MUTWE WA PA NKUPIKO

Keyala wa pa Intaneti Wawama Bingi

TANGAI Baibolo mu milaka 50 ne mabuku alumbulula Baibolo mu milaka kukila pa 500.

TAMBAI mavidyo a mu milaka ya kwamba na maboko yafika ku 70.

KEBAI byambo ne bintu bikwabo pa uno keyala mu milaka yavula bingi.

TELEKAI ku bifwanyikizho bya mawitu bilumbulula bintu byawama byamwekele kala byanembwa mu Baibolo.

MONAI mashimikila amwesha byubilo ne bwikalo bwa bantu banembwa mu Baibolo.

TAMBAI bifwanyikizho bya mu Baibolo ne mavidyo akonsha kwimukwasha kuyuka bya kuba na makatazho a mu bwikalo.

KOPOLOLAI kyatutu mabuku a pa intaneti, bibaba bya mu magazini, ne maselechi a mawitu.

PESA PESAINGA mitwe ya pusana pusana kwingijisha BUTALA BWA MABUKU PA INTANETI buji na mabulañano mu milaka kukila pa 100.

BAJI MU MASONGOLA

“Nkeba kuba’mba kisemi kyami kikalenga bulongo. Amiwa ne mukazhami tupita mu makatazho mu masongola etu, kabiji ano makatazho abayijileko kimye kyo twaikele na baana. Onkao mambo, tubena kukeba bukwasho”

BAIBOLO WAAMBA’MBA:

‘Nzubo beishimika na maana, kabiji beikajika na milangwe.’—Byambo bya Mana 24:3.

BIJI PA UNO KEYALA BYAKONSHA KWIMUKWASHA

• Kipungu kya kuba’mba “Baji mu Masongola ne Bansemi” kyakonsha kwimukwasha kuyuka bya kuba na makatazho nabiji a kuba’mba:

Bya kupwisha makatazho mu masongola mu mwaka mutanshi ye mwisongwelamo

Bya kwikala na bako

Kufunjisha baana

Kutoboka

Bya kuba na makatazho a mali

(Chintai panembwa’mba MAFUNJISHO A MU BAIBOLO > BAJI MU MASONGOLA & BANSEMI)

• Kintu Kilengela Kisemi Kwikala kya Lusekelo ke buku muji mitwe yavula bingi yaamba pa kisemi, kutatwila ku bya kunengezha masongola kufika ne ku bya kulama bansemi bakikulumpe.

(Uno buku naye mwakonsha kumutana pa www.jw.org inge mwachinta panembwa’mba MABUKU > MABUKU & MABULOSHUWA)

BANSEMI

“Kafwako kintu kyo nanemeka kukila baana bami ne. Mbena kukeba kuba’mba inge bakoma bakelamenga bulongo”

BAIBOLO WAAMBA’MBA:

“Umvwe wafunjisha mwana kwenda mu jishinda jafwainwa, kechi ukafumamo byo akakoma ne.”—Byambo bya Mana 22:6.

BIJI PA UNO KEYALA BYAKONSHA KWIMUKWASHA

• Mu kipungu kya kuba’mba “Baana” muji mashimikila amwesha byubilo ne bwikalo bwa bantu banembwa mu Baibolo, bya kutana mikumbu pa kipikichala, mavidyo ne mafunjisho a mu Baibolo akonsha kwimukwasha kufunjisha baana benu . . .

kwikala na lukokelo

kwikala na lusa

bya kumvwañana na bakwabo

kwaamba’mba “nasanta”

(Chintai panembwa’mba MAFUNJISHO A MU BAIBOLO > BAANA)

• Buku Wami wa Mashimikila a mu Baibolo ne Fundai ku Mufunjishi Wayukisha ke mabuku muji bipikichala byawama kabiji anengezhiwa bulongo kuba’mba mufunjishengamo baana benu.

(Ano mabuku nao aji pa intaneti pa www.jw.org. Chintai panembwa’mba MABUKU > MABUKU & MABULOSHUWA)

BANYIKE

“Mbena kukeba bukwasho pa byo nafwainwa kuba na bintu biji nobe sukulu, bansemi, balunda nami ne babakazhi. Kechi nkiji mwanyike ne, onkao mambo nkeba amba nefuukwilenga bya kuba amiwa mwine”

BAIBOLO WAAMBA’MBA:

“Muchima wobe akusangajike mu moba a bwanyike bobe.”—Musapwishi 11:9.

BIJI PA UNO KEYALA BYAKONSHA KWIMUKWASHA

• Mu kipungu kya kuba’mba “Banyike” muji bibaba ne mavidyo byakonsha kwimukwasha . . .

inge mwabula ba kwisamba nabo

inge muji na makatazho pa sukulu

inge mwalala muzhilo wa pa nzubo

inge ke bemukatazhe ku bakulumpe nangwa inge muntu ke emukanjikizhe amba mwilaale nanji

(Chintai panembwa’mba MAFUNJISHO A MU BAIBOLO > BANYIKE)

• Buku wa mu Kizungu wa kuba’mba Questions Young People Ask—Answers That Work, volyumu 1 ne 2 uji na mikumbu ya mepuzho epuzha banyike javula.

(Uno buku naye mwakonsha kumutana pa intaneti pa www.jw.org. Chintai panembwa’mba MABUKU > MABUKU & MABULOSHUWA)

BABENA KUKEBA KUFUNDA BAIBOLO

“Nkeba bingi kufunda Baibolo. Pano nafwainwa kuba byepi pa kuba’mba mfunde?”

BAIBOLO WAAMBA’MBA:

“Binembelo byonse byanembelwe na lutangijilo lwa mupashi wa Lesa kabiji byo byawamina kwibafunjisha bantu.”—2 Timoti 3:16.

BIJI PA UNO KEYALA BYAKONSHA KWIMUKWASHA

• Baibolo wa Binembelo bya Ntanda Ipya uji mu milaka yapusana pusana watuntululwa bingi bulongo kabiji wapela kutanga.

(Chintai panembwa’mba MABUKU > BAIBOLO)

• Mu kipungu kya kuba’mba “Mepuzho a mu Baibolo Akumbulwa” muji mikumbu ya mepuzho nabiji a kuba’mba “Ki ka kyubiwa kwi atweba inge twafwa?” ne “Yesu Wasemenwe Ñanyi Kimye?”

(Chintai panembwa’mba MAFUNJISHO A MU BAIBOLO > MEPUZHO A MU BAIBOLO AKUMBULWA)

• Mwakonsha kulomba lufunjisho lwa Baibolo lwatutu inge mwachinta panembwa’mba “Lombai Lufunjisho lwa Baibolo.”

(Chintai panembwa’mba Ntatwilo apa bino muchinte pa kamutwe ka kuba’mba “Lombai Lufunjisho lwa Baibolo”)

“Nalekele kutanga Baibolo mambo kechi naumvwanga byo natanganga ne. Pano kimye kyo natendekele kufunda Baibolo kwingijisha buku wa kuba’mba ‘Nanchi Baibolo Kine Ufunjisha’mba Ka?’ nakuminye bingi pa kumona Baibolo byo apela kumvwa.”—Christina.

NANCHI MUJI NA MEPUZHO PA BAKAMONYI BA KWA YEHOBA NYI?

• Kipungu kya kuba’mba “Mepuzho o Bepuzha Javula” kyakumbula mepuzho epuzha bantu javula pa Bakamonyi ba kwa Yehoba, nabiji a kuba’mba “Mambo ka o muyila na kusapwila bantu baji na bupopweshi kala?” ne bwa kuba’mba “Mali o mwingijisha afuma pi?”

(Chintai panembwa’mba bakamonyi ba kwa yehoba > MEPUZHO O BEPUZHA JAVULA)

Pa juba pa juba, bantu nobe 700,000 bengijisha keyala wa jw.org. Ne anweba mwakonsha kwingijisha uno keyala