Nshingo Ya Lunyeu

BASHAYUKA bengila na byela ne bya kulengalenga bakumya bingi pa kumona lunyeu byo ashikula bintu byanema kukila mubiji wanji. Bakebelenga kuyuka lunyeu byo oba bino. Onkao mambo, bashayuka pa sukulu mukatampe wa Ohio State University, U.S.A., balengele bipashañano bya nyeu pa kompyuta, kwesakana na byonka bimwekatu lunyeu, binungwa byanji ne byo enda. Pa kulenga bino bipashañano, baingijishe munkinyi wa X-ray pa kukopa lunyeu ne binungwa byanji bya mukachi, apa bino bapima ne bulume bo engijisha pa shikula bintu.

Nshingo ya lunyeu imukwasha bingi kushikula bintu byanema. Mishipeshipe ya mu nshingo ya lunyeu idonsa ne kwikasa na mubiji ne na mutwe, byonkatu muntu byo oba minwe yanji inge wavunga kuboko. Shayuka umo waambile’mba: “Kuno kwikasa kwa mishipeshipe ne mubiji kwanema pa kuba’mba nshingo ya lunyeu ingile bulongo.” Bashayuka bamba’mba: “Kwikasa kwa mishipeshipe yanekena na mubiji wakosakana kyamweka ko kulengela nshingo kwikala na bulume ne kushikula bintu byanema.” Bashayuka baketekela’mba inge bayuka bulongo kilengela nshingo ya lunyeu kwingila mu jino jishinda, kikebakwasha kulenga minkinyi yakatataka ikashikulanga bintu byanema bingi.

Mwalangulukapo’mba ka? Nanchi nshingo ya lunyeu, ne bulume bwanji bwa kushikula byanema byaishilekotu nyi, inyi byalengelwe?