Boya bwa Kasabushi

BANYAMA ba mu mema bavula baji na kikoba kyajita kiji na mafuta kilengela mubiji kutwa kyuya. Kasabushi kaji na boya bwavula bwikalengela kumvwa kyuya.

Langulukai pa Kino: Boya bwa kasabushi bwavula bingi kukila boya bwa banyama bakwabo ba mu mema. Inge kano kanyama kaibila mu mema, mwela wikala mukachi ka boya pa kikoba. Uno mwela ulengela kano kanyama kutwajijila kumvwa kyuya mambo mema a munyango kechi afika pa kikoba ne.

Bashayuka bamba’mba twakonsha kufunjilako bintu byavula bingi ku boya bwa kasabushi. Kabiji babena kweseka kulenga bivwalo bya boya byapasha boya bwa kasabushi. Bashayuka bamba’mba, “kulepa ne kushinkakana kwa boya kulengela kano kanyama kubula kutwezha mema.” Kishinka ke kya kuba’mba, kasabushi kaji na boya bwavula kukila banyama bakwabo ba mu mema.

Bashayuka bamba’mba, kufunda biji boya bwa kasabushi kukebalengela kulenga bivwalo bibula kutwezha mema. Bantu babena kulanguluka’mba inge balenga bya kuvwala bibula kutwezha mema biji nobe boya bwa kasabushi, bikakwasha bingi bantu baya pa mema.

Mwalangulukapo’mba ka? Nanchi boya bwa kasabushi bwikalengela kumvwa kyuya bwaishilekotu nyi, inyi bebulengele?