Kushonkena ko Nkabula Kulubamo

KUFUMA pa 15 kufika pa 18 August 1963, basapwishi bavula kufuma mu kyalo kyonse ne basapwishi 122 bafumine mu byalo bingi, baishile mu muzhi wa Bandung, ku West Java. Baishile na kutanwa ku kushonkena kwajinga na mutwe wa kuba’mba “Everlasting Good News” (Mambo Awama a Myaka), akuno ko kwajinga kushonkena kutanshi mu Indonesia.

Pa kuba’mba banengezhe kuno kushonkena, balongo bapichile mu makatazho avula bingi. Bapimpwile mpunzha pa kushonkena bimye bisatu, mambo kishimikwa bekingijishenga kusekelelamo Juba ja Bwanabwabene. Ba mu kafulumende byo banungileko mutengo wa mali akukanjijila myotoka, kyalengejile balongo ne banyenga kwingijisha mashinda akwabo a kwendelamo. Mulongo umo waendele panshi moba atanu na jimo pa kuba’mba afike kwaikejile kushonkena. Bantu 70 bafumine ku Sulawesi baendele na bwato moba atanu pa kuba’mba batanweko.

Pa kuno kushonkena, balongo ba ku Indonesia batemenwe bingi kumona balongo ne banyenga bafumine ku byalo bingi kuvwangakotu ne balongo babiji ba mu Jibumba Jitangijila, Frederick Franz ne Grant Suiter. Ñambi mwenyi umo waambile’mba: “Balongo basangalala bingi; babena kusekatu kimye kyonse ne kumwemwesela.”

Bantu kukila pa 750 batainwe ku kuno kushonkena kabiji bantu 34 babatizhiwe. Ronald Jacka waambile’mba, “Kuno kushonkena kwatundaikile bantu bavula batainweko kutemwa bukine. Kwalengejile balongo bakonkakwa kutako muchima kwingila mwingilo wa Lesa.”