Ba Mosesa ne Alona Bamonañene ne Felo

MOSESA byo afikile ku Ijipita wabujile kolojanji aye Alona bya kukumya byonse. Kabiji Mosesa ne Alona byo bamwesheshe bena Isalela bino bya kukumya, bantu bonse baitabile’mba Yehoba wajinga nabo.

Kepo Mosesa ne Alona bamusolomokele Felo. Bamwambijile’mba: ‘Yehoba, Lesa wa bena Isalela waamba bino amba: Uleke bantu bami baye lwendo lwa moba asatu, bakaye na kumpopwela mungyetu.’ Bino Felo wakumbwile’mba: ‘Kechi namuyuka Yehoba ne, kabiji kechi nakonsha kukasulula bena Isalela amba baye ne.’

Felo wazhingijile, mambo bantu bakebelenga kimye kya kuleka kwingila ne kuya na kupopwela Yehoba. Onkao mambo wibakanjikizhe kwingila mwingilo wakosa bingi. Bena Isalela batendekele kwijizhañanya’mba Mosesa ye walengela’mba betumanyikenga bino, ne Mosesa waumvwine ku muchima kutama. Bino Yehoba wamubujile kubula kwikala na bijikila. Yehoba waambile’mba: ‘Nkalengela Felo akaleke bantu bami bakaye.’

Mosesa ne Alona bayile kwi Felo jibiji. Pa kino kimye baubile kya kukumya. Alona watayile kamama panshi, kabiji kaalukile ke muloolo mukatampe. Bino bantu ba maana ba kwa Felo nabo batayile tumama twabo panshi, ne kwaluka twaalukile ke miloolo. Pano mona! Muloolo wa kwa Alona ubena kumina miloolo ya ba maana. Nangwa byonkabyo Felo kechi wakasulwileko bena Isalela amba baye ne.

Onkao mambo kimye kyafikile kya kuba’mba Yehoba amujimune Felo. Nanchi wayuka byo amubile nyi? Wamubilekyo kupichila mu kuleta myalo jikumi, nangwa’mba malwa akatampe mu Ijipita.

Panyuma ya kuleta myalo yavula, Felo watumine Mosesa ne kumwambila’mba: ‘Lekesha mwalo, ne amiwa nsakukasulula bena Isalela baye.’ Bino umvwe mwalo wapita, Felo naye waalwilenga milanguluko yanji. Kechi walekele bantu amba baye ne. Bino panyuma ya mwalo wa bujikumi Felo wakasulwile bena Isalela.

Nanchi ino myalo jikumi wiiyuka nyi? Zhikula peja yalondelapo tufunde ino myalo.