Byo Twaingijile mu Mwingilo wa mu Bujimi

Ku bena Kilishitu bakine lelo jino, kafwako kintu kikebewa kwingijiwa bukiji kukila kusapwila mambo awama a Bufumu ne kufunjisha bantu ba mu bisaka byonse kwikala ke baana ba bwanga ne. Mufuma lusekelo lwabaya bingi mu kumona boba bafunjishiwa bukine pa kufuma mu mfishi ne kwiya mu kyeya. (Byu. 15:3; 26:18) Tuji bingi na lusekelo pa kwimubula kuba’mba bantu 1,743 babatizhiwe pa kubuñana kwajingako kufuma mu April kufika mu June 2011.