MUTWE WA PA NKUPIKO | NANCHI MUJI NA BULUME PA BUMI BWENU NYI?
Lukatazho: Bintu byo Mwakonsha Kubula Kwalula
NANCHI mukolwa kikola kibula kupwa, mwikana na benakwenu nangwa mwafwisha mulongo wenu nyi? Inge ke mupite mu makatazho o mwakonsha kubula kwalula, kafwako kyo mwakonsha kuba ne, bino mwakonsha kukeba’mba ano makatazho apwe. Mwakonsha kuba byepi pa kuba’mba mwikale na lusekelo mu bwikalo bwenu?
WA KUMWENAKO WA MU BAIBOLO: PAULO
Mutumwa Paulo waendanga kuya kwalepa byo ajinga mishonale wa mukoyo mu myaka kitota kitanshi. Bino walekele kwenda kimye kyo bamukashijile mu nzubo saka bamusopa ku bashilikale pa myaka ibiji. Mu kifulo kya kulefulwa, Paulo watele muchima ku bintu byo akonsheshe kuba. Waingijishenga Baibolo kukwasha ne kukosesha bonse bamufwakashijilenga. Wanembele ne makalata avula aikala luno ke lubaji lwa Baibolo.—Byubilo 28:30, 31.
BYUBA ANJA
Byonkatu byo baamba mu kibaaba kitanshi, Anja wikalatu pa nzubo. Waamba’mba, “Bintu byonse mu bwikalo bwami byaaluka na mambo a kikola kya kansa. Kechi nkeba’mba kino kikola kibayileko ne, onkao mambo kechi ñingila nkito nangwa kuba bintu bikwabo bya mu bwikalo ne.” Anja uba byepi pa luno lukatazho lo akonsha kubula kwalula? Waamba’mba, “Kyankwashishe ke kwalula bya kuba mu bwikalo. Ngubatu bintu byanema mu bwikalo bwami kabiji byo nakonsha kuba. Kino kindengela kumvwa’mba nji na bulume bwa kuba bintu mu bumi.”
“Nafunda kala kusekela mu bintu byonka byo nji nabyo, kechi na mambo a bwikalo bwami byo buji ne.”—Byambo bya kwa Paulo biji mu Filipai 4:11.
BYO MWAKONSHA KUBA
Inge muji na lukatazho lo mwakonsha kubula kwalula mu bwikalo, esekai kuba bino:
Teshai muchima pa bintu byo mwakonsha kuba. Kya kumwenako, kechi mwakonsha kwikala na bulume pa kikola kyenu ne, bino mwakonsha kubako makayo akosesha mubiji, kuja kajo kawama ne kukokoloka kimye kyabaya.
Salai bintu byo mwakonsha kuba mu bwikalo. Monai jishinda jo mwakonsha kwibyubilamo pachepache. Pa juba pa juba, ubaingako pachepache bintu bikemukwasha kufikizha bikonkwanyi byenu.
Ingilaingako mingilo yabula kukosesha yakonsha kwimulengela kumvwa’mba muji na bulume. Nabiji kuwamisha mu kibamba mo mutekela ne kovwako masanyi. Mwekainga bulongo. Tendekelaipo kwingila mingilo yanema lukelo.
Langulukainga pa bintu byawama bifuma mu byo muba. Kya kumwenako, nanchi lukatazho lo muji nalo lwimulengela kuyuka mwakwikela na lolo lukatazho nyi? Nanchi mwakonsha kwingijisha ano maana kukwashako bakwenu nyi?
Kishinka: Kechi mwakonsha kwalula lukatazho lo muji nalo ne, bino mwakonsha kuyuka mwakubila na lolo lukatazho.