Kwibikishako Kutendeka Mafunjisho a Baibolo
Kutendeka mu January 2009, bipwilo bebitundaikile kumonapo juba ja Kibelushi kimo nangwa pa Mulungu pa ñondo pa ñondo ja kutendekelamo mafunjisho a Baibolo. Ki ka kyafumamo? Basapwishi bavula babena kukumya bingi ne kwikala na lusekelo lukatampe, bakumya mambo kutendeka mafunjisho a Baibolo kwibapelela kukila byo balangulukilenga kabiji baji na lusekelo mambo bantu bavula babena kuswa kufunda mu buku wa Nanchi Baibolo Kine Ufunjisha’mba Ka? Bakalama benda bashimuna kuba’mba, alwe lunengezho lwakatataka lwalengela bipwilo kwikala na kizaku, kabiji mwafuma byawama. Kyakumwenako, mu bañondo batanu bapitapo, basapwishi batendekele mafunjisho a Baibolo kukila pa 8,000 mu Italy.
Basapwishi babujile mafunjisho a Baibolo pano luno babena kubwelako na kutendeka mafunjisho a Baibolo. Carolina, wikala mu Peru waambile amba: “Luno lunengezho saka lukyangye kwikalako kechi najingapo na lufunjisho lwa Baibolo ne, pano bino, mulanguluko wa kumonapo juba jimo mu ñondo wandengela kuyuka buneme bwa kwikala na lufunjisho lwa Baibolo. Mweshai bena nzubo kuba’mba lufunjisho lwa Baibolo lwapeela kabiji kechi lutaya kimye kyabaya ne. Nsanta bingi kwi Yehoba byo ñingijisha ano mashinda o etupa kabiji mwafuma bintu byawama bingi, mambo luno mbena kufunjisha mafunjisho a Baibolo abiji.”
Kalama wa mwanzo mu Peru wapaine sawakya wa kuba amba: “Luno lunengezho lwakwasha bipwilo byavula kwikala na mafunjisho a Baibolo avula. Kipwilo kimo kyatumine sawakya wa mafunjisho a Baibolo akatataka 25 mu ñondotu umo, kabiji ne kipwilo kikwabo nakyo kyatendekele mafunjisho 24.”
Basapwishi bakyanyike nabo batendeka mafunjisho a Baibolo. Giovanna wa myaka ya kusemwa 11 wa mu muzhi wa São Paulo, mu Brazil washimikizha amba: “Juba jimo pa Kibelushi mute nasapwijilenga ku nzubo ku nzubo ne bamama, kutendeka mafunjisho a Baibolo mu buku wa Baibolo Ufunjisha. Pa nzubo itanshitu naipwizhe mwina nzubo, musulu wayukanyikilwe bingi, inge kya kuba waketekejile amba Baibolo wanembwa na mupashi wa Lesa. Waitabile amba ee. Namutangijile 2 Timoti 3:16. Waambile amba waumvwine bingi bulongo pa kumona nsongwakazhi keamubule bintu byawama kabiji watambwile buku.
“Byo nabweleleko ku uno mwanamulume, nayile ne bankambo babalume mambo abo beyukile na uno muntu. Uno mwanamulume witwambijile kutwela mu nzubo yanji kabiji namwambijile kutala bijimo mu buku wa Baibolo Ufunjisha ne kwisajila mutwe ye atemwa. Wasajilepo kitango 11, kyaamba kuba’mba, ‘Mambo ka Lesa o Aswishisha Buyanji?’ Panyuma ya kutanga mafuka abiji, aye ne mukazhanji betwipwizhe mepuzho avula. Batemenwe bingi kutana mikumbu yonse mu Baibolo kabiji baswile kutwajijila kufunda Baibolo. Najinga bingi nalusekelo kutendeka lufunjisho lwa Baibolo pa nzubotu itanshi.”
Kya kine, kechi bonse baswa kutendeka kufunda Baibolo ne, kabiji kechi bonse baswa kutendeka kufunda Baibolo batwajijila ne. Pano bino, byo tuji ba mu mwingilo umo ne Lesa, tutwajijila kutendeka mafunjisho a Baibolo ku bantu bavula ne kuyuka amba Yehoba ubena kuleta bantu ba bumukooko mu jibumba janji, lonaiko lwa buno bwikalo saka lukyangye kufika.—Yoa. 6:44; 1 Ko. 3:9.