BYAMBAPO BAIBOLO
Bulalelale
Nanchi bulalelale bwatama nyi?
‘Kino kyo kyaswa muchima wa Lesa amba muchine bulalelale.’
BYAMBA BANTU Mu bisho bimo, baswisha bantu bakoma kuba bulalelale. Kabiji mu mapunzha amo bamona’mba kijitu bulongo banyike kuba bulalelale.
BYAMBA BAIBOLO Baibolo wingijisha kyambo kya “bulalelale” pa kwamba pa kwilaala kwa bantu babula kwisongola. Lesa ukeba kuba’mba bapopweshi banji ‘bachinenga bulalelale.’ (1 Tesalonika 4:3) Bulalelale ke mambo akatampe byonka biji bukende, kupopwela mipashi, kupendwapendwa, kupopwela bankishi, bumbanzhi ne bwivi.—1 Kolinda 6:9, 10; Lumwekesho 21:8.
ENE MAMBO O KYANEMENA Kishinka kimo kitujimunako Baibolo ke kya kuba’mba, “Lesa ukazhachisha aba boba bulalelale.” (Bahebelu 13:4) Kyakilamo mukunema ke kya kuba’mba kupichila mu kukokela mizhilo ya Lesa yaamba pa bulalelale, tumwesha kuba’mba twamutemwa Yehoba Lesa. (1 Yoano 5:3) Kino kilengela Lesa kupesha boba bakokela mikambizho yanji.—Isaya 48:18.
Nanchi Kyatama Bantu Babula Kwisongola Kwimwesha Butemwe Kupichila mu Byubilo Bileta Milanguluko ya Kwilaala Nyi?
“Kwambanga pa bulalelale ne bubipisho bonse nangwa lwiso mukachi kenu ne.”—Efisesa 5:3.
BYAMBA BANTU Bantu bavula balanguluka kuba’mba nangwa kwilaala kwa bantu babula kwisongola kwatama, pano bino, bamba’mba kwimwesha butemwe kupichila mu byubilo bileta milanguluko ya kwilaala kechi kwatama ne.
BYAMBA BAIBOLO Pa kwamba pa byubilo byatama, Baibolo kechi waambatu pa bulalelale ne, pano bino, waamba ne pa “bubipisho” ne “byubilo bya kwizozola.”(2 Kolinda 12:21) Onkao mambo, nangwa kya kuba bantu babula kwisongola kechi babena kuba bulalelale ne, kuji byubilo bikwabo bya kwimwesha butemwe bifichisha Lesa ku muchima inge ke bebyube.
Kishinka kyaambapo Baibolo pa mambo a kwilaala ke kya kuba’mba, bantu bafwainwatu kuba bino ke bamulume ne mukazhi kwapwa. Kabiji Baibolo wakanya “kusakasaka kwa lwiso kubindakanya muchima.” (1 Tesalonika 4:5) Pano nga kino kilumbulula ka? Kya kumwenako, bantu beipanguzha bakonsha kufuukulapo kubula kuba bulalelale, pano bino, saka boba byubilo bikwabo bya kwimwesha butemwa bileta milanguluko ya kwilaala. Kupichila mu kuba bino, babena kumwesha kuba’mba baji na lwiso lwa kukeba kuba kintu kyabula kwibafwainwa. Kino kimwesha kuba’mba babena kulenga mambo a “kusakasaka kwa lwiso kubindakanya muchima.” Baibolo wakanya kusakasaka kwa lwiso lwa kukeba kwilaala.—Efisesa 5:3-5.
Mwakonsha kuchinuzhuka byepi bulalelale?
“Chinai bulalelale.” —1 Kolinda 6:18.
ENE MAMBO O KYANEMENA Kwesakana na byaamba Baibolo, bantu boba bulalelale kechi batwajijila kwikala na bulunda na Lesa ne.—Kolose 3:5, 6.
BYAMBA BAIBOLO Baibolo wakambizha bantu ‘kuchina bulalelale.’ (1 Kolinda 6:18) Kino kilumbulula’mba muntu wafwainwa kuchinuzhuka bintu byonse byakonsha kumulengela kuba bulalelale. (Byambo bya Mana 22:3) Kya kumwenako, pa kuba’mba tutwajijile kwikala na byubilo byawama, kyanema bingi kuchinuzhuka kupwanañana na bantu balengulula mafunde a Lesa aamba pa kwilaala. Baibolo witujimunako amba: “Awa wenda na ba mana ukekala ke wa mana; pakuba awa wenda ne bakosama ukamona byakatazha.”—Byambo bya Mana 13:20.
Kulanguluka pa kwilaala kwakonsha kulengela muntu kuba bulalelale. (Loma 8:5, 6) Onkao mambo, kyawama kuchinuzhuka nyimbo, mavidyo, mabuku ne bintutu bikwabo bintundaika byubilo bya bulalelale bifichisha Lesa ku muchima.—Salamo 101:3.
[Kipikichala pa peja 13]