Nkalata Kufuma ku Jibumba Jitangijila

Ku Balongo ne Banyenga:

“Kimye kyonse tumusanchila Lesa byo twimutongola anweba bonse mu milombelo yetu, mambo tuvuluka kimye kyonse mwingilo wenu umwesha lwitabilo, mwingilo ye mwingila na mambo a butemwe, ne kuchinchika kwenu na mambo a luketekelo lwenu mwi Nkambo yetu Yesu Kilishitu ku meso a Lesa wetu kabiji Tata.” (1 Tesa. 1:2, 3) Bino byambo byalumbulula bingi bulongo byo tumvwa pe anweba bonse! Tumusanchila bingi Yehoba pa mingilo yawama yo mubena kwingila. Mambo ka?

Mwaka wapwa mwapayankene bingi na kutundaika Bufumu bwa Lesa na ‘mingilo yenu imwesha lwitabilo’ ne “mwingilo ye mwingila na mambo a butemwe.” Bavula mwamwenepo mashinda a kwingijilamo pakatampe mu mwingilo wa kusapwila. Bamo mwayile na kwingijila ku mapunzha ne mu byalo mubena kukebewa basapwishi ba Bufumu. Bakwabo baingijileko pakatampe mu mwingilo wa kusapwila pa mvula bantu. Kabiji bavula baingijileko mwingilo wa bupainiya bwa kukwasha mu kimye kya Kivuluko, kimye kyafwakeshe kalama wa mwanzo, nangwa mu kimye kya mukwekele mu August mu 2014. Nangwa kya kuba byo mubena kupitamo byapusana pusana, bino twayuka kuba’mba mubena kwingijila Yehoba na muchima wenu yense kabiji tubena kwimusanchila bingi. (Kolo. 3:23, 24) ‘Mingilo yenu imwesha lwitabilo’ yo itulengela kumusanchila bingi Yehoba.

Kabiji tusanta bingi ne pa “mwingilo ye mwingila na mambo a butemwe” wa kutundaika mwingilo wa kushimika bishimikwa bya kwa Lesa mwaya ntanda yonse. Bino bishimikwa bibena kukebewa bingi mambo bantu ba Yehoba babena kuvujilako bingi. (Isa. 60:22) Akilangulukai pa kino, basapwishi mwaka wapwa bajinga 8,201,545, kabiji mafunjisho a Baibolo ajinga 9,499,933 pa ñondo pa ñondo. Na mambo a kuno kuvujilako, kubena kukebewa kubayishako misampi nangwa kwiiwamisha. Kabiji kubena kukebewa ne Mazubo a Bufumu akwabo. Kabiji pa kimye kimotu, kubena kukebewa kushimika Maofweshi a Bantuntuluzhi mwaya ntanda pa kuba’mba bantuntuluzhi bakekalenga ne kwingijila ku mapunzha ko baamba mulaka ye batuntulula.

Onkao mambo, twakonsha kwiipuzha’mba, ‘Nafwainwa kuba byepi pa kuba’mba ntundaikeko uno mwingilo wa kushimika bino bishimikwa?’ Bamo mwi atweba twakonsha kwipana atweba bene kwingilako uno mwingilo wa buntungi. Nangwa kya kuba twi basendwe mu bya kushimika nangwa ne, atweba bonse twakonsha kwingijisha bintu byetu bya ku mubiji kutundaikilamo uno mwingilo. (Maana 3:9, 10) Byo bashimikilenga tente wa lusambakeno, bena Isalela baumvwine bingi bulongo ne kupana bintu byo bajinga nabyo kya kuba bintu byo baletele byavujile bingi. (Lupu. 36:5-7) Kwa kubula nangwa kuzhinaukatu ne, ano mashimikila a mu Binembelo etufika bingi pa muchima ne kwitutundaika. Mwingilo wenu “ye mwingila na mambo a butemwe,” ke kishinka kikwabo kitulengela ku musanchila bingi Yehoba.

Tuji na bishinka byavula bingi bitulengela kusangalala byo tumona kushikimana ne kuchinchika kwa balongo. Akilangulukai pa balongo betu baji mu kyalo kya South Korea. Kufumatu mu mwaka wa 1950, balongo bakyanyike mu kino kyalo bebakasa myaka yapusana pusana na mambo a kukana kutwela bushilikale byo baji bena Kilishitu. Bano balongo bachinchika luno lumanamo, kwa kubula kutaya lwitabilo lwabo. Kuchinchika kwabo kukosesha bingi lwitabilo lwetu.

Mu kyalo kya Eritrea papita ne myaka 20 kufuma po bakashijile balongo betu basatu. Bakwabo, kubikapotu ne banyenga ne baana babo, bebakasa mu tuleya pa kimye kicheche. Twaeseka bingi kuba’mba bebakasulule, pano bino mu kuno kwibikako kwetu kafwakotu nangwa kimo kyafumamo ne. Bino balongo betu kechi bekileka kwikala bena Kilishitu ne. Batwajijila kwikala bakishinka ne mu bino bimye bya malwa. Kechi twibalubako bano balongo ne banyenga bakishinka mu milombelo yetu ne.—Loma 1:8, 9.

Kya kine kuba’mba bavula mwi anweba kechi mwakaswa na mambo a lwitabilo lwenu ne. Bino nangwa byonkabyo, anweba bavula mu bena kupita mu bya malwa na mambo a kukoma, kukolwa kolwa, kwimumanyika ku bena kwenu babula kwitabila nangwa ku balongo benu babula kwitabila ne makatazhotu enu a pa juba pa juba o mwayuka anweba bene. Nangwa byonkabyo, mwatwajijila kwingijila Yehoba mu bukishinka. (Yako. 1:12) Tubena kwimusanchila bingi. Kuchinchika kwenu mu bukishinka ke kintu kikwabo kitulengela kumusanchila Yehoba.

Kinetu, mingilo yenu imwesha lwitabilo, mwingilo ye mwingila na mambo a butemwe ne kuchinchika kwenu kwitulengela ku “musanchilai Yehoba, mambo wawama.” (Sala. 106:1) Twimutemwa bingi anweba bonse, kabiji tubena kulomba kuba’mba Yehoba emukoseshe ne kwi mukwasha ne kwimupesha pa kuba’mba mu mwingijilenga myaka ne myaka.

Atweba balongo benu,

Jibumba Jitangijila ja Bakamonyi ba kwa Yehoba