Kechi Tuleka Kusapwila Ne
1. Twayuka byepi kuba’mba bena Kilishitu batanshi kechi balekanga kusapwila ne?
1 Bena Kilishitu batanshi basapwilanga na mukoyo mambo awama “kwa kubula kuleka” konse kwatanwanga bantu. (Byu. 5:42) Onkao mambo kechi twakonsha kulanguluka’mba pa kuya na kusapwila ku nzubo ku nzubo bapitailanga bantu bo basambakananga mu jishinda kwakubula kwibasapwila ne. Kabiji kechi balubangako kusapwila busapwishi bwa kushukilwa inge pamweka ka kimye ka kuba bino pa kupota bintu mu kisankanyi nangwa pa kufuma mu mwingilo wa kusapwila ne. Byonkatu byaubanga Yesu, nabo kechi balekanga kusapwila ne.—Mako 6:31-34.
2. Kwikela mwayila jizhina jetu kulumbulula ka?
2 Kwinengezha Kimye Kyonse: Jizhina jetu ja kuba’mba Bakamonyi ba kwa Yehoba kechi jilumbululatu byo tuba ne, jilumbulula ne byo tuji. (Isa. 43:10-12) Onkao mambo, twafwainwa kwinengezhanga kimye kyonse mwa kwibakumbwila bonse betwipuzha pa luketekelo lwetu, nangwatu kechi tubena kuya na kusapwila ku nzubo ku nzubo ne. (1 Pe. 3:15) Nanchi mutengela kushukilwa tubimye twa kusapwila ne kufuukwila jimo bya kwamba nyi? Nanchi mwenda na mabuku a kushila bantu batako muchima nyi? (Mana 21:5) Abya musapwilatu ku nzubo ku nzubo nyi, inyi musapwila mambo awama ne ku bantu bomutana mu mapunzha apusana pusana kwesakana na bintu byo biji?
3. Mambo ka busapwishi bwa mu mukwakwa ne mu mapunzha a busulu ne kukwabotu o twafwainwa kubujila kwibumonanga nobe busapwishi bwa“kwelaizhatu”?
3 Kechi Busapwishi bwa “Kwelaizhatu” Ne: Kala twamonanga busapwishi bwakusapwila mu mukwakwa, mu mapunzha mo bemika myotoka ne mu mapunzha a busulu amba bwa kwelaizhatu. Kwibumona nobe bwa kwelaizhatu kwakonsha kwibulengela kumweka nobe kechi bwanema ne. Mutumwa Paulo waambile’mba wasapwilanga “patoka,” ko kuba’mba pa mvula bantu ne ku nzubo ku nzubo. (Byu. 20:20) Onkao mambo, kwibumona’mba busapwishi bwa “patoka” kwawama kukila kwibumona nobe bwa “kwelaizhatu.” Kya kine kuba’mba busapwishi bwa ku nzubo ku nzubo lo lubaji lukatampe lwa mwingilo wetu kabiji bobo tufikizhizhamo mambo a Bufumu ku bantu bavula. Nangwa byonkabyo, basapwishi ba mu myaka kitota kitanshi batele muchima ku bantu, kechi mazubo ne. Basapwilanga bukine pavula bantu, mu misambo, ne ku nzubo ku nzubo. Ne atweba byo byo twafwainwa kubanga pa kuba’mba tupwishe mwingilo wetu bulongo.—2 Timo. 4:5.