Bukapondo

Lesa umona byepi bukapondo?

BYAMBA BANTU

Bantu bavula, kubikapotu ne boba baya ku machechi, balanguluka’mba kijitu bulongo kuba bukapondo inge bakuzhingijisha. Kabiji bantu bavula bingi balanguluka’mba bya kisangajimbwe bya pa televizhonyi ne mafilimu muji bya bukapondo bijitu bulongo.

BYAMBA BAIBOLO

Kwipi na muzhi wa Mosul uji ku buyeke bwa Iraq, kuji bikulukulu bya muzhi wabayile bingi wa Ninevwa, muzhi mukatampe mu Bufumu bwa bena Asilya. Nangwa kya kuba mu uno muzhi mwajinga bingi busulu, Baibolo waambijile jimo amba Lesa “ukalula Ninevwa, ke masala.” (Zefwaniya 2:13) Lesa waambile’mba: “Nkakulengela kwikala ke kintu kya kutamba.” Mambo ka? Mambo Ninevwa wajinga “muzhi wichila mashi.” (Nahumi 1:1; 3:1, 6) Kabiji Salamo 5:6 waamba’mba: “Yehoba washikwa bambanzhi.” Bikulukulu bya muzhi wa Ninevwa bimwesha’mba Lesa waubile byonka byo aambile.

Mulwanyi mukatampe wa Lesa ne bantu, aye Satana Diabola ye mwine shanja bukapondo, kabiji Yesu Kilishitu wamutelele’mba “mbanzhi.” (Yoano 8:44) Kikwabo, na mambo a kuba “pano pa ntanda ponse paji mu bulume bwa kwa aye mubi,” byubilo byanji bimwekela mu byuba bantu pa bukapondo, kubikapotu ne bukapondo bumwekela mu byambo bya pa mwela ne mu mapepala a byambo. (1 Yoano 5:19) Pa kuba’mba tutokeshe Lesa ku muchima, twafwainwa kushikwa bukapondo ne kutemwa bintu Lesa byo atemwa.a Nanchi twakonsha kuba bino nyi?

“Yehoba . . . washikwa muntu yense watemwa bukapondo.” —Salamo 11:5.

Nanchi Bantu Boba Bukapondo Bakonsha Kuleka Nyi?

BYAMBA BANTU

Bukapondo bumweshatu muntu byo aji, kechi wakonsha kwikileka ne.

BYAMBA BAIBOLO

Mwafwainwa kutaya “bukaji, kuzhingila, bubi, mwenga ne ñambilo ya bunya.” Kabiji waamba ne kuba’mba: “Vuulai bumuntu bwa kala ne byubilo byabo, ne kuvwala bumuntu bupya.” (Kolose 3:8-10) Nanchi Lesa ubena kwitubuula kuba kintu kyakatazha nyi? Ine. Bantu bakonsha kupimpula byubilo byabo.b Bakonsha kuba byepi bino?

Kitanshi, muntu wafwainwa kutendekelapo kuyukisha bulongo Lesa. (Kolose 3:10) Inge muntu uji na muchima wa kukeba kuyuka Lesa wayuka byubilo byawama biji na Mulenga ne mizhilo yanji, po po atemwa Lesa ne kukeba kumutokesha ku muchima.—1 Yoano 5:3.

Kya bubiji ke kusala bantu ba kupwanañana nabo. Baibolo waamba’mba: “Kange wendenga na muntu wa kizhingijisha nangwa kupwanañana na yewa uzhingilazhingila ne, pa kuba’mba ukabule kufunda byubilo byanji ne kwita kitewa obe mwine.”—Byambo bya Maana 22:24, 25.

Kya busatu ke milangwe. Mwafwainwa kuyuka kuba’mba kyubilo kya bukapondo kimwesha’mba muntu kechi wikanya ne. Bantu bakeba kwikala mu mutende baji na muchima wa kwikanya. Byambo bya Maana 16:32 byaamba’mba: “Awa ubanda kuzhingila wawama kukila kitonzhi.”

“Kebeshainga kwikala mu mutende na bantu bonse.”—Bahebelu 12:14.

Nanchi bukapondo bukapwa nyi?

BYAMBA BANTU

Bukapondo bwatendekele kala kabiji kechi bukapwa ne.

BYAMBA BAIBOLO

“Kwashalatu pacheche, babi kechi bakekalako ne . . . Pakuba bakimote bakaswana ntanda, kabiji bakasangalelanga mu kuvula kwa mutende.” (Salamo 37:10, 11) Pa kuba’mba akapulushe bakimote ne bantu balondalonda mutende, Lesa ukonaunauna bonse batemwa bukapondo byonka byo aonawine muzhi wa Ninevwa. Inge wauba bino, bukapondo kechi bukekalako jibiji ne.—Salamo 72:7.

Onkao mambo, kino kyo kimye kya kukeba bibusa bya Lesa kupichila mu kulondalonda mutende. 2 Petelo 3:9 waamba’mba: “Yehoba . . . kechi usaka muntu nangwa umo amba akafwe ne, bino ukeba’mba bonse balapile.”

“Bakabundanga mapoko abo ne kwialula ke bya kujimako ne mafumo abo bakealula ke a kukopawilako misampi.”—Isaya 2:4.