Kitango 116

Wakwashishe Baana Banji ba Bwanga Saka Akyangye Kufumapo

PO PO bapwishishetu kivuluko. Bino Yesu ne batumwa banji bakijinga mu kibamba kya peulu. Nangwa kya kuba Yesu wajinga pepi kufumapo, wajinga na byavula bya kwamba. Wibatundaikile amba: “Kange mubambishe michima yenu ne. Mwitabilai Lesa.” Kabiji wanungilepo amba: “Mungitabile ne amiwa.”

Yesu watwajijile kwamba’mba: “Mu nzubo ya Batata muji mwa kwikala mwavula. . . . Mbena kuya na kwimunengezhezha mwa kwikala . . . kuba amba akwa ko nji ne anweba mukekale konka. Kabiji anweba mwayuka ko mbena kuya.” Batumwa kechi bakwatakenye amba Yesu waambilenga pa kuya mwiulu ne, onkao mambo Tomase washikishe amba: “Nkambo, kechi twayuka ko mubena kuya ne. Twakonsha kuyuka byepi jishinda?”

Yesu wakumbwile amba: “Amiwa ne jishinda ne bukine ne bumi.” Muntu wakonsha kutwela mu nzubo ya Shanji ya mwiulu kupichila mu kumwitabila ne kulondela bwikalo bwanji. Mambo Yesu waambile amba: “Kafwako wiya kwi Batata ne, poso wapichila mwi amiwa.”

Filipa wamwambijile amba: “Nkambo, tumweshai Bashenu, ne atweba kisakwituwaina.” Kyamweka Filipa wakebelenga Yesu kuba’mba amweshepo kimwesho kya Lesa, nabiji byobya byo bamwesheshepo kala ba Mosesa, Elaija ne Isaya. Nangwa byonkabyo, batumwa bajinga na kintu kyawama kyakijile pa bimwesho bya uno mutundu, byonka Yesu byo ebabujile amba: “Nabanda nenu, ne obewa Filipa ukyangye kungyuka nyi? Awa wammona, wamona ne Batata.”

Yesu wamwesheshe bulongo byubilo bya Shanji kya kuba pa kwikala nanji ne kumumona kyajingatu nobe ubena kumona Shanji. Nangwa byonkabyo, Shanji wakila Mwana, byonka Yesu byo aambile’mba: “Bintu byo ñamba kwi anweba, kechi ñamba milanguluko yami ne.” Yesu wapaine lukumo kwi Shanji wa mwiulu pa bintu byo afunjishenga.

Batumwa batundaikilwe bingi Yesu byo ebambijile’mba: “Awa wangitabila, naye ukengila mingilo yo ñingilapo; kabiji ukengila ne mingilo yakila ino.” Yesu kechi walumbulwilenga amba baana banji ba bwanga bakobanga bya kukumya kukila byo aubilenga aye ne. Bino walumbulwilenga amba bakengila mwingilo pa kimye kyabaya, mu mapunzha avula ne kusapwila bantu bavula.

Yesu kechi washile bunke baana banji ba bwanga kimye kyo afuminepo ne. Wibalayile amba: “Kyonse kyo mukalomba mu jizhina jami, nkekyuba.” Kabiji wanungilepo amba: “Nkalomba Batata ne abo bakemupa nkwasho mukwabo ukekala ne anweba myaka yonse, ko kuba amba mupashi wazhila usolola bukine.” Palutwe kacheche, Yesu byo ayile mwiulu, waitulwijile mupashi wazhila pa baana banji ba bwanga, uno ye wajinga nkwasho mukwabo.

Yesu byo ajinga pepi kufumapo, waambile’mba: “Kwashalatu kakimye kacheche ba pano pa ntanda kechi bakammona jibiji ne.” Yesu waikele kilengwa kya mupashi kya kubula kumona ku muntu. Pano bino, Yesu walayile jibiji batumwa banji bakishinka amba: “Pakuba anweba mukammona mambo nji na bumi ne anweba mukekala na bumi.” Yesu kechi wamwekele kwi abo mu bumuntu panyuma ya lusanguko lwanji ne, bino mu kimye kyafwainwa ukebasangula ne abo kwikala bilengwa bya mupashi pamo ne aye mwiulu.

Yesu wapaine uno muzhilo amba: “Awa umvwa mikambizho yami ne kwiilama, ye wantemwa. Kabiji awa wantemwa bakamutemwa ne kwi Batata, ne amiwa nkamutemwa ne kwisolola ami mwine patoka kwi aye.”

Ponkapo mutumwa Yudasa watelwanga amba Tadeusa wamuchibikizhe amba: “Nkambo, mambo ka o mubena kukebela kwisolola patoka kwi atweba bino kechi ku ba pano pa ntanda ne?”

Yesu wamukumbwile amba: “Umvwe muntu wantemwa, ukalama byambo byami, ne Batata bakamutemwa . . . Awa wabula kuntemwa kechi ulama byambo byami ne.” Kupusanako na baana banji ba bwanga balukokelo, ba pano pa ntanda balengulwile mafunjisho a Kilishitu. Onkao mambo, kechi wisolwele kwi abo ne.

Kimye kya mwingilo wanji pano pa ntanda, Yesu wafunjishe batumwa banji bintu byavula. Pano bakonsheshe byepi kwibivuluka byonse, byo kiji kuba’mba kufikatu ne pa kyokya kimye kechi bakwatakenye byavula ne? Yesu wibalayile amba: “Nkwasho, mupashi wazhila, Batata ye bakatuma mu jizhina jami, ukemufunjisha bintu byonse ne kwimuvululamo bintu byonse byo nemubujile.”

Yesu wibatekeneshe jibiji amba: “Amiwa ne mushila mutende, nemupa mutende. . . . Kange mubambishe michima yenu nangwa kupopomenwa ne.” Ibyo kuba’mba Yesu wafuminengapo, pano bino wibalumbulwijile amba: “Umvwe mwantemwa, inge mwasekela kuba amba mbena kuya kwi Batata, mambo abo bo bankila.”

Yesu washajiletu na kimye kicheche kya kwikala nabo. Waambile’mba: “Amiwa kechi nsakwamba nenu byavula ne, mambo mfumu wa pano pa ntanda ubena kwiya. Kabiji aye kechi uji na bulume pe amiwa ne.” Satana Diabola yenka watwelele mwi Yudasa ne kumukosela, ye mfumu wa pano pa ntanda. Bino Yesu kechi wajinga na kilubo Satana kyo akonsheshe kwingijisha kuba’mba amulekeshe kwingijila Lesa ne.

Kwiyowa Bulunda bwa pa Muchima

Panyuma ya kijiilo kya kivuluko, Yesu watundaikile batumwa banji. Kampe saka bapita kala pakachi ka bufuku. Onkao mambo, Yesu wibakambizhe amba: “Imanai, twayai tufumeko kuno.” Nangwa byonkabyo, saka bakyangye kuya, Yesu byo ebatemenwe, watwajijile kwamba ne kwibela kishimpi kibatundaikile.

Waambile’mba: “Amiwa ne muñanzañanza wakine, kabiji Batata bo banjimi.” Njimi Mukatampe ke Yehoba Lesa wajimbile awa muñanzañanza wa kifwanyikizho kimye kyo ashingile Yesu na mupashi wazhila byo abatizhiwe mu 29 C.E. Bino Yesu wamwesheshe amba awa muñanzañanza kechi waimenejilengakotu aye yenka ne. Waambile’mba: “Musampi yense uji mwi amiwa ubula kupanga bipangwa Batata bamukopolako, kabiji yense upanga bipangwa Batata bamutokesha kuba amba apangenga bipangwa byavula. . . . Byonkatu musampi byo abula kwipangila bipangwa aye mwine, poso waikala ku muñanzañanza, byonkabyo ne anweba kechi mwakonsha kupanga bipangwa ne, poso mwaikala ne amiwa. Amiwa ne muñanzañanza, anweba mwi misampi.”

Byo papichile moba 51, pa Pentekosita batumwa ne bantu bakwabo baikele ke misampi ya muñanzañanza kimye mupashi wazhila kyo aitulwilwe pe abo. Kepo kibelengelo kya bantu 144,000 baikele ke misampi ya muñanzañanza wa kifwanyikizho. Bano ba 144,000 pamo na muñanzañanza aye Yesu Kilishitu balenga muñanzañanza wa kifwanyikizho upanga bipangwa bya Bufumu bwa Lesa.

Yesu walumbulwile kine kintu kilengela kupanga bipangwa amba: “Awa wikala ne amiwa ne amiwa nkekala nanji, kabiji ukapanganga bipangwa byavula; mambo kwa kubula amiwa kafwako kintu kyo mwakonsha kuba ne.” Nangwa byonkabyo, umvwe muntu wakankalwa kupanga bipangwa, Yesu waambile’mba, “ukekala nobe musampi ye bataya kabiji wauma; ne bantu bapwizha pamo ino misampi ne kwiyela mu mujilo ne ayo ipya.” Kabiji Yesu walayile amba: “Umvwe mwaikala ne amiwa, byambo byami bikekala mwi anweba kabiji kyonse kyo mukalomba bakemupakyo.”

Yesu watwajijile kubula batumwa banji amba: “Batata batumbijikilwa mu kyonka kino, kuba amba anweba mupangenga bipangwa byavula ne kwikala baana bami ba bwanga.” Kipangwa Lesa kyo akeba ku misampi ke kumwesha byubilo byajingapo na Kilishitu kikatakata butemwe. Kabiji byo kiji kuba’mba Kilishitu wasapwilanga pa Bufumu bwa Lesa, kipangwa kikebewa mwavwangwa ne mwingilo wa kulenga baana ba bwanga byonka byo aubilenga ne aye.

Yesu wibakambizhe amba, “ikalai monka mu butemwe bwami.” Pano batumwa banji bafwainwe kuba byepi kino? Waambile’mba: “Umvwe mwalama mikambizho yami, mukekala mu butemwe bwami.” Wanungilepo amba: “Uno ye mukambizho wami namba mwitemwe anwe bene na bene byonkatu byo nemutemwa. Kafwako uji na butemwe bwakila buno bwa kuba amba muntu elele balunda nanji mweo wanji ne.”

Mu maolatu acheche, Yesu wamwesheshe butemwe bwanji bukatampe kupichila mu kupaina batumwa banji bumi bwanji kumvwangakotu ne bantu bonse baketabila mwi aye. Kintu kyo aubile kyafwainwa kutundaika aba bamulondela kwikala na butemwe buntutu bumo bwa kwipana bwa kwitemwa abo bene na bene. Buno butemwe bukebayukanyikisha byonka Yesu byo aambile patanshi amba: “Pa kyo kino po po bakayukila bonse amba mwi baana bami ba bwanga umvwe mwitemwa anwe bene na bene.”

Yesu waambile pa balunda nanji amba: “Anweba mwi balunda nami umvwe saka muba byo mbena kwimukambizha. Pano kechi nemutele namba bazha ne, mambo muzha kechi uyuka byuba nkambo yanji ne. Bino nemutela amba balunda nami, mambo bintu byonse byo naumvwine kwi Batata nemubulabyo.”

Byo bwajingapo bulunda bwawama ko kuba’mba kwikala balunda ba pa muchima ne Yesu! Bino pa kuba’mba batwajijile kwiyowa buno bulunda aba bamulondela bafwainwa ‘kupanganga bipangwa.’ Umvwe saka bapanga bipangwa, Yesu waambile’mba, ‘kyonse kyo mukalomba Batata mu jizhina jami, bakemupakyo.’ Kine, ino ke mfweto ikatampe bingi ya kupanga bipangwa bya Bufumu! Panyuma ya kukambizha jibiji batumwa banji ‘kwitemwa abo bene na bene,’ Yesu walumbulwile amba ba pano pa ntanda bakebashikwa. Pano bino, wibatekeneshe amba: “Umvwe ba pano pa ntanda bemushikwa, yukai amba banshikilwe amiwa patanshi.” Kabiji Yesu wasolwele ene mambo ba pano pa ntanda o bashikilwa aba bamulondela amba: “Byo mwabula kwikala ba pano pa ntanda, ne musala kufuma mu ba pano pa ntanda, na mambo a kino ba pano pa ntanda bemushikwa.”

Yesu byo atwajijile kulumbulula ene mambo ba pano pa ntanda o bashikilwa aba bamulondela, waambile’mba: “Pakuba bakemuba bino bintu na mambo a jizhina jami, mambo abo kechi bayuka awa [Yehoba Lesa] wantumine ne.” Mingilo yakukumya yaubile Yesu yashinawijile aba bamushikilwe byonka byo aambile amba: “Umvwe kechi naubile mingilo mwi abo yabujile kubapo muntu mukwabo ne, inge babinga, pano bino abo bamona mingilo yami kabiji banshikwa amiwa ne Batata pamo.” Onkao mambo, byonka byaambile Yesu, kinembelo kyafikile kyaamba’mba: “Banshikilwe pa kubula mambo.”

Byonkatu byo aubile patanshi, Yesu wibatekeneshe batumwa banji kupichila mu kwibalaya amba ukebatumina nkwasho mupashi wazhila, bo bulume bwa Lesa bwingila. “Ukanshimuna; ne anweba mukanshimuna.”

Wibajimwine Jibiji Saka Akyangye Kufumapo

Yesu ne batumwa banji baimene’mba balupuke mu kibamba kya peulu. Waambile’mba: “Nemwambila bino bintu kuba amba mubule kwituntula.” Kepo ebajimwineko amba: “Bantu bakemupanga mu nshinagoga. Kimye kibena kwiya kyo bakalanguluka aba bemwipaya amba babena kwingila mwingilo wazhila kwi Lesa.”

Kyamweka batumwa banji byo baumvwine luno lujimuno, baakaminwe bingi. Nangwa kya kuba Yesu wibabujile patanshi amba ba pano pa ntanda bakebashikwa, kechi wibalumbulwijile mu kushinkamika amba bakebepaya ne. Yesu wibalumbulwijile amba: “Kechi nemubujile patanshi bino bintu ne, mambo nakijinga nenu.” Kine, kyawamine bingi kwibabujila jimo bino byambo saka akyangye kufumapo!

Yesu wanungilepo amba: “Bino mbena kuya kwi yewa wantumine kabiji kafwako nangwatu umo wanshikishapo amba, ‘Mubena kuya pi?’ ne.” Pa joja juba mabanga, batumwa banji bamushikishe ko ayilenga, pa kikye kimye baubile bulanda pa bintu byo ebabujile kya kuba bakankelwe ne kumushikisha pa mambo a kino. Byonkatu Yesu byo aambile’mba: “Mambo a kuba nemubula bino bintu, bulanda bwimukwata.” Batumwa baubile bulanda kechi na mambo a kuba bayukile’mba bakapita mu lumanamo lwakatazha ne kwibepaya ne, bino ke na mambo a kuba Nkambo yabo wafuminengapo.

Onkao mambo, Yesu walumbulwile’mba: “Mukamwenamo byawama byo mbena kuya. Mambo umvwe nabula kuya, nkwasho kechi ukeya kwi anweba ne; bino inge naya, nkemutuminaye.” Yesu byo ajinga pano pa ntanda wakonsheshe kutanwatu ku mpunzha imo, bino byo abwelele mwiulu wakonsheshe kutuma nkwasho ko kuba’mba mupashi wazhila wa Lesa ku bamulondela konse ko bajinga pano pa ntanda. Onkao mambo, kuya kwa kwa Yesu kwajinga kwa kuba’mba bakamwenemo.

Yesu waambile pa mupashi wazhila amba, “ukayukisha ba pano pa ntanda bundengamambo byo buji, bololoke ne bunchibamambo bwa Lesa byo buji.” Bundengamambo bwa ba pano pa ntanda, ko kuba’mba kubula kwitabila mu Mwana Lesa, bukasoloka. Kunungapo, bishiino bya bololoke bwa kwa Yesu byamwekele byo abwelele kwi Shanji. Kabiji Satana byo akankelwe konauna bulumbuluke bwa kwa Yesu kyamwesheshe’mba mfumu wa pano pa ntanda bamuzhachisha.

Yesu wanungilepo amba: “Nji na bintu byavula bya kwimubula, bino kechi mwakonsha kwibikwatakanya byonse pa kino kimye ne.” Onkao mambo, Yesu wibalayile amba kimye kyo aketulula mupashi wazhila ko kuba’mba bulume bwa Lesa bwingila, ukebatangijila kumvwisha bino bintu kwesakana na bulume bwabo bwa kukwatakanya.

Batumwa bakankelwe kikatakata kukwatakanya kuba’mba Yesu ukafwa kabiji ukamweka kwi abo panyuma ya kusanguka kwanji. Onkao mambo, beshikishenga mulwabo amba: “Kino kyatala mu ka byo etwambila amba, ‘Kwashalatu kakimye kacheche kechi mukammona ne, kabiji amba, mu kakimye kacheche mukammona,’ ne kuba amba, ‘Mambo mbena kuya kwi Batata’?”

Yesu byo ayukile’mba bakeba kumushikisha, wibambijile’mba: “Kine nemwambila namba, Anweba mukajila ne kuwowakana mabingo, pakuba ba pano pa ntanda abo bakasekela; anweba mukekala na bulanda, bino bulanda bwenu bukaluka ke lusekelo.” Pa joja juba mute, kimye Yesu kyo bamwipayile, bantangi ba bupopweshi ba pano pa ntanda basekejile pakuba baana banji ba bwanga baikele na bulanda. Nangwa byonkabyo, bulanda bwabo bwaikele ke lusekelo kimye Yesu kyo asangukile! Kabiji batwajijile kwikala na lusekelo kimye kyo ebapele bulume pa Pentekosita bwa kwikala batumonyi banji kupichila mu kwibetulwila mupashi wazhila wa Lesa!

Byo aesakenyenga batumwa banji ku mwanamukazhi uji na bisanso bya kupapa, Yesu waambile’mba: “Mwanamukazhi pa kusema wikala na bulanda, mambo kimye kyanji kyafika.” Bino Yesu waambile’mba uno mwanamukazhi kechi uvuluka misongo yo apitamo umvwe wasema mwana ne. Kabiji watundaikile batumwa banji amba: “Ne anweba pa kino kimye muji na bulanda; bino nkemumona jibiji [kimye kyo nkasanguka] ne michima yenu ikasekela kabiji kafwako ukapwisha lusekelo lwenu ne.”

Kufikatu ne pa kikye kimye batumwa kechi balombelepo kintu mu jizhina ja Yesu ne. Bino Yesu waambile’mba: “Umvwe mukalombe kintu kwi Batata, abo bakemupakyo mu jizhina jami. . . . Batata abo bene bemutemwa mambo anweba mwantemwa kabiji mwaitabila kuba amba nafumine kwi abo. Amiwa nafumine kwi Batata kwiya pano pa ntanda. Pano nkamfumepo ne kubwela kwi Batata.”

Byambo byaambile Yesu byatundaikile bingi batumwa banji. Abo baambile’mba: “Na mambo a kino, twaitabila amba mwafumine kwi Lesa.” Yesu wibepwizhe’mba: “Pano luno mwaitabila nyi? Kimye kibena kwiya, kabiji kyafika kyo bakemupalañanya awu kwanji awu kwanji kabiji mukanshatu bunke.” Abye byambo nangwa kya kuba byaumvwanyikilenga nobe kechi byakonsheshe kubiwa ne, byafikile saka bukyangye ne kukya!

“Nemubula bino bintu kuba amba kupichila mwi amiwa mwikale mutende.” Yesu wapezhezheko kwamba’mba: “Anweba mubena kumanama pano pa ntanda, bino kosai! Amiwa nepashinda pano pa ntanda.” Yesu washinjile pano pa ntanda kupichila mu kuba kyaswa muchima wa Lesa mu bukishinka nangwa kya kuba Satana ne ntanda yanji bakebelenga amba bonaune bulumbuluke bwa kwa Yesu.

Lulombelo Lwapeleleko mu Kibamba kya Peulu

Na mambo a kutemwa batumwa banji, Yesu wibakwashishe saka akyangye kufumapo. Panyuma ya kwibajimunako ne kwibatekenesha pa kimye kyabaya, wainwine meso anji ne kutala mwiulu ne kusashijila Shanji amba: “Tumbijikai mwanenu kuba amba mwanenu emutumbijike, byonkatu byo mwamupa lūsa lwa pa bantu bonse, akonshe kupana bumi bwa myaka ku bonse bo mwamupa.”

Yesu waambile pa kishina kyanema bingi ko kuba’mba bumi bwa myaka ne myaka! Byo bamupele “lūsa lwa pa bantu bonse,” Yesu wakonsha kupana mfweto ya kitapisho kya bukuzhi bwanji ku bantu bonse babena kufwa. Pano bino, ukapana “bumi bwa myaka ne myaka” ku bobatu Shanji bo aswa. Byo aambilenga pa kino kishina kya bumi bwa myaka ne myaka, Yesu watwajijile kulomba amba:

“Pa kuba amba bakekale na bumi bwa myaka, bafwainwa kwimuyuka anweba Lesa yenka wakine ne Yesu Kilishitu ye mwatumine.” Pa kuba’mba tukapuluke twafwainwa kuyuka Lesa ne Mwananji. Pano bino, kuyuka Lesa ne Mwananji kechi ko konkatu kukebewa ne.

Muntu wafwainwa kuyukisha bulongo Lesa ne Mwananji ne kwisampa nabo bulunda. Kabiji muntu wafwainwa kulanguluka pa bintu byonka byo balanguluka ne kwibimona byonka byo bebimona. Kyakila pa byonse, muntu wafwainwa kwibikishako kulondela byubilo byabo byawama pa kwingila na bantu bakwabo.

Kabiji Yesu walombele amba: “Amiwa nemutumbijika pano pa ntanda, byo napwisha kwingila mwingilo ye mwampele.” Byo apwishishe kwingila mwingilo wanji ne byo ayukile bintu byo akoba kulutwe, wasashijile’mba: “Tata, ntumbijikai na lukumo lo najinga nalo nenu saka mukyangye kulenga pano pa ntanda.” Walombelenga amba bamubwezhe mu lukumo lwanji lwa mwiulu lo ajingamo kala kupichila mu kumusangula.

Yesu byo alumbulwile mwingilo wanji mukatampe ye aingijile pano pa ntanda, waambile’mba: “Nejisolola jizhina jenu ku bantu bo mwampele kufuma pano pa ntanda. Bajinga benu kabiji mwibampele, ne abo balama byambo byenu.” Yesu waingijishanga jizhina ja Lesa ja Yehoba mu mwingilo wanji kabiji wamwesheshe ne bya kwijitela bulongo. Kechi waubiletu kino kyonka ne, bino wayukanyikishe jizhina ja Lesa ku batumwa banji. Wibakwashishe kuyukilapo byavula ne kumvwisha biji bumuntu bwa Yehoba ne nkebelo yanji.

Yesu byo apele lukumo Yehoba aye Wamukila wamutangijilanga, waambile na kwipelula amba: “Byambo byo mwambujile, ne amiwa nebabulabyo kabiji bebitambula ne kuyuka amba nafumine kwi anweba, ne abo baitabila amba yenu mwantumine.”

Yesu byo aambilenga pa lupusano luji pakachi ka baana ba bwanga ne bantuntu bashala, walombele amba: “Amiwa nebalombelako; kechi nalombelako ba pano pa ntanda ne, bino aba bo mwampele. . . . Byo najinga nabo nebazhikijilenga . . . ne amiwa nebalama kabiji kafwako nangwa umo waonaikapo ne, poso yenkawa mwana wa lonaiko,” Yudasa Isakaliota. Pa kikye kimye, Yudasa saka aya kala na kusolola Yesu. Onkao mambo, Yudasa wafikizhe Binembelo kwa kubula kuyuka.

Yesu watwajijile na kulomba amba: “Bino ba pano pa ntanda bebashikwa. . . . Nemulomba namba, kechi mwibafumye pano pa ntanda ne, bino mwibazhikijilenga na mambo a aye mubi. Abo kechi bo ba pano pa ntanda ne, byonka byo nabula kwikala wa pano pa ntanda.” Aba balondela Yesu bekala pano pa ntanda ko kuba’mba ntanda ya bantu ibena kulamwa na Satana, pano bino bafwainwa kwabana nayo ne bubi bwayo.

Yesu wanungilepo amba: “Bazhijikai na bukine; byambo byenu bo bukine.” Yesu watelele Binembelo bya Kihebelu byanembelwe na lutangijilo lwa mupashi wazhila byo aambangapo javula amba, “bukine.” Kabiji bintu byo afunjishe baana banji ba bwanga ne byo banembele na lutangijilo lwa mupashi wazhila Binembelo bya Kingiliki bya Bwina Kilishitu nabyo bitelwa’mba “bukine.” Buno bukine bwakonsha kuzhijika muntu, kupimpula byubilo byanji ne kumulengela kwabana na ino ntanda.

Yesu walombele amba: “Kechi nalombelakotu bano bonka ne, bino ne boba bangitabila kupichila mu byambo byabo.” Onkao mambo, Yesu walombejileko aba bamulondejilenga bashingilwe na mupashi wazhila ne baikele baana banji ba bwanga bo babujile kukikonkanya kwikala “jitanga jimo.” Ñanyi kintu kyo alombejileko bano bonse?

“Kuba amba bekale ke umo, byonkatu anweba Tata byo muji ne amiwa, ne amiwa byo nji ne anweba, . . . kuba amba bekale ke umo byonka byo tuji anweba ne amiwa twi umo.” Yesu ne Shanji kechi muntu umo ne, bino bakwatankana mu kwingila bintu byonse. Yesu walombele’mba baana banji ba bwanga nabo bekala ke umo kuba’mba “ba pano pa ntanda bayuke amba mwantumine kabiji mwibatemwa byonka byo mwantemwa amiwa.”

Na mambo a boba baikele baana banji ba bwanga bashingwa na mupashi wazhila, Yesu walombele kwi Shanji wa mwiulu. Ñanyi kintu kyo alombele? Walombele’mba: “Mbena kukeba aba bo mwampele kwikala ne amiwa ko nji, kuba amba bakamone lukumo lwami lo mwampa, mambo mwantemenwe, baana saka bakyangye kutatula kusemwa pano pa ntanda,” ko kuba’mba ba Adama ne Evwa saka bakyangye kutatula kusema baana. Akya kimye saka kikyangye kufika, Lesa watemenwe Mwananji yenkawa umo waikele Yesu Kilishitu.

Yesu pa kupezhako lulombelo lwanji, wabwezhezhepo jikwabo amba: “Nejiyukanyikisha jizhina jenu kwi abo kabiji nkejiyukanyikisha kuba amba butemwe pe amiwa bwikale mwi abo, ne amiwa ngikale ne abo.” Batumwa byo bafunjile pa jizhina ja Lesa kyavwangilemo kuyuka abo bene butemwe bwa Lesa. Yoano 14:1–17:26; 13:27, 35, 36; 10:16; Luka 22:3, 4; Kulupuka 24:10; 1 Bamfumu 19:9-13; Isaya 6:1-5; Ngalatiya 6:16; Salamo 35:19; 69:4; Byambo bya Mana 8:22, 30.

▪ Yesu wayilenga kwepi, kabiji wakumbwile byepi Tomase pa mambo a jishinda ja ko ayilenga?

▪ Ñanyi kintu Filipa kyo akebelenga Yesu kumubila?

▪ Mambo ka awa wamona Yesu kyo amwena ne Shanji?

▪ Baana ba bwanga ba kwa Yesu bakoba byepi mingilo ikatampe kukila yo aubile?

▪ Mu ñanyi jishinda Satana mo abujila bulume pe Yesu?

▪ Ñanyi kimye Yehoba kyo ajimbile muñanzañanza wa kifwanyikizho, kabiji bakwabo baikele byepi lubaji lwa muñanzañanza kabiji kyajinga kimye ka?

▪ Muñanzañanza wa kifwanyikizho waikele na misampi inga?

▪ Ñanyi kipangwa Lesa kyo akeba ku misampi?

▪ Twakonsha kwikala byepi balunda ba kwa Yesu?

▪ Mambo ka ba pano pa ntanda o bashikilwa baana ba bwanga ba kwa Yesu?

▪ Ñanyi lujimuno lwaambile Yesu lwalengejile batumwa banji kwakamwa?

▪ Mambo ka batumwa o bakankejilwe kwipuzha Yesu ko ayilenga?

▪ Ñanyi kintu kikatakata batumwa kyo bakankelwe kukwatakanya?

▪ Ñanyi kyakumwenako kyaambile Yesu kumwesha’mba bulanda bwa batumwa bukekala ke lusekelo?

▪ Ñanyi kintu kyaambile Yesu kikoba batumwa banji?

▪ Yesu washinjile byepi pano pa ntanda?

▪ Mu ñanyi jishinda Yesu mo bamupela “lūsa pa bantu bonse”?

▪ Kilumbulula ka kuyuka Lesa ne Mwananji?

▪ Mu ñanyi mashinda Yesu mo ayukanyikishe jizhina ja Lesa?

▪ “Bukine” bo bu ka, kabiji ‘buzhijika’ byepi mwina Kilishitu?

▪ Lesa, Mwananji ne bapopweshi bakine baikala byepi ke umo?

▪ Byambo bya kuba’mba “baana saka bakyangye kutatula kusemwa pano pa ntanda” byatala mu ka?