Bwikalo Bwatendekele Kukatazha

BA Adama ne Evwa byo bajinga pangye ya bujimi bwa Edena, bajinga na makatazho avula bingi. Bafwainwe kwingilanga na ngovu pa kuba’mba bekale na kajo. Mu kifulo kya kwikala na bichi bya bipangwa byawama, kwamenenenga miba ne nseku yavula. Kino kyo kibamwekejile ba Adama ne Evwa byo bamusatukijile Lesa ne kuleka kwikala ke balunda nanji.

Pano kyakijishemo kutama ke kya kuba’mba, ba Adama ne Evwa bafwile. Vuluka kuba’mba Lesa wibajimwine amba umvwe bakesulwe malwa ne kuja ku kyokya kichi kimo, bakafwa kine. Onkao mambo, jonkaja juba jo bajiileko jo jo bafwile. Byo bajingapo bambulwamaana pa kubula kumvwina Lesa!

Baana bonse ba kwa Adama ne Evwa basemenwe kimye Lesa kyo afumishe bansemi babo mu bujimi bwa Edena. Kino kibena kulumbulula’mba baana nabo bakonsheshe kukota ne kufwa.

Umvwe ba Adama ne Evwa baji bakokejile Yehoba, inge baikele na lusekelo pamo na baana babo. Bonse bakonsheshe kwikala ba lusekelo panopantanda myaka ne myaka. Kafwako nangwa umo wakonsheshe kukota, kubela nangwatu kufwa ne.

Lesa ukeba bantu kwikala ba lusekelo myaka ne myaka, kabiji walaya’mba kulutwe na lwendo bakekala ba lusekelo. Ino ntanda yonse kechi ikekalatu yawama kwapwa ne, bino bantu bonse bakekala na butuntulu bwa mubiji bwawama. Kabiji yense muntu panopantanda ukekala mulunda wawama na bantu bonse ne na Lesa.

Bino Evwa wakankelwe kwikala mulunda na Lesa. Onkao mambo, pa kusema baana, waikelenga na misongo. Byo asatukijile Yehoba, kine kyamuletejile bingi bulanda, ke ibyo nenyi?

Ba Adama ne Evwa bajinga na baana ba balume ne ba bakazhi bavula bingi. Kimye kyasemenwe mwanabo wa mulume mubeji, bamutumbile jizhina amba Kaina. Mwanabo wa mulume ndondela-mubeji bamutumbile amba Abela. Ki ka kibamwekejile? Nanchi wayuka nyi?