Bintu Byafwainwa Kwitukwasha Kusekela na byo Tuji Nabyo

Ingilainga na Ngovu

“Engile na ngovu, ne kwingila mingilo yawama na maboko anji kuba’mba amwenemo byawama bya kupapo wakajilwa.”—EFISESA 4:28.

Mulenga wetu ukeba’mba tutemwe kwingila. Mambo ka? Mambo muntu wingila na ngovu wikala na lusekelo ne kwikala na bintu bya kwikwashishamo aye mwine ne kisemi kyanji. Kabiji wakonsha ne kupapo bintu bakwabo bakajilwa. Bakulumpe ba nkito nabo bamutemwa bingi. Muntu yense wingila na ngovu kechi bamupanga nkito ne. O ene mambo Binembelo o byaambila pa bintu byawama bifuma mu kwingila na ngovu amba “kya bupe kyafuma kwi Lesa.”—Musapwishi 3:13.

Ikalai Bakishinka

“Twaketekela’mba tuji na jiwi ja mu muchima ja kishinka, byo tukebesha kwikala ba kishinka mu bintu byonse.”—BAHEBELU 13:18.

Inge twibakishinka, tukakasuluka bingi mu muchima, kechi tukekala na bijikila ne. Kabiji tukalaalangatu soko. Bakwetu nabo baketuketekela bingi ne kwitunemeka. Pakuba babula bukishinka befwa nshiji bene. Mambo jiwi ja mu muchima jibakatazha bingi ne kwakamwa’mba juba jimo bantu bakebayuka’mba kechi bakishinka ne.

Kange Mutemwe Bingi Mali mu Bwikalo Bwenu Ne

“Mwikale babula kutemwa mali, sekelainga mu bintu byonka byo muji nabyo.”—BAHEBELU 13:5.

Mali etukwasha kupotamo kajo ne bintutu bikwabo. Pano bino, “kutemwa mali” kwatama bingi. Mambo muntu watemwa bingi mali wingijisha kimye kyanji kyonse ne bulume bwanji kukebangatu mali avula. Na mambo a kuba’mba wingila bingi amba ekale na mali avula, bulunda bwanji na mwinakwanji bwakonsha kutama. Kabiji kechi wikalapo na kimye na baana banji ne. Kifumamo wakonsha ne kukolwa. (1 Timoti 6:9, 10) Kabiji muntu watemwa bingi mali wakonsha ne kutendeka kuba bintu mu jishinda jabula bukishinka. Muntu umo wa maana wanembele’mba: “Muntu wa kishinka ukatambula mapesho avula, bino awa unonka bukiji kechi ukekala wabula mambo ne.”—Byambo bya Maana 28:20.

Salaipo Kufunda Kwafwainwa

“Lama maana alumbuluka ne maana a kupima bintu.”—BYAMBO BYA MAANA 3:21.

Sukulu wawama bingi mambo witukwasha kwikala bantu bawama kabiji bansemi bafikilamo bulongo pa kuba bintu. Pano bino, kufundatu ku mubiji kechi ko konkatu kwitukwasha kwikala na bintu ne kwikala na lusekelo ne. Inge tukeba kubanga bulongo mu bintu byonsetu byo tuba mu bwikalo bwetu, twafwainwa kuta muchima ku bitufunjisha Lesa. Binembelo byaamba pa muntu ukookela Lesa amba: “Bintu byonse byo oba bikalumbuluka.”—Salamo 1:1-3.