Naingijile Bupainiya Bwiikajila Myaka 50

MU 1964, bantumine kwikala painiya wiikajila ku Manokwari, ku West Papua kwajinga kipwilo kicheche kyo bakatezhe bingi ku bantangi ba bupopweshi. Aku mfikatu kokwa, mukulumpe wa ba Polotesitanti waishile na jibumba ku nzubo yami.

Waambile na bukaji amba: “Mbena konauna ino nzubo ne kuzhiya Bakamonyi ba kwa Yehoba bonse baji mu muzhi wa Manokwari.”

Na mambo a kuba najingapo kala kapokola, kechi nachiine byo añambijile ne. Nangwa byonkabyo, namukumbwile na mushingi ne kufumapo mu mutende.—1 Pe. 3:15.

Pa kyokya kimye, mu muzhi wa Manokwari mwajingatu basapwishi batanu na basatu. Lelo jino, byo papita myaka 50, mu uno muzhi muji bipwilo bitanu na bibiji. Bantu kukila pa 1,200 bo batainwe ku kushonkena kwa kijiiji mu 2014. Umvwe namona byauba Yehoba mu ino mpunzha, kinsangajika bingi.