Kufuma mu Buzha mu Babilona Kuya na Kushimukulula Masakwa a Yelusalema

Bena Isalela byo bajinga mu buzha mu Babilona, lwitabilo lwabo lwaesekelwe bingi. Ba Shadalaka, Meshaka ne Abedenego batailwe mu kisha kya mujilo, bino Lesa wibafumishemo batuntulu. Palutwe kacheche panyuma ya kuba Babilona bamushinda ku bena Media ne bena Pelisha, Danyela bamutayile mu jiyengo ja mabokwe, bino Lesa wamuzhikijile kupichila mu kushinka tunwa twa mabokwe.

Kyapeleleko, mfumu wa bena Pelisha aye Kilusa wakuujile bena Isalela. Babwelele ku muzhi wabo panyuma ya kupitapo myaka 70 kufuma po bebatwajile mu buzha mu Babilona. Kintu kitanshi kyo baubile kimye kyo babwelele ku Yelusalema ke kutunga nzubo ya Yehoba. Nangwa byonkabyo, balwanyi bebalekeshe mwingilo wabo. Onkao mambo, bapwishishe kushimika nzubo ya Lesa panyuma ya kupitapo myaka 22 kufuma po babwelejile ku Yelusalema.

Kikwabo, tufunda pa lwendo lwa kwa Ezela lwa kubwela ku Yelusalema na kuwamisha nzubo ya Lesa. Kino kyaubiwe panyuma ya kupitapo myaka 47 kufuma papwijile nzubo ya Lesa. Kepo panyuma ya myaka 13 kufuma pa lwendo lwa kwa Ezela, Nehemiya wakwashishe kushimukulula masakwa a Yelusalema aonaikile. Kipungu kya BUTANU kyaamba pa myaka 152 mu bwikalo bwa bantu kufika ne mu ano moba.