Kutangijila Kupopwela kwa Kisemi

1. Yehoba wakambizha bansemi kuba ka, kabiji bakonsha kuba byepi bino?

¹ Yehoba wakambizha bansemi kufunjisha baana babo bukine. (Mpitu. 6:6, 7) Baana bafwainwa kufunda kutemwa Yehoba ne kuyuka byo bafwainwa kwikala bakishinka kwi aye. Bansemi bafwainwa kufunjisha baana babo kutangizhako bintu bya ku mupashi mu bwikalo bwabo. O ene mambo jibumba ja kalume wakishinka kabiji wa maana kyo jabikilako lunengezho lwa Kupopwela kwa Kisemi. Jino ke juba ja kufunda Baibolo na kisemi.

2. Nga bansemi bakonsha kuba byepi pa kuba’mba bonse mu kisemi bamwenengamo mu Kupopwela kwa Kisemi?

² Bintu bya Kwisambapo ne Mwakwisambila: Ñanyi bintu byo mwakonsha kwisambapo pa Kupopwela kwa Kisemi? Mutwe wa kisemi wafwainwa kuyuka bikebwa mu kisemi. Wakonsha ne kwipuzha ba mu kisemi byo babena kukeba ne kwibingijisha. Kwalaulako bintu kulengela Kupopwela kwa Kisemi kuwama. Kyawama bingi ne kwisamba pa makatazho atalañana na baana pa sukulu. Mwakonsha kwisamba mu jishinda jawama pa bintu nabiji kwifwalama, byo boba inge bakotoka ku sukulu ne pa “bya lwiso lwa bwanyike.” (2 Timo. 2:22) Bansemi bamo bafunjisha baana babo kimye kyonse bya kwingila bulongo mu mwingilo wa kusapwila. Kyanema bingi mutwe wa kisemi kulanguluka pa bibena kukebewa mu kisemi ne pa byo akonsha kwibafika pa muchima.

3. Bansemi bakonsha kulengela byepi Kupopwela kwa Kisemi kuwama?

³ Bansemi bakonsha kulengela byepi Kupopwela kwa Kisemi kuwama? Bansemi bafwainwa kumona kuba’mba bonse bakasuluka, kabiji paji mushingi. Ingijishainga mepuzho apela ne byakumwenako byakonsha kwibalengela kutako muchima. Bisemi bimo bafwanyikizha bantu batongolwa mu Baibolo, yense wa mu kisemi wikala nkaizhi, kutanga lubaji lwanji mu Baibolo nangwa kumwesha kyamwekele. Kufunda mu jino jishinda kechi kukayatu ne, bino kulengela baana kutako muchima pa kuba’mba mafunde a mu Baibolo ekale mu michima yabo. Kimye kyo mubena kufunda kyo kimye kyo mwafwainwa kutakaika baana benu, kwibasanchila pa kwibikako kwabo ne kwamba na kizaku pa kwisamba pa bintu bya ku mupashi.

4. Ñanyi kintu kyo mwafwainwa kutapo muchima pa kimye kya Kupopwela kwa Kisemi?

⁴ Vulukainga kyo Mubena Kubila Kino: Yukai’mba kikonkwanyi kyenu ke kufunjisha baana benu maana a Yehoba. (Efi. 3:17-19) Kino kilumbulula kufika baana benu pa muchima. Babulai ene mambo o bafwainwa kubilanga kyaswa muchima wa Lesa ne byo kyawamina kuba byobyo mu bwikalo bwabo. Kwikala na Kupopwela kwa Kisemi kimye kyonse kulengela kisemi kukoma ku mupashi. Kukwasha ne baana kuyuka bya kuba na makatazho a mu bwikalo. Yukai’mba Yehoba ukemupesha inge mwatwajijila kwikala na Kupopwela kwa Kisemi kimye kyonse.