Biji Kyalo kya Indonesia

Kyalo Kyaikela pakachi ka mupaka wa ntanda yonse, aku Australia aku Asia, Indonesia ke kyalo kiji na makuji avula bingi. Muji makuji avula kukila pa 17,500, kabiji mwavula mitumba ne bichi. Muji mitumba kukila pa 100 yakonsha kutubika pa kimye kyonse, kabiji kyo kyalo pano pa ntanda kiji na mitumba itubika.

Bantu Kyalo kya Indonesia kyo kya buna pano pa ntanda muji bantu bavula (kitanshi China, India ne United States) kabiji mwikala mitundu ya bantu 300. Bena Java ne bena Sunda yo mitundu ya bantu bavujilamo.

Bupopweshi Bantu bavula mu Indonesia Bamozilemu. Bakwabo ke Bahindu, Babuda ne betela’mba bena Kilishitu. Kabiji bantu bavula balondela bisho bya bupopweshi bwabo.

Mulaka Muji milaka kukila pa 700 yo bamba mu makuji onse. Bantu bavula mu Indonesia bamba mulaka wa lingua franca, kyambo kyafuma ku mulaka wa Malay. Bantu bavula bamba milaka yabo pa mazubo.

Bwikalo Bantu bavula banjimi nangwa basulu. Mu kino kyalo mwavula mabwe a buneme, mapulanga, manyi a mu myotoka, gasi yo bengijisha ku bitofu kabiji mo mufuma mizeela yo balengela matayala kabiji mo mufuma ne kinkoonja.

Kajo Mupunga ko kajo ko baja. Kajo katemwa bantu bavula ke nasi goréng (ko kuba’mba mupunga ye bakanga ne make o bavwangakanya na bishu), satay (nyama ya kosha), ne gado-gado (bishu bibishi ne masuku a nyimu).

Byo kuji Kwatwa kyuya ne munyango. Mwela ufuma ku kabeta ka ku buyeke ne ufuma ku kabeta ka ku bulenge ye ulengela’mba kwikale mayoo ne kisalo. Kunoka bingi mvula wa kinkunkwila.