Kakitenguluzha ka Mepuzho

◼ Baasha bakonsha kukwasha byepi bansemi kukwasha bana babo kwikala kishinshi pa kimye kya kupwila?

Baana mu kisemwatu bakatazha bingi bansemi, kabiji kechi bomvwa bulongo kwikala kimye kyabaya pamo ne. Pa nyuma ya kupwila, baana batemwa kukilauka lubilo ne kupangisha banyike bakwabo mu Nzubo ya Bufumu nangwa mu mapunzha akwabo mo tupwila, mu mapunzha mwa kwimikila myotoka, nangwa mu mashinda. Nangwa byonkabyo, kwesakana na byonka byaamba kishimpi amba: ‘Mwana ye babula kufunda uletela inanji bumvu.’—Mana 29:15.

Ke kya bulanda bingi kuba’mba, balongo ne banyenga yetu bamo bakikulumpe bebapunka ne kwibakozha ku banyike bakitauka lubilo. Kino kyalengela bansemi ne kipwilo kwikala mu lukatazho lwakubula kuketekela ne kutaya mali avula. Pa kuba’mba bazhikijilwe, bansemi kechi bafwainwa kuleka baana kukitaukanga lubilo ne kukaya mukachi nangwa pangye ya Nzubo ya Bufumu ne.

Bansemi baji na mwingilo wa mu Binembelo wa kufunjisha baana babo kunemeka mapunzha etu a kupopwelapo. (Sapwi. 5:1a) Pa kupwila kwetu kwa Bwina Kilishitu, pa kubuñana, ne pa kushonkena kwa nkambi, baasha baji na mwingilo wa kumona kuba’mba “bintu byonse byubiwe na mushingi ne mo byalondankena,” kabiji kwikale “bulongo.” (1 Ko. 14:40; Kolo. 2:5) Bafwainwa kwikala bajimuka ne kukenkentanga mukachi ne pangye kupwila saka kukyangye kutendeka, kimye kya kupwila ne panyuma ya kupwila. Umvwe mwana ubena kukitauka nangwa kechi ubena kumvwa ne, asha ukakanya mwanyike ne kumubula ene mambo kukaya pa kimye kya kupwila kyo kwatamina. Bansemi ya mwana nabo bafwainwa kubulwa luno lukatazho lwa mwana ne kwibabula nkebelo ya kusopa mwanabo. Bansemi bafwainwa kulondela byo bebabula.

Twayuka kuba’mba pa bimye bimo, baana balukeke ne banyike bakonsha kujila nangwa kuvulañanya mu kimye kya kupwila. Baasha, bafwainwa kufika saka kwakishala maminiti 20 kuba’mba kupwila kutendeke, ne kushako bipona bya kunyuma mu Nzubo ya Bufumu bya bansemi bakeba kwikala ku nyuma na bana babo ba bacheche. Atweba bonse bashala twafwainwa kumvwina baasha ne kushila bansemi baji na bana ba bacheche bino bipona bya ku nyuma.

Umvwe mwana ubena kuvulañanya, bansemi bafwainwa kubapo kimo. Inge kya kuba bansemi kafwako kyo baubapo ne, ne kuvulañanya kwakilamo, asha ukambila bansemi kutwala mwana pangye. Umvwe twaita bantu baji na bana ku kupwila, twafwainwa kwikala nabo pamo ne kwibakwashako inge bana batendeka kujila nangwa kuvulañanya.

Kituletela bingi lusekelo kumona bana babimino byapusana pusana pa Nzubo ya Bufumu ne kumona byubilo byabo byawama mu nzubo ya Lesa. (1 Timo. 3:15) Kupichila mu kunemeka lunengezho lwa Yehoba lwa kupwila, bamunemeka ne kumusanchila ku bonse baji mu kipwilo.