Yehoshafwata Waketekejile Mwi Yehoba

NANCHI wibayuka bano banabalume ne byo baubilenga nyi? Bayilenga ku nkondo, kabiji banabalume baji kulutwe baimbilenga. Bino, wakonsha kwiipuzha’mba: ‘Mambo ka banyimbi o babujile kwikala na mapoko ne mafumo a kulwilako?’ Akitwaya tumone.

Yehoshafwata wajinga mfumu wa bisaka bibiji bya bena Isalela. Waikeleko mu moba amo aikejilemo Mfumu Ahaba ne Yezebeli ba mu bufumu bwa bisaka jikumi bwa ku kabeta ka ku buyeke. Bino Yehoshafwata wajinga mfumu wawama kabiji shanji, aye Asa naye wajinga mfumu wawama. Onkao mambo, pa myaka yavula bingi bantu ba mu bufumu bwa bisaka bibiji bwa ku kabeta ka ku bulenge baikele bingi bulongo.

Bino kwamwekele kintu kimo kyalengejile bantu moyo. Banabalume bamo baishile na kumwambila Yehoshafwata amba: ‘Jibumba jikatampe jafuma mu ntanda ya bena Moabu, bena Amonyi ne ba ku Mutumba wa Seila babena kwiya na kwimulwisha.’ Bena Isalela bavula bapwijile ku Yelusalema na kulomba bukwasho kwi Yehoba. Bayile ku nzubo ya Lesa kabiji konkakwa Yehoshafwata walombele’mba: ‘Anweba Yehoba Lesa wetu, kechi twayuka kya kuba ne. Kechi tuji na bulume bwa kulwa na jino jibumba ne. Twaketekela mwi anweba kuba’mba mwitukwashe.’

Yehoba waumvwine kabiji waambijile umo wa mu bakalume banji kubula bantu amba: ‘Kulwa kechi ko kwenu ne. Anweba kechi mukalwako ku ino nkondo ne. Mukemanetu, mukamone Yehoba byo akemupulusha.’

Juba jalondejilepo lukelo Yehoshafwata waambijile bantu amba: ‘Ketekelai mwi Yehoba!’ Kepo atangizheko ne banyimbi kulutwe ya bashilikale banji kabiji ne kwenda baendelenga saka bemba nyimbo ya kumutota Yehoba. Abya wayuka kyamwekele kimye kyo bafikile kwipi na balwanyi babo nyi? Yehoba wavulañenye nzhita ya balwanyi babo ne kwilwisha bene na bene. Kabiji bena Isalela byo bafikile, bataine balwanyi babo bonse bashilikale bafwa!

Nanchi Yehoshafwata kechi waubile kya maana kuketekela mwi Yehoba nenyi? Ne atweba tukekala ba maana umvwe twaketekela mwi Yehoba.