Nanchi Mwayuka Nyi?
Mu myaka kitota kitanshi, bañanga ba Lesa baubanga byepi na mashi inge bapwisha kutapisha banyama pa kya kusokelapo bitapisho?
Pa mwaka pa mwaka, bañanga ba Lesa mu Isalela bapananga milambo ya banyama bavula bingi pa kya kusokelapo bitapisho mu nzubo ya Lesa. Kwesakana na Shayuka wa bya mpito Muyudea aye Josephus, pa Kijiilo kya Lupitailo balambulanga mikooko kukila pa 250,000 kabiji mashi avula asuminanga panshi ya kya kusokelapo bitapisho. (Levi 1:10, 11; Bala. 28:16, 19) Pano baubanga byepi na ano mashi?
Bamfunji ba bya kupoyapoya bataaine mufolo mukatampe mu nzubo ya Lesa yashimikile Heloda yo bapopwelangamo kufikatu ne kimye kyo beyonawine mu 70 C.E. Kyamweka mu uno mufolo mo mwayanga mashi afumanga ku banyama bo batapishanga.
Akilangulukai pa byajinga uno mufolo:
Bwina bwajinga kunshi ya kya kusokelapo bitapisho: Byo balumbulula mifolo yo bapoyile yayile pa kyakusokelapo bitapisho bitaanwa mu buku utelwa’mba Mishnah waamba pa mizhilo ne bisho bya Bayudea ye bataaine ku ntendekelo ya myaka kitota kya busatu C.E. Uno buku waamba’mba: “Ku lubaji lumo lwa kya kusokelapo bitapisho kwajinga mena abiji. Mu ano mena mo mwakonkolokelanga mashi ne mema o baingijishanga kovwa kya kusokelapo bitapisho. Ano mashi ne mema bivwanganga mu ano mena ne kukonkolokela mu kimpachiko kya Kidelona.”
Bamfunji ba bya kupoyapoya nabo baswa kuba’mba bantu baingijishanga mena kuba’mba mukonkolokelenga mashi. Buku waamba pa bya mpito bya Bayudea walumbulula’mba bamfunji ba bya kupoyapoya bataana mena kwipi na nzubo ya Lesa mwakonkolokelanga mashi avwangakene na mema afumanga pa kya kusokelapo bitapisho.
Nsulo ya mema: Bañanga bakebewanga kwikala na mema avula a kwingijisha pa kovwa kya kusokelapo bitapisho ne mema akwabo avula a kukonkolokela mu mena kuchina mashi kuchimbilamo. Pa kuba’mba bengilenga bulongo uno mwingilo, bañanga bafwainwe kwikala na mema avula abena kupita kufuma mu muzhi. Mu muzhi bapoyilemo mishima, bizhiba ne mifolo yaletanga mema o baingijishanga. Mfunji wa bya kupoyapoya aye Patrich waambile’mba: “Jino jishinda jawamine bingi mambo jibalengelanga kwikala na mema avula a kwingijisha kovwa kya kusokelapo bitapisho ne kwikala na mema akwabo avula akonkolokejilenga mu mena kuchiina mashi kuchimbilamo.