Nanchi Mukivuluka Nyi?

Nanchi mwatanga Byamba bya Usopa bya uno mwaka nyi? Monai inge mwakonsha kukumbula ano mepuzho:

Ñanyi bintu byo tumwenamo inge kya kuba ke twikalepo na kimye kya kwisamba ne Yehoba, kuteleka, ne kulanguluka pe aye?

Tukafuukulanga byalumbuluka, tukekala bafunjishi bawama, lwitabilo lwetu lukakosa, kabiji butemwe bo twatemwa Yehoba bukabaya bingi.—w22.01, ma. 30-31.

Kuketekela mwi Yehoba ne mu bantu bo atongola kwitutangijila kwakonsha kwitukwasha byepi?

Kino kyo kimye kya kufunda Lesa mo obila bintu ne kwibiketekela, kechi kulengulula lutangijilo ne byafuukula bakulumpe mu kipwilo ne. Inge twaketekela mikambizho yo tutambula lelo jino, tukakonsha kuketekela ne mikambizho yo baketubuulanga mu kimye kya malwa akatampe.—w22.02, ma. 4-6.

Malaika watazhizhe mwepi byo aambile kwi Zekaliya pa “lutambo wa kolwelako mu kuboko kwa kwa [Kinemanga] aye Zelubabele”? (Zeka. 4:8-10)

Byambo byaambile malaika, byamwesheshenga’mba bantu ba Lesa bafwainwa kuketekela kuba’mba nzubo ya Lesa nangwa kya kuba kechi yaesakene pamo na ya kala ne, ikekala byonka byakebelenga Lesa amba ikale.—w22.03, ma. 16-17.

Twakonsha kwikala byepi “ba kumwenako . . . mu ñambilo”? (1 Timo. 4:12)

Inge ke twambe na jiwi jakooka ne na mushingi mu mwingilo, kwimba na muchima yense, kukumbulapo pa kupwila, kwamba byambo bya kine ne kwamba byambo bikomesha bakwetu, ne kuchinuzhuka ñambilo ya mwenga.—w22.04, ma. 6-9.

Mambo ka buku wa Lumwekesho 13:1, 2, o abujila kutongwela binyama bina (bamfumu) byo baambapo mu buku wa Danyela kitango 7, bino watongolatu lukinyama umo uji na byonse?

Lukinyama ye batongola mu Lumwekesho 13 kechi wimenako bufumu bumo nabiji byajinga Loma ne. Pakuba wimenako makafulumende onse pano pa ntanda alama bantu.—w22.05, ji. 9.

Ñanyi bintu byo twafwainwa kuba pa kumwesha’mba twaketekela mu bunchibamambo bwaoloka bwa Lesa?

Umvwe muntu umo witwambila mwenga, wituzhingijisha, nangwa witulenga mambo, kechi tutwajijila kuzhingila ne, tushila byonse mwi Yehoba. Mambo ukafumyapo bundengamambo bonse.—w22.06, ma. 10-11.

Mulongo ubena kulomba pa kupwila wafwainwa kuvuluka ñanyi bintu?

Wafwainwa kuvuluka kuba’mba mu lulombelo kechi mo mo twafwainwa kujimwina bakwetu nangwa kwamba pa bintu byabula kuyukanyikwa ku kipwilo ne. Kabiji kechi wafwainwa “kubwezhabwezhapo byambo” ne, kikatakata pa lulombelo lwa kushinkwila kupwila. (Mat. 6:7)—w22.07, ma. 24-25.

Mu ñanyi jishinda “baubilenga byatama” mo “bakasangukila ku kije”? (Yoa. 5:29)

Kechi bakebazhachisha na mambo a byo baubile kala ne. Bakebachibila mambo pa bintu byo bakobanga inge basangulwa.—w22.09, ji. 18.

Ñanyi byambo bya lutundaiko byaambile ba J. F. Rutherford pa kushonkena kwajingako mu September 1922?

Pa kushonkena kwajinga mu Cedar Point, Ohio, U.S.A., Mulongo Rutherford waambile’mba: “Mfumu ubena kulama! Anweba bonse muji na mwingilo wa kubuula bantu pa uno mfumu. Onkao mambo, tayai mbila, tayai mbila, tayai mbila, ya Mfumu ne Bufumu bwanji!”—w22.10, ma. 3-5.

Isaya kitango 30 kyaamba pa ñanyi mashinda asatu Lesa mo etukwashisha kuchinchika?

Kino kitango kyamwesha’mba Lesa (1) umvwa ne kukumbula milombelo yetu, (2) witutangijila, ne (3) kwitupesha luno kabiji uketupesha kulutwe.—w22.11, ji. 9.

Mambo ka o twakonsha kwambila’mba byambo biji pa Salamo 37:10, 11, 29 byafikile mu moba a kala kabiji bikafika ne kulutwe?

Byambo bya kwa Davida byaambile pa mapesho Lesa o apele bena Isalela mu bukalama bwa kwa Solomone. Yesu naye waambile pa paladisa uji kulutwe byo aambile byambo biji mu kyepelo 11. (Mat. 5:5; Luka 23:43)—w22.12, ma. 8-10, 14.