BYAMBAPO BAIBOLO

Butuntulu Bwa Mubiji

Nanchi Lesa utako muchima ku byo tulama mibiji yetu nyi?

“Kechi wikale pamo na batomatoma binyu ne, nangwa pamo na batunama bajajajatu nyama ne.”—Byambo bya Mana 23:20.

MAMBO KA O KYANEMENA? Baibolo kechi buku ufunjisha bya michi ne, kabiji kechi upana mafunde pa byonse byo twafwainwa kulondela ne. Nangwa byonkabyo, mwafwainwa kumwenamo inge mwayuka Lesa byo amona bumi kwesakana na byamba Baibolo.

BYAMBA BAIBOLO Binembelo byavula biji mu Baibolo byaamba pa biumvwa Lesa pa byo tulama mibiji yetu. Kyakumwenako, Baibolo wakanya byubilo nabiji kutunama ne kupendwapendwa. (Byambo bya Mana 23:20) Mizhilo ya Lesa yo apele bena Isalela bakala mwajinga ne yaambilenga pa byo bafwainwe kulondelanga ne kwizhikijila ku bikola. Kabiji mwavwangile ne muzhilo waambilengatu pa kwizhikijila ku mapuso. (Mpitulukilo ya mu mizhilo 22:8) Baibolo witutundaika kulama bulongo mibiji yetu ne bya kwizhikijila ku bikola.

Kwesakana na byamba Baibolo, mambo ka o Tukolelwa?

“Onkao mambo, bundengamambo bwatwelele pano pa ntanda mu muntu umo, ne lufu nalo lwaishijile mu bundengamambo.”—Loma 5:12.

BYAMBA BANTU Bavula baitabila kuba’mba kubela kwiyako na mambo a kuba’mba bilengwa bilengeletu abyo bine. Bakwabo nabo bamba’mba kilengela ke mipashi yabipa.

BYAMBA BAIBOLO Kwesakana na byamba Baibolo, tubela na mambo a kuba’mba bansemi yetu batanshi basatukijile Lesa. (Loma 5:12) Ba Adama ne Evwa saka bakyangye kusatuka, bajinga na bumi bwawama. Bayukile kuba’mba umvwe bamusatukila Lesa bakafwa. (Ntendekelo 2:16, 17) Pano bino, baonawine bulunda bwabo na Lesa kyanshijitu ne kwela bulumbuluke bwabo.a

Adama ne Evwa byo baelele bulumbuluke bwabo, betulengela ne atweba kwikala babula kulumbuluka. Nangwa bantu bebikeko byepi kupwisha bikola, tutwajijila na kubela.

MWAKONSHA KUBA BYEPI? Baibolo ufunjisha kuba’mba umvwe twalapila kupichila mu kulondela mafunde a Lesa, tukekala na bumi bwalumbuluka mu paladisa pano pa ntanda. (Isaya 33:24) Lesa walaya kufumyapo misongo, kubela ne lufu.—Lumwekesho 21:3, 4.

Nanchi Baibolo ukanya kwingijisha michi pa kubukwa nyi?

“Bantu batuntulu kechi bakeba shayuka wa michi ne, poso aba bakolwa.”—Mateo 9:12.

BYAMBA BANTU Bamo batundaika bantu umvwe babela kuya ku ba milombelo pa kuba’mba babukwe kukila kutoma michi.

BYAMBA BAIBOLO Mu kimye kya kala Lesa waswishishe bashayuka ba michi kubuka bantu banji. (Ntendekelo 38:28; Kolose 4:14) Baibolo kechi umweshapo amba Lesa wakanyanga bantu kubukwa kwingijisha michi kufuma ku bichi, na biji ya kwishinga, ya kijiika ne ikwabotu ne. Kabiji Yesu naye waambile amba “Bantu batuntulu kechi bakeba shayuka wa michi ne, poso aba bakolwa.”—Mateo 9:12.

Pano bino, Baibolo kechi uswisha mashinda onse a kubukilwamo ne. Kyakumwenako, Baibolo ukanya bantu kubukwa kupichila mu kuya ku ba milombelo ba mu ano moba. Kabiji kubukwa kwavwangamo kwingijisha mipashi kechi kwaswishiwa na Lesa ne. (Ngalatiya 5:19-21) Kukila kulondela mashinda a kubukilwa akanya Baibolo, kintu kyawama kuba inge mwakolwa ke kusala jishinda jawama kubukilwamo bukiji bukiji, inge kyakonsheka.

[Tubyambo twa mushi]