Kufuma Kimye kya Muyulo Kufika mu Kimye kya Kupokololwa mu Ijipita

Bantu batanu na basatu bo bonkatu bapulukile mu Muyulo, bino byo papichile myaka yavula bantu bananukile ke biumbi byavula. Abalahama naye waishile kusemwa panyuma ya kupitapo myaka 352 kufuma kimye kya Muyulo. Tufunda Lesa byo afikizhe mulaye ye alayañene na Abalahama kupichila mu kumupa mwana wamulume wa jizhina ja Izaka. Kabiji pa baana babiji basemene Izaka, Lesa wasalulwilepo Yakoba.

Yakoba wajinga na baana babalume 12 ne baana babakazhi. Baana babalume jikumi ba kwa Yakoba bashikilwe bingi nkasabo Yosefwa kabiji bamupoteshe mu buzha mu Ijipita. Palutwe kacheche Yosefwa waikajile ndamakyalo wanemene bingi mu Ijipita. Byo kwaishile kipowe kya nzala, Yosefwa waesekele balongo banji kuba’mba amone inge kya kuba bapimpwile michima yabo. Kyapeleleko kisemi kyonse kya kwa Yakoba, ko kuba’mba bena Isalela, bavilukijile mu Ijipita. Kino kyamwekele saka papita myaka 290 kufuma kimye kyasemenwe Abalahama.

Bena Isalela baikajile mu Ijipita myaka 215 yalondejilepo. Yosefwa byo afwile, baalukile ke bazha. Mu kupita kwa kimye Mosesa wasemenwe, kabiji Lesa wamwingijishe kupokolola bena Isalela mu Ijipita. Bino byonse byamwekele mu myaka 857, byaambiwapo mu Kipungu kya BUBIJI.