Bya Kubijika

◼ Mabuku a kusha mu January 2008: Shai buku uji yense wa kala wa mapeja 192 nangwa uji yense wanembelwe mwaka wa 1991 saka akyangye kufika. Bipwilo byabula ano mabuku byakonsha kwingijisha buku wa Kuyuka (umvwe poaji) nangwa buloshuwa wa Labainga Mukenkentenga! February: Shai buku wa Is There a Creator Who Cares About You? nangwa wa Icaba Inkaama Ku Nsansa Sha Lupwa. March: Nanchi Baibolo kine Ufunjisha’mba Ka? Ibikaiko kutendeka mafunjisho a Baibolo. April: Magazini a Kyamba kya Usopa ne Awake! Mwafwainwa kubwelako ku boba batainwe ku Kivuluko nangwa boba batainwe ku jashi jiikajila ja mvula bantu bino babula kutanwa ku kupwila. Nkebelo ya kuno kubwelako ke ya kutendeka lufunjisho lwa Baibolo na boba bakyangye kutendeka kufunda.

◼ Byo kiji kuba’mba ñondo wa March uji na milungu itanu, ke ñondo wawama bingi kwingijilamo bupainiya bwa kukwasha.

◼ Kutatula mu February, bino kechi kukila pa March 2 ne, jashi ja mvula bantu ja bukumo jikambanga bakulumpe ba bijiiji jikekala na mutwe wa kuba’mba “Kwepi ko Mwakonsha Kutana Bukwasho mu Bimye bya Malwa?”

◼ Bipwilo byafwainwa kunengezha bulongo kukavuluka Kivuluko kya uno mwaka kikekalako pa Kibelushi, March 22, panyuma ya kuzhika juba. Nangwa kya kuba jashi jakonsha kutatula bukiji, kupishamo bimpashañano kwafwainwa kutatulatu panyuma ya kuzhika juba. Ipuzhai bipamo bimona pa ñendelo ya luvula bimubule kimye kizhikilamo juba koko kwenu. Kipwilo kyonse kyafwainwa kwiikela na Kivuluko kyakyo. Pano bino kechi kimye kyonse po kyakonsheka kubiwa kino ne. Umvwe bipwilo byavula bingijisha Nzubo ya Bufumu imo, kipwilo kimo nangwa byavula byakonsha kwingijisha kishimikwa kingi pa jino juba. Umvwe kyakonsheka, twikimona namba kyakonsha kuwama umvwe sa papitako maminiti 40 pakachi inge kipwilo kimo kyapwisha pa kuba’mba kikwabo kitatule, kuba’mba bonse bakamwenemo mu kupwanañena pamo panyuma ya Kivuluko. Mwafwainwa ne kwilangulukilako pa mambo a pa kwimikila myotoka, pa kupatukila kabiji ne pa kupatamina bantu. Jibumba ja bakulumpe mu kipwilo jafwainwa kumonapo jishinda jakonsha kwingila bulongo ku mpunzha yo mujiko.

◼ Ma Baibolo etu ke mabuku o twafwainwa kulama bulongo. Twakonsha kumwesha byepi’mba twanemeka ma Baibolo etu? Kupichila mu kwiapanatu ku bantu batako muchima kufunda Baibolo, bakonsha kutanga kabiji batanwa ne ku kupwila. Kechi kwiashatu kishesheshe mu mwingilo wa mu bujimi ne.

◼ Javula bya kubijika bya pa mambo a mashinda a kulondela pa kuoda mabuku, bikala mu Mwingilo Wetu wa Bufumu. Kino ke kya kuvululako bakalume batala pa mabuku amba bafwainwa kutambulako kope wa Mwingilo Wetu wa Bufumu aku ufikatu pa kipwilo. Bafwainwa kumvwisha bya kubijika bijimo ne kuoda bukiji bukiji oo mabuku abena kukebewa.

◼ Bakulumpe batangijila bafwainwa kumona’mba kipwilo kibena kutambwila makope a Mwingilo Wetu wa Bufumu awaina sakusubukako ne acheche. Umvwe mubena kutambwila makope avujisha, mwafwainwa kukepeshako kibelengelo kwingijisha pepala wa M-202 Maoda a Kipwilo. Kabiji umvwe mubena kutambwila makope abula kuwaina bulongo, mwafwainwa kunungishako akwabo. Basapwishi bonse bafwainwa kutambulangako kope. Aba batanwa jonse ku kupwila kwa mwingilo kabiji babena kuba bingi bulongo ku mupashi kuba’mba batendeke kuyanga mu mwingilo wa mu bujimi, nabo bafwainwa kutambulako kope. Monai kuba’mba mwashapo kope imo ya kubika mu laibulale ya mu Nzubo ya Bufumu. Bantu bapangiwa mu kipwilo kechi bafwainwa kupewako kope ya Mwingilo Wetu wa Bufumu ne. (Monai Mwingilo Wetu wa Bufumu wa Kibemba wa February 1987.)

◼ Byonka byo kyabijikilwe mu Mwingilo Wetu wa Bufumu wa December, vidyo ya bukumo ya kuba’mba Pursue Goals That Honor God—On DVD (dvpsg) pano koiji. Ino vidyo yafuma ku kifwanyikizho kya kupwila kwa nkambi kwajingako mu 2005 kabiji ibena kumwesha makatazho apitamo bakyanyike pa kuba’mba bafikizhe kikonkwanyi kyabo kya kwingijila Lesa papelela bulume bwabo. Mu kino kifwanyikizho Timoti wakwasha mulongo wa kyanyike kutwajijila na mulanguluko wanji kupichila mu kumubula bintu byo apichilemo aye pa kufikizha kikonkwanyi kyanji kya kwingila mwingilo wa kimye kyonse. Ne bakyanyike nabo pa kulondelamo besakanyenga makatazho o bakonsha kwikala nao na bansemi babo babula Bakamonyi nangwa na bakwabo. Pano bino monai mulanguluko wajinga na Timoti wakwashiwe pakatampe na mambo a kupwanañana na mutumwa Paulo wakomene ku mupashi. Ino DVD kechi ikakwashatu bakyanyike kutwajijila mu bukine ne, bino ikebakwasha ne kufikizha kikonkwanyi kyabo kya kwingila mwingilo wa kimye kyonse. Ino vidyo pa kino kimye ijitu mu Kizungu.

◼ Kutendeka na mulungu wa August 4, 2008, tukafundanga buku wa Fundai ku Mufunjishi Wayukisha pa Lufunjisho lwa Buku lwa Kipwilo.