Mashinda Akwizhikijilamo ku Kubikola

Kyanema bingi kwikala ba butooto pa mazubo etu ne pa mapunzha a kupwilapo.—Mpitu. 23:10-14.

Ikalai na byolonyi: Twishi tuleta bikola tutanwa mu malabishi. Twishi tuleta bikola inge twatwela mu mema, kulamata ku bya kuja nangwa ku maboko, twakonsha kwitutomena pamo nangwa kwitujila pamo ne kwitumina. Akino kyakonsha kwitulengela kubela. Jishinda jawama kwizhikijilamo ku bikola ke kwingijisha byolonyi. Monai kuba’mba pa lubanza kechi paji malabishi a banyama ne. Twafwainwa kuwamishanga byolonyi ne kuzhikangapo kimye kyonse.

Mwafwainwa kowa ku maboko: Twafwainwa kowanga ku maboko na mulola nangwa na buto kimye kyonse. Kechi twafwainwa kowa ku maboko na mematu ne, kana kwingijisha mulola nangwa buto. Kyanema bingi kowa ku maboko panyuma ya kufuma ku kyolonyi nangwa panyuma ya kupipa mwana. Mwafwainwa kowa ku maboko panyuma ya kukwata banyama, saka mu kyangye kukwata ku bya kuja ne pa kujisha baana. Funjishai baana benu kowanga ku maboko kabiji ne kubula kukailanga ku bwipi na kyolonyi nangwa ku mapunzha ko bataya ndochi. Nanchi pa Nzubo yenu ya Bufumu patanwa mema akowa ku maboko kimye kyonse kyo mwikala na kupwila nyi?

Mwafwainwa kwingijishatu mema awama: Bisemi kechi bibelabela ne inge ke mwingijishe meema awama. Kechi twafwainwa kwingijisha mema a mu bizhiba, mu mikola, nangwa mu mishima kwakubula kwiateka ne. Mwafwainwa kuzhikanga pa mishima. Mabekete, ntambo ne bindundu mwafwainwa kwibyovwanga kimye kyonse ne kwibibika pa mpunzha pawama. Banyama kechi bafwainwa kufika ko mutapula mema ne. Kyawama kwikala na kindundu kiji na kamupompi kakuzunzulwilako mema mu nzubo yenu. Mema a kutoma kechi mwafwainwa kukwatako na maboko auba ndochi ne.

Zhikijilai bya kuja byenu ku twishi: Mwafwainwa kukabishanga bya kuja pa kuba’mba mwipaye twishi. Twishi tuvula bingi bukiji ku bya kuja byabula kukaba. Onkao mambo, kechi mwafwainwa kujanga bya kuja bya uba munyango. Inge mukeba kutula bya kuja kukila pa maola abiji, monai kuba’mba mwibisungila mwa kyuya nangwa mwauba munyango. Kabiji inge mukeba kutula bya kuja byapila jimo mwafwainwa kuzhikapo. Kuba bino kuzhikijila ku balunzhi ne kubilongolotu bikwabo. Saka mukyangye kuja kajo mwafwainwa kukabishako. Ovwai bipangwa ne bishu na mema awama. Kino kyanema bingi inge mubena kupa balukeke ne banyike kajo kakubula kuteka.

Tayai ndochi yonse pa nzubo: Malunzhi, mpemvu ne bampuku basenda twishi. Abino bintu byonse byatemwa paji ndochi. Inge ko mwikala kechi kuji basenda ndochi ne, mwafwainwa kupoya jikanda mwakutayanga ndochi amo mo mwakonsha kuzhikanga nangwa kusoka pa juba pa juba. Pa nzubo kechi pafwainwa kwikala ndonchi nangwa mema atentamina ne.

Inge mwalondela ano onse mashinda musakukezhikijila ku bikola pamo ne kisemi kyenu.