Hulda Wapotele kyo Akebelenga

MYAKA imo yapitapo, banyenga basatu bekala pa jikuji jicheche ja Sangir Besar jiji mu Indonesia baingijilanga pamo ku kitulu. Bebayuka bingi ku bantu bavula ba pa jino jikuji na mambo a mwingilo wa kusapwila, ko kuba’mba mwingilo wa kukwasha bantu kuyuka biji mu Baibolo. Nangwa byonkabyo, juba jimo baingijile mwingilo wapusanako.

Patanshitu, bakubwilenga mu mema na kukeba mabwe ne kwiabika ku kitulu. Mabwe amo abayile bingi. Kyalondejilepo, bano banabakazhi baikele pa tumatebe ne kutendeka kulalaula mabwe o batuntwile ku kitulu. Ano mabwe o balalawilenga beasendele mu mabekete ne kwiatwala ko baikalanga. Kepo balongele ano mabwe mu masaka akatampe o bakonsheshe kulonga mu bimbayambaya ne kwiengijisha pa kulenga mikwakwa.

Umo pa bano banyenga wajinga Hulda. Aye wajinga na kimye kyabaya kya kwingila mwingilo wa kulala mabwe. Javula waingijishanga mali afumanga mu mabwe kupotamo bintu bikebewa mu bwikalo. Pano bino pa kikye kimye wakebelenga kulamapo mali amo pa kuba’mba eengijishe ku bintu bikwabo. Wakebelenga kupota tabuleti pa kuba’mba akekale na JW Library pa uno tabuleti. Hulda wayukile’mba mavidyo ne bintutu bikwabo bijipo bikamukwasha mu mwingilo wa kusapwila ne kumvwisha biji mu Baibolo.

Pa ñondo umo ne kichika, Hulda waingilanga maola abiji pa juba pa juba lukelo na kulala mabwe pa kuba’mba ayuzhe kimbayambaya kicheche. Byo aubile bino wataaine mali a kupotamo tabuleti.

Hulda waambile’mba: “Nangwa kya kuba nakookangatu zubulu kabiji naikalanga na mabobela mu maboko na mambo a kulala mabwe, bino byo napotele tabuleti nalubileko ne ku mabinjila ne bilonda byo najinga nabyo mambo uno tabuleti unkwasha kusapwila bulongo ne kunengezha bulongo kupwila.” Kabiji waambile’mba uno tabuleti wamukwashishe bingi mu kimye kya mwalo mambo bipwilo byonse pa kyokya kimye byaingijishenga Zoom pa kupwila. Kino kitusangajika bingi mambo Hulda wapotele kyo akebelenga.