Banabakazhi Babiji Bachinchikile

BENA Isalela byo baikele na makatazho, bamujijile Yehoba. Yehoba wibakumbwile kupichila mu kwibapa bantangi ba maana kuba’mba bebakwashe. Baibolo utela bano bantangi amba mitonyi. Yoshua ye wajinga mutonyi mutanshi, kabiji bamitonyi bamo baishile panyuma yanji bajinga ba Otoniela, Ehuda, ne Shamagala. Bino bantu bakwabo babiji bakwashishe bena Isalela bajinga banabakazhi ba Debola ne Yaela.

Debola wajinga ngauzhi wa mukazhi. Yehoba wamubujile pa bikamweka kimye kya kulutwe, kepo ne aye abujile bantu byaambile Yehoba. Kabiji Debola wajinga mutonyi. Waikelenga munshi ya kichi kya kisonga mu kyalo kya mitumba, kabiji bantu baishilenga kwi aye amba ebakwashe na makatazho abo.

Pa kyokya kimye Yabina ye wajinga mfumu mu Kenana. Wajinga na makalaki a nkondo 900. Nzhita yanji yakosele bingi kya kuba bena Isalela bavula bebakanjikizhe kwikala bakalume ba kwa Yabina. Mukulumpe wa nzhita ya kwa Mfumu Yabina wajinga Sisela.

Juba jimo Debola waichile Mutonyi aye Balaka ne kumwambila’mba: ‘Yehoba ubena kukukambizha’mba: Yanga ukebakonkanye banabalume 10,000, bapwile konka ku Mutumba wa Tabola. Konkakwa amiwa nkaleta Sisela kwi obewa. Kabiji nkakupa lushinjilo pe aye ne nzhita yanji pamo.’

Balaka waambijile Debola amba: “Umvwe mwaswa kuya pamo ne amiwa, kyawama nkaya.” Debola wayile nanji, bino wamwambijile Balaka amba: ‘Munema kechi ukeya kwi obewa ne, mambo Yehoba ukamupana Sisela mu kuboko kwa mwanamukazhi.’ Ne kwikala byo byo kyaikele.

Balaka waikijile ku Mutumba wa Tabola na kunangijila bashilikale ba kwa Sisela. Ponkapotu Yehoba waletele muyulo, kabiji ne bashilikale bavula bajinga balwanyi batomejile. Bino Sisela wapatukile pa kalaki wanji ne kunyema.

Palutwe kacheche, Sisela waishile ku tente wa kwa Yaela. Yaela wamutambulwijile ne kumutwezha mukachi ne kumupa mukaka. Kino kyalengejile’mba omvwe tulo, kabiji wabwela wakupukilwa ne mutulo. Ponkapo Yaela watolele lupopo wa tente ne kumupopa mu kilungi kya yewa muntu watamine. Palutwe kacheche, Balaka byo afikile, Yaela wamumwesheshe Sisela saka afwa kala. Pano wamona kuba’mba byaambile Debola byaishile kufikizhiwa.

Kyapeleleko Mfumu Yabina naye bamwipayile, kabiji bena Isalela baikele jibiji mu mutende pa kimye kimo.