Ndamakyalo Watama Walamine Ijipita

ABANO banabalume babena kukanjikizha bantu kwingila. Akitala mwanamulume ubena kupuma wa mingilo umo na kikote! Bano bamingilo ke ba mu kisemi kya kwa Yakoba, kabiji batelwanga’mba bena Isalela. Kabiji banabalume babena kwibakanjikizha kwingila ke bena Ijipita. Bena Isalela baalukile ke bazha babena Ijipita. Kino kyaubiwe byepi?

Pa myaka yavula, kisemi kikatampe kya kwa Yakoba kyaikajile bingi bulongo mu Ijipita. Yosefwa, awo wajinga kinemanga mu Ijipita kabiji wa kibiji kwi mfumu Felo, wibalaminenga bingi bulongo. Bino Yosefwa wafwile. Kabiji Felo ungi wabujile kutemwa bena Isalela ye wapingilepo ke mfumu mu Ijipita.

Uno Felo watama waalwile bena Isalela ke bazha. Kabiji watongwele banabalume bashinta kwikala bakapitao babo. Bakanjikizhenga bena Isalela kwingila kyakosa kushimika mizhi ya kwa Felo. Nangwa byonkabyo bena Isalela batwajijiletu na kuvujilako. Byo papichile myaka yavula bena Ijipita baubile moyo amba bena Isalela bakavula ne kwikala bakosa.

Abya wayuka Felo byo aubile nyi? Wabujile basemeshi bakwashishenga banabakazhi bena Isalela mu kimye kya kupapa amba: ‘Inge wasemwa wa mulume mukamwipaye.’ Bino bano banabakazhi bawamine bingi michima, kabiji kechi baipayilenga baana ne.

Onkao mambo Felo wakambizhizhe bantu banji bonse amba: ‘Mwana wa mulume yense ukasemwa mukamwipaye. Bino yense wa mukazhi mukamuleke na bumi.’ Nanchi kino kintu kyo akambizhizhe kechi kyatamine nenyi? Twaya tumone mwana wamulume umo byo apulukile.