“Twayai Tupanenga Kitapisho kya Kutota Lesa Moba Onse.”
1. Bena Kilishitu batanshi bamonanga byepi kupwila kwa kipwilo?
1 Byambo bya kwa Paulo byaamba pa kupwila kwa bena Kilishitu biji mu 1 Kolinda 14:26-33 bitulengela kuyuka kupwila byo kwaikalanga mu myaka kitota kitanshi. Byo aambilenga pa bino byepelo, Shayuka wa Baibolo umo waambile amba: “Kintu kyanema kyaubiwanga mu Chechi mutanshi ke kya kuba’mba muntu yense waiyanga na kupwila saka enengezha kukumbulapo. Kafwako waiyanga na kwikala ne kutelekatu ne; bino yense waiyanga na kuteleka ne kwambapo.” Bena Kilishitu batanshi bamonanga kupwila kwa kipwilo kwikala ke kimye kya kulumbulula lwitabilo lwabo.—Loma 10:10.
2. (a) Ñanyi kintu kyanema kilengela kupwila kwikala kukoseshañana, kabiji mambo ka? (b) Mwakonsha kuwamishako byepi mikumbu yenu pa kupwila?
2 Kwilumbulwila lwitabilo lwetu pa kupwila kulengela “kukomesha kipwilo.” Mwakonsha kuswa kuba’mba nangwa kya kuba twatendekele kala kupwila, tutundaikwa bingi kuteleka ku mikumbu ya balongo ne banyenga. Mikumbu ya bena kilishitu bakwetu bakikulumpe kabiji bakishinka itufika bingi pa muchima. Mikumbu ya bakulumpe mu kipwilo itukosesha bingi. Twikala na lusekelo umvwe kya kuba mwanyike wakumbulapo ne kumwesha byo atemwa Yehoba. Kupichila mu kukumbulapo, tulengela kupwila kwa bena Kilishitu kwikala kwa kwikosesha.
3. (a) Ñanyi bintu byo twakonsha kufunjilako kwi Mosesa ne Yelemiya? (b) Mambo ka o mwafwainwa kushiinwa amba moyo wenu wa kukumbulapo pa kupwila wakonsha kupwa?
3 Pano bino ku boba bomvwa moyo, kyakonsha kwibakatazha bingi kukumbulapo. Umvwe ne anweba kimukatazha, kyakonsha kuwama kuvuluka amba kechi yenu bonka mumvwa bino ne. Ne bakalume bakishinka ba Lesa nabiji Mosesa ne Yelemiya nabo bemwene kuba’mba kechi bajinga na bulume bwa kwamba ku bantu ne. (Lupu. 4:10; Yele. 1:6) Pano bino, byonkatu Yehoba byo akwashishe boba bakalume ba ku kala kumutota ku bantu, ne lunotu Lesa ukemukwasha kwamba byambo bya kumutota. (Tangai Bahebelu 13:15.) Mwakonsha kutambwila byepi bukwasho bwa Yehoba pa kuba’mba mubulenga kwikala na moyo wa kukumbulapo? Kintu kitanshi, nengezhainga bulongo kupwila. Kepo saka mukyangye kuya ku Nzubo ya Bufumu, mwafwainwa kulomba kwi Yehoba ne kumusashijila kikatakata kuba’mba emupe bulume bwa kukumbulapo. (Fili. 4:6) Mubena kulomba kintu kyayila monka “mwayila muchima wanji,” onkao mambo mwafwainwa kuketekela amba Yehoba usakukumbula lulombelo lwenu.—1 Yoa. 5:14; Mana 15:29.