Nkalata Kufuma ku Jibumba Jitangijila
Ku Bakwetu Bakamonyi ba kwa Yehoba:
Kino byo kyaikalapo kimye kyawama kabiji kituletela lusekelo! Tumvwa bingi bulongo kwingijila pamo ne anweba balongo ne banyenga “na muchima umotu” mu kwingila mwingilo mukatampe wa kushimuna bukamonyi pe Shetu wa mwiulu, aye Yehoba.—Zefwa. 3:9; Yoa. 14:12.
Byo twingijila Yehoba na lusekelo kechi kilumbulula’mba twikalatu kwa kubula kupita mu makatazho akatampe ne. Mu mwaka wa mwingilo wapwa, anweba bamo mwapichile mu binkunka bya bitentanshi, miyulo, binkunkwila ne bya malwa bikwabotu. (Mat. 24:7) Bavula bapita kimye kyonse mu makatazho eya na mambo a kukolwa kolwa ne bukote. Atweba bonse twafwainwa kuchinchika na “bisanso” bibena kuvujilakotu. (Mat. 24:8) Mu byalo byavula, kubikapo kyalo kya Armenia, Eritrea, ne South Korea, balongo betu bavula bebataya mu kaleya na mambo a lwitabilo lwabo.—Mat. 24:9.
Ki ka Kitukwasha kuchinchika mu ano makatazho onse? Kinembelo kya mwaka wa 2010 kituvululako kintu kimo kyanema kya kuba’mba: ‘Butemwe buchinchika mu bintu byonse. Butemwe kechi bupwa ne.’ (1 Ko. 13:7, 8) Kine, kutemwa balongo betu kabiji ne kutemwa Yehoba, kwitulengela kuchinchika.
Bavula betela amba bena Kilishitu, bakumya bingi pa kumona mwingilo wa kusapwila byo abena kuyilako palutwe. Nangwa kya kuba kechi baswa bintu byo twaitabilamo ne byo tufunjisha ne, bamo kibalengela kukumya ne kwamba’mba, “Anweba bantu mubena kwingila mwingilo ye twafwainwa kwingilanga atweba!” Ñanyi kintu kimo kilengela Bakamonyi ba kwa Yehoba kutwajijila kusapwila moba onse? Mukumbu jikwabo ke wa kuba’mba butemwe. Byonka biji Shetu wa mwiulu, kechi tusaka muntu nangwa umo akafwe ne. (2 Pe. 3:9) Kusaka kwetu kwa kuba’mba bantu bonse balapile kwamwekela mu kibelengelo kikatampe kya basapwishi kyakatataka kyafika ku 7,508,050 kya mu mwaka wa mwingilo wapwa. Ñanyi bupopweshi bukwabo buji na bamingilo bavula ba kwitemenwa kabiji babambakana mu kwingila mwingilo wa butemwe wa kuya na kusapwila?
Twatundaikwa kumona bungauzhi bwa kwa Isaya byo bubena kuya na kufikizhiwa bwa kuba’mba: “Mu moba akapelako mutumba paji nzubo ya Yehoba bakamwikazha ke mwine walepesha kukila mitumba ikwabo, kabiji bakamusuntwila peulu ya tutumbatumba tonse; kabiji mikoka yonse ya bantu ikakungulukila konka.” (Isa. 2:2-4) Pa bantu bavula babena kwiya ku nzubo ya Yehoba, paji ne basapwishi 294,368 babatizhiwe mu mwaka wa mwingilo wapwa. Tubena kutambwila bano bantu bakishinka mu jibumba jetu. Lekai butemwe bwetu bwa bwina Kilishitu bwitulengele kutwajijila kwibakwasha kuchinchika meseko onse a mulwanyi wetu, aye Satana Diabola.—1 Pe. 5:8, 9.
Kibelengelo kikatampe kya bantu 18,706,895 batainwe ku Kivuluko pa Kibiji, March 30, 2010, kibena kumwesha’mba kuji bantu bavula bakenunga kwi atweba mu kupopwela Yehoba. Twi ba lusekelo bingi kuyuka amba Yehoba ukyangye kukuleta mpelo ya buno bwikalo bubi! Pa kino kimye, butemwe bwetu bubena kwitukwasha kutwajijila kuchinchika.—2 Tesa. 3:5.
Kushonkena kwa Nkambi kwa “Twajijilai Kufwenya Kwipi ne Yehoba!” kwa mu 2010, kwaubiwe mwaya ntanda yonse, kwakoseshe bulunda bwetu ne Shetu wa mwiulu, aye Yehoba. Byo byaikalapo bya kine bino byambo bya nyimbi wa masalamo bya kuba’mba: “Bo bene ba lusekelo awa mutundu wa bantu baji ne Lesa wabo, Yehoba!” (Sala. 144:15) Nangwa kya kuba kechi twayuka bintu biji kulutwe ne, twasumininwa kuba’mba umvwe twaketekela mwi Yehoba, kechi tukachina kintu nangwa kimo ne. (Sala. 23:4) Katatakatu Yehoba kupichila mu mwananji ‘akonaune mingilo ya kwa Diabola.’ (1 Yoa. 3:8) Kine, tubena kutengela jino juba! Pano bino kino kimye, tuji na mingilo yavula ya kwingila.—1 Ko. 15:58.
Ketekelai kuba’mba ‘kimye kyonse,’ twimutela mu milombelo yetu. (Loma 1:9) Twajijilai ‘kwikala mu butemwe bwa Lesa byo mubena kutengela lusa lwa Nkambo yetu Yesu Kilishitu luleta bumi bwa myaka ne myaka.’—Yuda 21.
Twimutemwa anweba bonse!
Atweba balongo benu,
Jibumba Jitangijila ja Bakamonyi ba kwa Yehoba