Kitango 102

Kilishitu Watwelele mu Yelusalema na Lushinjilo

BYO bwakile pa Mulungu, Nisanyi 9, Yesu wafumineko ku Betani na baana banji ba bwanga ne kuya ku Mutumba wa Olebeta kunangijila ku Yelusalema. Mu kimyetu kicheche, bafikile kwipi na Betefaji waikejile ku Mutumba wa Olebeta. Yesu waambijile baana banji ba bwanga babiji amba:

“Yainga mu yewa muzhi ye mubena kumona kabiji musakutana mbongolo ye bakasa ne mwananji, mwibakasulule ne kwibaleta kwi amiwa. Umvwe muntu wimushikisha, mwafwainwa kumukumbula amba, ‘Nkambo ye wibakeba.’ Ne aye usakwimupabo.”

Nangwa kya kuba baana ba bwanga patanshi bakankelwe kukwatakanya amba ino mikambizho yafikizhenga bungauzhi bwa mu Baibolo, palutwe kacheche bakwatakenye. Ngauzhi Zekaliya waambijile jimo amba Mfumu wa Lesa watongolwa ukatwela mu Yelusalema saka akanjila pa mbongolo, ee kine “pa mwana mbongolo.” Mfumu Solomone naye waendele pa mwana mbongolo kimye kyo bamutongwele kwikala mfumu.

Baana ba bwanga byo batwelele mu Betefaji ne kusenda mwana mbongolo ne inanji, bamo baimene kwipi bebashikishe amba: “Mambo ka o mubena kubila kino?” Bino byo bebabujile amba Nkambo ye ubena kukeba bano banyama, aba banabalume bebalekele baana ba bwanga kutwala bano banyama kwi Yesu. Baana ba bwanga babikile bivwalo byabo bya peulu pa mbongolo mukazhi ne pa mwananji, bino Yesu waikele pa mwana mbongolo.

Yesu byo anangijilenga ku Yelusalema, jibumba jabayijilengako. Bantu bavula baanshikilenga bivwalo byabo bya peulu mu mukwakwa, pakuba bakwabo bachimawinenga misampi ku bichi ne kwiyanshika mu mukwakwa. Babijikilenga’mba: “Watokwa Awa Mfumu wishila mu jizhina ja Yehoba! Mutende mwiulu ne lukumo lwikale mwiulu mwine!”

Bafaliseo bamo mu jibumba bazhingijile pa byabijikilenga aba bantu ne kwijizhañanya kwi Yesu amba: “Mufunjishi, zhindamikaipo baana benu ba bwanga.” Yesu wibambijile’mba: “Nemwambila namba: Umvwe bano bazhindamepo, mabwe asakubijika.”

Yesu byo afikile kwipi na Yelusalema, wamwene muzhi ne kumujila amba: “Nanchi inge wayukile bintu byakonsha kukuletela mutende, pakuba bino bintu bebifya kwi obewa.” Na mambo a kubula lukokelo kwabo, Yelusalema wikapijilemo byonka byaambijile jimo Yesu amba:

“Balwanyi bobe [bena Loma batangijilwenga na Mukulumpe wa Bashilikale aye Titusa] po bakashimika nsakwa na bichi byasongoloka ne kukuzhokoloka ne kukulukuka konse konse, kabiji bakakonauna obewa ne baana bobe kabiji kafwako jibwe jo bakasha pa jibwe jikwabo ne.” Kuno konaunwa kwa Yelusalema Yesu ko aambilepo kwafikile mu 70 C.E. byo papichile myaka 37.

Bavula mu jibumba bamweneko Yesu byo asangwile Lazalasa. Bano babujilenga bakwabo akya kya kukumya kyo bamwene. Onkao mambo, Yesu byo atwelele mu Yelusalema, mu muzhi monse mwalukuchile. Bantu bashikishenga amba: “Nanchi uno muntu ye ñanyi?” Kabiji jibumba jibambijilenga amba: “Uno ke ngauzhi Yesu wa ku Nazala wa mu Ngalilea!” Bafaliseo byo bamwene kintu kyamwekelenga, bejizhañenye amba kafwako ne kyo tubena kuba ne. Baambile’mba: “Ba pano pa ntanda bonse babena kumulondela.”

Byonka byo akelwanga kuba umvwe waya ku Yelusalema, Yesu watwelele mu nzubo ya Lesa na kufunjisha. Monka muno mwaishile bampofu ne bilema, ne aye wibabukile. Bañanga bakatampe ne banembeshi bazhingijile bingi byo bamwene bintu bya kukumya byaubilenga Yesu ne byabijikilenga baana babacheche mu nzubo ya Lesa amba: “Twalomba namba, mupulushai Mwana Davida!” Bamushikishe amba: “Nanchi kechi ubena kumvwa bano byo babena kwamba nenyi?”

Yesu wibakumbwile amba: “Ee. Nanchi kechi mwatangapo amba: ‘Walengela tunwa twa baana babacheche ne balukeke kukutakaika’ nenyi?”

Yesu watwajijile kufunjisha kabiji watajile bintu byonse byajinga mu nzubo ya Lesa. Byo bwaijile, walupukilemo na batumwa banji 12 ne kubwela ku Betani, palepele makilomita asatu nangwa kukilapo. Akwa ko ko alaajile pa Mulungu bufuku, kampe ku nzubo ya mulunda nanji aye Lazalasa. Mateo 21:1-11, 14-17; Mako 11:1-11; Luka 19:29-44; Yoano 12:12-19; Zekaliya 9:9.

▪ Kimye ka kabiji Yesu watwelele byepi nobe Mfumu mu Yelusalema?

▪ Mambo ka o kyanemejile jibumba kutakaika Yesu?

▪ Yesu waumvwine byepi byo amwene Yelusalema, kabiji ñanyi bungauzhi bo aambile?

▪ Ñanyi kintu kyamwekele Yesu byo atwelele mu nzubo ya Lesa?