Yakoba Wayile ku Halana

NANCHI wibayuka bano banabalume babena kwisamba ne Yakoba nyi? Panyuma ya kwenda moba avula bingi, Yakoba wibataine pa mushima. Basopelenga mikooko yabo. Yakoba wibashikishe’mba: ‘Anweba mufuma pi?’

Baambile’mba: ‘Atweba tufuma ku Halana.’

Yakoba wibepwizhe’mba: ‘Mwamuyuka Labanyi nyi?’

Bakumbwile’mba: ‘Ee. Aki talai, mwananji Lechela au wiya na mikooko.’ Abya wamumona Lechela pa kipikichala saka eya na mikooko nyi?

Yakoba byo amwene Lechela na mikooko ya bamwisho wanji ba Labanyi, wayile ne kukalumunapo jibwe pa mushima kuba’mba mikooko itome mema. Kepo Yakoba amufyompele Lechela ne kwilumbulula. Lechela watemenwe bingi, ne kuya ku muzhi na kukabula bashanji ba Labanyi.

Labanyi wakebeshe bingi kwikala na Yakoba. Kabiji Yakoba byo amubujile Labanyi amba ukeba kusongola Lechela, Labanyi watemenwe bingi. Nangwa byonkabyo, wamwambijile Yakoba amba pa kusongola mwananji Lechela wafwainwe kwingila mu bujimi bwa kwa Labanyi myaka itanu na ibiji. Na mambo a kuba Yakoba wamutemenwe bingi Lechela, waingijile ino myaka. Pano bino kimye byo kyafikile kya masongola, nanchi wayuka kyamwekele nyi?

Labanyi wapaine mwananji wa mukulumpe aye Liya kwi Yakoba mu kifulo kya kumupa Lechela. Yakoba byo aswile kumwingijila Labanyi myaka ikwabo itanu na ibiji, Labanyi wamupele ne Lechela kwikala mukazhanji. Mu oa moba Lesa waswishishe bantu kusongola mpaji. Pano luno, byonka Baibolo byo aamba, mwanamulume wafwainwa kwikalatu na mukazhi umotu kwapwa.