Byo Twaingijile mu Mwingilo wa mu Bujimi

Bakulumpe ne bankwasho bakatanda bavula, bapita mu Sukulu wa Baibolo wa Balongo Bakatanda. Uno sukulu wibafunjisha bya kukwasha bakwabo mu mwingilo wa kusapwila. Balongo bafuma ku uno sukulu, bakwasha mu mwingilo wa kusapwila, wa bukafunga ne kufunjisha kabiji kino kilengela bipwilo kukomenako ku mupashi. (Efi. 4:8, 11, 12) Pa Mulungu 27 February, 2011, Bakulumpe ne bankwasho bonse pamo 24 bapwishishe Sukulu wa Baibolo wa Balongo Bakatanda wa nambala 49 mu Lusaka panyuma ya kufunda lufunjisho lwa Baibolo pa bañondo babiji lwa kwibakwasha kwikala ba mwingilo bengila bulongo. Balongo ne banyenga bafika ku 350 batainweko kabiji basangalejile pamo na baana basukulu pa jino juba jabo jiikajila.