo ku nzubo ya kupwilamo? (b) Ñanyi ene mambo o twafwainwa kulaminanga bulongo Nzubo ya Bufumu?
5 Kuwamisha Mazubo Etu a Bufumu: Jishinda jikwabo jo tumwesheshamo lusanchilo ke kupichila mu kusunga bulongo Mazubo etu a Bufumu saamweka kipale. Byo kiji kuba’mba Mazubo a Bufumu emenako jizhina ja Yehoba, kyanema bingi kwialama bulongo. Twiamonenga’mba mazubo a Yehoba kechi etu ne! Kampe twakankelwe kushimika nzubo yawama ya kupopwelamo na mambo a kubula mali. Pano bino, na mambo a lusa lwa Yehoba lubula kwaluka, kampe pano tuji na Nzubo ya Bufumu ya katataka. Nanchi kechi twafwainwa kumwesha lusanchilo lukatampe kupichila mu kulama bulongo ino nzubo yazhila ya kupwilamo ne nyi? Kukankalwa kulama bulongo Nzubo ya Bufumu kwakonsha kuleta musebanya pa jizhina ja Yehoba.—Ne. 1:3; 2:17.
6. Masawakya ka ofweshi wa musampi o atambwila?
6 Bipwilo byavula byatako bingi maana kulama bulongo Mazubo abyo a Bufumu. Nangwa byonkabyo, bipwilo bimo kechi byatako muchima ku uno mutembo wabyo wa kulama bulongo mazubo ne. Musampi watambwila masawakya a kuba’mba Mazubo a Bufumu ashimikwatu katataka kechi abena kulamwa bulongo ne. Amo aji na milala, bibumbulu bya ndochi, mabenchi achimauka, mu tubibamba mwa kusungila bintu biswaswa byaubatu mbwee, bipenze byalalaika, mabanza avimba, ne byolonyi nabyo kechi byasungiwa bulongo ne. Ano o masawakya amo atambwilwa. Nanchi Nzubo yenu ya Bufumu byobyo iji nyi?
7. Ñanyi kintu kikwabo kitulengela kulama bulongo Nzubo ya Bufumu?
7 Byonka byo kyaambiwapo kala, nkebelo ine ya kulamina bulongo Mazubo etu a Bufumu ke na mambo a jizhina ja Yehoba. Kintu kikwabo, ke na mambo a kuba pataiwa bingi mali avula pa kuba’mba Nzubo ya Bufumu ishimikwe. Luno lo tubena kwamba, Nzubo ya Bufumu yakepako mutengo muno mu Zambia yatendekela pa K40,000,000 kufika ku K50,000,000. Kyo kine kintu kyo twafwainwa kulaminanga bulongo Mazubo etu a Bufumu, mambo mali ataiwapo anengezhiwa kwiengijisha ku mwingilo wazhila. Kabiji ano mali afuma ku basapwishi bapana mu onka mali abo a kwikwashishamo. (Mako 12:41-41) Kumvwisha bino bishinka kwakonsha kwitulengela kulamanga bulongo mazubo etu.
8. Bañanyi baji na mutembo wa kuwamisha Nzubo ya Bufumu?
8 Nangwa kya kuba Mazubo a Bufumu avula aji mu maboko a ofweshi wa musampi, ano mazubo a kupopwelamo apanwa kwi Yehoba. Onkao mambo, kipwilo kyonse kyafwainwa kulamanga bulongo nzubo ya Lesa. Bimye bimo bipwilo binembela musampi kulomba bukwasho bwa mali a kupotamo binzhilo ne madofulemu a kupingizha pa oa o baja ku makena nangwa oa aonaika ku mvula, kuwamisha pa milala, nangwa kupotamo jilata jimo nangwa abiji a kupingizha pa aonaika. Nangwa byonkabyo, uno ke mutembo wa kipwilo kine kumona mali a kupotamo bino bintu bibena kukebewa.—Ne. 10:39.
9. Ki ka kibena kukebewa kuba’mba Mazubo a Bufumu alamwenga bulongo?
9 Umvwe mwamona mapunzha pafwafwafwa, wamishaipo bukiji bukiji saka pa kyangye kubaya. Kampe twamonapo kala kuba’mba milala icheche umvwe yabulwa kuwamishiwa yakonsha kubayilako mu kupita kwa kimye. Malata abena kuzekenta umvwe samwiatalatu, mwela wakonsha kwiapamunapo. Kwikala na mutanchi wa kuwamisha pafwafwafwa kabiji ne kuwamishapo bukiji kyawama, mambo mali ataiwapo akepa kukila oa ataiwa po mubena kutalatu umvwe pabaya. Onkao mambo, bipwilo byafwainwa kwikalangako na mali a pa ñondo pa ñondo a kupotamo bintu bibena kukebewa kuwamishishamo Nzubo yabo ya Bufumu. (1 Ko. 16:2) Pano bino umvwe kwaikala lukatazho lukatampe lwaponakotu kya kubazhimukila lubena kukebewa bukwasho bwa bukiji bukiji, ofweshi wa musampi ukakwasha kupichila mu Bukwasho bwa Mali Anengezhiwa Kulaminamo Nzubo ya Bufumu.
10. Mambo ka o kyawamina kwita balongo bayuka kwingila yoyo mingilo pa Nzubo ya Bufumu?
10 Umvwe mubena kuwamisha pafwafwafwa, kyawama kwita balongo bayuka kwingila yoyo mingilo. (Lupu. 35:30-35) Kuba bino kukalengela yewo mwingilo kwingijiwa bulongo, kabiji ne kukepeshako mapuso.
11. Bañanyi batangijila mwingilo wa kuwamisha, kabiji kya kumwenako kya kwa ñanyi kyo twafwainwa kulondela?
11 Ingilaingako Kuwamisha Nzubo Yenu ya Bufumu: Byo kitundaikapo pa kumona bakulumpe ne bankwasho sabatangijila uno mwingilo wa kuwamisha Nzubo ya Bufumu! Nehemiya wapaine kya kumwenako kyawama bingi. Kupusanako na bakalama bakwabo bajingako, Nehemiya kechi wamanyikanga nangwa kukanjikizha bantu ba Lesa kwingila ne. Kechi waubanga bino kuba’mba bantu bamutote ne. Mu kifulo kya byobyo, waingijilengako mwingilo na muchima yense. O ene mambo o aambijile’mba, “Bino amiwa kechi naubilenga byonkabyo ne, mambo a kwakamwa Lesa. Kabiji natesheshekotu muchima ku mwingilo wa nsakwa.” (Ne. 5:15, 16) Nehemiya ye watangijilenga mwingilo wa kuwamisha bibumbulu bya nsakwa ya muzhi.
12. Bañanyi bakonsha kuwamishanga Nzubo ya Bufumu?
12 Mu Nehemiya 3:12 tutangamo muntu mukwabo wayukanyikilwe bingi wa jizhina ja Shaluma. Aye ne baana banji babakazhi kechi balangulukanga’mba bakila bakwabo ne, bateletu muchima pa kwingila. Ne atweba bonse twafwainwa kwikala na muchima wa byonkabye wa kulamanga bulongo Nzubo ya Bufumu byonka byaubanga Nehemiya, Shaluma ne kisemi kyanji. Nanchi kuwamisha Nzubo yetu ya Bufumu kuba twikumona kwikala jishuko jikatampe nenyi?
13. Ki ka kyo twafwainwa kupwisha mu muchima pa mambo a Mazubo etu a Bufumu?
13 Kange Tubulenga Kuteshako Muchima ku Nzubo ya Lesa Wetu ne: Nanchi ano mafunde aambiwapo engilatu ku boba baji na Mazubo a Bufumu ashimikilwe na bukwasho bwa ofweshi wa musampi nyi? Ine. Kikulutu kipwilo kipwila mu kishimikwa kimonwa’mba Nzubo ya Bufumu, akyo kishimikwa kyafwainwa kusungwanga bulongo kuba’mba kifwainwe kutelwa’mba Nzubo ya Bufumu ya Bakamonyi ba kwa Yehoba. Kyafwainwa kwikala kya butooto mu kimasamasa kyonse kabiji kyalamwa bulongo kwikala mpunzha ya mpopwelo ya kine. Twayai tupwishe mu michima yetu kumwesha lusanchilo ku mazubo etu azhila a kupopwelamo kabiji ‘kechi tubule kuteshako muchima ku nzubo ya Lesa wetu ne.’—Ne. 10:39.