Kuvwala Bulongo Kumwesha Munema kwi Lesa
1. Mambo ka o tukebela kumweka bulongo?
1 Byo tuji bena Kilishitu, kimye kyonse bantu bamona byo tuba. (1 Ko. 4:9) Twafwainwa kumwesha munema pe Lesa ne lusanchilo pa bintu byo etubila bya ku mupashi kupichila mu kuvwala ne kumweka bulongo.—Sala. 116:12, 17.
2. Lupusano ka luji pakachi ka bena Kilishitu ne mvwajilo ya bantu ba mu ino ntanda?
2 Butooto ne Kuba Bintu Monka mo Byalondankena: Mwekelo yetu yafwainwa kumwesha buzhile bwa Lesa wetu wa butooto kabiji uba bintu monka mo byalondankena. (1 Ko. 14:33; 2 Ko. 7:1) Mubiji wetu, nsuki yetu, ne ngala yetu byafwainwa kwikala bya butooto, kabiji mwekelo yetu nayo yafwainwa kwikala ya mushingi. Lelo jino, mwekelo ya busaji yavulamo bingi. Pano bino, mwina Kilishitu kechi wafwainwa kulondela mwekelo ya busaji amba mambo byo bimweka bantu baya nkuwa ne. Umvwe ketulondele mafwashonyi abavulemo, kyakonsha kulengela bantu kukankalwa kuyuka lupusano luji pakachi ka bantu bengijila Lesa wa kine ne boba babula kumwingijila.—Mala. 3:18.
3. Binembelo ka bitukwasha kumona kuba’mba twavwala bulongo?
3 Mvwajilo Yafwainwa ba Mwingilo ba Bwina Kilishitu: Mutumwa Paulo byo anembejile nkalata mukulumpe wa bwina Kilishitu aye Timoti, wakoseshe ne ‘banabakazhi kuvwala bibafwainwa na bumvu ne butekanye, . . . na mingilo yawama, byafwainwa banabakazhi betela’mba, twi ba kunemeka Lesa.’ (1 Timo. 2:9, 10) Jino jifunde jingila ne ku babalume. Pa kuba’mba tumone inge bivwalo byetu byafwainwa, kikebewa kulangulukishapo bulongo. Bivwalo byafwainwa kwikala byatooka kabiji bya mushingi, kechi bya kwimwesha ne kubindankanya bakwenu michima ne.—1 Pe. 3:3.
4, 5. Kimye kyo tubena kusala bya kuvwala, bintu ka byo twakonsha kuvulukanga?
4 Kuvwala na mushingi kutendekela pa kupota bintu byawama. Kuyuka bulongo mubiji wetu ne kupota bivwalo byabula kukepa nangwa bimwesha mubiji kwanema bingi. Bivwalo byetu biji nobe malaudisipika. Kuvwala bivwalo bikwata nangwa bimwesha mubiji, twakonsha kwi kwesakanya ku ‘kubaisha volyumu’ peulu. Nanchi kuba kino kwakonsha kulengela bakwetu kukasuluka nyi? Nanchi kechi kyakonsha kumwesha kuba’mba tubena kutangijilwa na mupashi wa ino ntanda ne nyi?
5 Atweba bavula tupota bya kuvwala byo baingijishako pa bisankanyi. Kuvula kwa bivwalo ne kukepa kwa mutengo kechi kyo kintu kyo twafwainwa kutalapo ne. Twafwainwa kusala bya kuvwala bitufika bulongo, po babula kunemba ne bibula kutundaika bintu bya ino ntanda. Pano bino, kwibikako kwenu kusanchilwa na balongo benu ne Yehoba.—1 Ko. 10:31.
6. Bintu ka byawama bifumamo umvwe saka tuvwala bulongo ne kumweka bulongo?
6 Byonkatu kumwemwesela byo kumwesha kilungi kya muntu bulongo, bivwalo byawama ne kumweka bulongo nako kulumbulula bulongo mambo awama o tusapwila ne jibumba jo tujimo. Bamo betumona umvwe tuji mu mwingilo, tubena kuya na kupwila, tuji pa nzubo, kimo kimye kyakonsha kwibalengela kwitwipuzha ene mambo o twapusenako na bupopweshi bukwabo ne kwamba kuba’mba: “Tuyenga nenu, mambo twaumvwa’mba Lesa muji nanji.” (Zeka. 8:23) Atweba bonse twayai tutwajijile na kupana munema kwi Yehoba kupichila mu mvwajilo ne mwekanyikilo yetu.