Kitango 118

Bamusolwele ne Kumukwata

YUDASA watangijile jibumba jikatampe ja bashilikale, bañanga bakatampe, Bafaliseo ne bantutu bakwabo mu bujimi bwa Ngesemani saka kyapita kala pakachi ka bufuku. Bañanga baumvwañene amba basakupa Yudasa mali a siliva 30 a kusolwelamo Yesu.

Kimye Yudasa kyo bamwambijile kufumapo pa Kijiilo kya Lupitailo, wayile ku bañanga bakatampe. Ponkapotu bano bañanga bakonkenye pamo bakapaso babo ne nzhita ya bashilikale. Kampe Yudasa wakibatangijile patanshi kwajinga Yesu ne batumwa banji ko bajiijilenga Kijiilo kya Lupitailo. Byo amwene’mba bafwamo, jibumba jikatampe jasendele bilwilo, malampi ne bimunyi jalondejilenga Yudasa kufuma mu Yelusalema ne kwabuka Kinkunenke kya Kidelona.

Yudasa byo atangijile aja jibumba ku Mutumba wa Olebeta, wasumininwe amba wayuka ko asakutana Yesu. Yesu ne batumwa banji byo bayanga ku Yelusalema ne kubwela ku Betani, javula bakokolokelanga mu bujimi bwa Ngesemani ne kwisamba. Pano Yesu byo ajinga mu mfishi munshi ya bichi bya maolivi, bashilikale bakonsheshe kumuyuka byepi? Kabiji kyamweka kechi bakimumwenepo kala ne. Onkao mambo, Yudasa wibabujile kiyukilo amba: “Yenka ye nsakufyompa, ye iye; mumukwate ne kumutwala saka mumusopa.”

Yudasa watangijile jibumba jikatampe mu bujimi mo amwene Yesu ne batumwa banji kabiji wayile kwi aye. Wamwambijile amba: “Mutende mwane, Mufunjishi!” Kepo amufyompele ne kumufyompa.

Yesu wamushikishe amba: “Obewa mukwetu, waiya na kuba ka kuno?” Kepo aye mwine Yesu akumbwile buno bwipuzho amba: “Yudasa, nanchi ubena kusolola Mwana muntu kupichila mu kumufyompa nyi?” Abino, byo byaubile awa wamusolwele! Yesu waimene mu kyeya kya bimunyi ne malampi ne kwibashikisha amba: “Nanchi ñanyi ye mubena kukeba?”

Abo bamukumbwile’mba: “Yesu mwina Nazala.”

Aye wibambijile kwa kubula moyo byo aimene kwiabo amba: “Yami iye.” Byo bakuminye pa kuchinchika kwanji ne byo bakankelwe kuyuka kisakumweka, aba banabalume babwelele lumfutwanyuma ne kupona panshi.

Yesu wibambijile amba: “Naji kwimubula kala namba, yami iye. Umvwe yami mubena kukeba, balekai bano bayenga.” Saka bakyangye kufuma mu kibamba kya peulu, Yesu wabujile Shanji mu lulombelo amba walama batumwa banji bakishinka kabiji kafwako nangwa umo waonaikapo ne, poso “yenkawa mwana wa lonaiko.” Onkao mambo, pa kuba’mba byambo byanji bifike, waambile’mba baana banji ba bwanga bebaleke bayenga.

Bashilikale byo baimene, ne kutatula kukasa Yesu, batumwa bayukile kisakumumwekela. Bamushikishe amba: “Nkambo twibatape na mpoko nyi?” Yesu saka akyangye ne kukumbula ne, Petelo wasomwene mpoko imo pa oa abiji apotele batumwa ne kukampa Malikusa kalume wa ñanga mwine mukatampe. Petelo byo atupijile mutwe wa uno kalume, wakopweleko kutwi kwa kilujo.

Yesu waambile amba: “Kyapwa.” Wakwachile kutwi kwa kwa Malikusa ne kwikubuka. Kepo afunjishe lufunjisho lwanema bingi ne kukambizha Petelo amba: ‘Bwezha mpoko yobe mu kikwa, mambo bonse basenda mpoko bakafwa ku mpoko. Nanchi mubena kulanguluka amba nakonsha kukankalwa kulomba Batata amba bantumine pa kino kimye mazhita jikumi na abiji a bamalaika nyi?’

Yesu wipaine kumukasa mambo walumbulwile amba: “Pano Binembelo byakonsha kufika byepi inge kino kyabula kubiwa mu jino jishinda?” Kabiji wanungilepo amba: “Nanchi katomeno kampa Batata kechi nakonsha kwikatoma nenyi?” Waswile na muchima yense kuba kyaswa muchima wa Lesa!

Kepo Yesu aambijile jibumba amba: “Anweba mwaiya na mapoko ne na tukonkolo na kunkwata amiwa nobe ne kapondo nyi? Pa juba pa juba, natanwanga mu nzubo ya Lesa na kufunjisha, bino kechi mwaishile na kunkwata ne. Abino byonse byamweka kuba amba bifike abya byanembele bangauzhi.”

Ponkapotu jibumba ja bashilikale ne mukulumpe wa bashilikale ne bakapaso ba Bayudea, bakwachile Yesu ne kumukasa. Batumwa byo bamwene kino, bamushile Yesu ne kunyema. Nangwa byonkabyo, nsongwalume umo kampe mwana wa bwanga aye Mako wajinga mu jibumba. Kampe wajinga ku nzubo Yesu ko ajiijile Kijiilo kya Lupitailo kabiji walondejile jibumba pa kufuma ku yoya nzubo. Nangwa byonkabyo, Mako pa kikye kimye bamuyukile kabiji bakebelenga kumukwata. Bino washile kivwalo kyanji kya linenyi ne kunyema. Mateo 26:47-56; Mako 14:43-52; Luka 22:47-53; Yoano 17:12; 18:3-12.

▪ Mambo ka Yudasa o asuminijilwe kutana Yesu mu bujimi bwa Ngesemani?

▪ Yesu wamwesheshe byepi amba wata muchima batumwa banji?

▪ Ñanyi kintu kyaubile Petelo kupokololako Yesu, bino Yesu waambijile’mba ka Petelo pa mambo a kyo aubile?

▪ Yesu wamwesheshe byepi amba waswa na muchima yense kuba kyaswa muchima wa Lesa?

▪ Batumwa byo bashile Yesu, ñanyi washajile kabiji ki ka kyamumwekejile?