Kitango 119

Bamutwajile kwi Anasa Kepo Bakamufikizhe kwi Kaifasa

YESU bamukashile nobe kapondo ne kumutwala kwi Anasa wajinga kala ñanga mwine mukatampe. Anasa wajinga ñanga mwine mukatampe kimye Yesu kyo ajinga na myaka 12 kyo akumishe bafunjishi mu nzubo ya Lesa. Baana bavula ba kwa Anasa nabo baikajile bañanga bene bakatampe kabiji pa kikye kimye muko wanji aye Kaifasa ye wajinga pa kino kifulo.

Kyamweka Yesu bamutwajile patanshi ku nzubo ya kwa Anasa mambo waingijile pa kimye kyabaya mwingilo wa kwikala ñanga mukatampe mu bupopweshi bwa Bayudea. Byo bayilenga na kumona Anasa, kyalengejile Ñanga Mwine Mukatampe aye Kaifasa kukonkanya pamo Saniedilini, kije kikatampe kya Bayudea kyajinga na bantu 71 kabiji ne kukonkanya pamo batumonyi babubela.

Ñanga mukatampe aye Anasa washikishe Yesu pa mambo a baana banji ba bwanga ne pa mafunjisho anji. Nangwa byonkabyo, Yesu wamukumbwile amba: “Naambilenga patoka ku ba pano pa ntanda. Kimye kyonse nafunjishanga mu nshinagoga ne mu nzubo ya Lesa mukonkena Bayudea bonse; kabiji kafwako kintu kyo naambilenga mu bufyamfya ne. Mambo ka o mubena kunshikishisha? Shikishai boba baumvwine byo naambilenga. Bano bayuka byo naambile.”

Ponkapo, kapaso umo waimene kwipi ne Yesu wamuzhangwilemo lupi ku meso ne kumushikisha amba: “Mambo ka o wakumbwila ñanga mukatampe bino?”

Yesu wamukumbwile’mba: “Umvwe naamba kyatama, mbule; inge kyo naamba kechi kyatama ne, mambo ka o wampumina?” Panyuma ya kino, Anasa watumine Yesu kwi Kaifasa saka bamukasa.

Pa kikye kimye bañanga bonse bakatampe, bakulumpe, banembeshi ne kije kyonse kya Saniedilini kyakonkene. Bonse bakonkenejile mu nzubo ya kwa Kaifasa. Mizhilo ya Bayudea yakainye kutotolwesha muntu bufuku pa Kijiilo kya Lupitailo. Bino kino kechi kyakainye bantangi ba bupopweshi kuba kyatama kyo bafuukwilepo ne.

Yesu byo asangwile Lazalasa, kije kya Saniedilini kyafuukwilepo kumwipaya. Kabiji pa Kisatu saka papita kala moba abiji, bantangi ba bupopweshi baumvwañene kukwata Yesu mu bujimuku kuba’mba bamwipaye. Akifwanyikizhaitu, bafuukwijile jimo saka bakyangye ne kumutotolwesha ne!

Bakebelenga batumonyi bakwamba bintu byabubela bya kupelapo Yesu mambo. Nangwa byonkabyo, bakankelwe kutana batumonyi bakonsheshe kwamba byambo byaswañenenga. Ponkapo kwaishile batumonyi babiji ne kwamba’mba: “Twamumvwine saka amba amba, ‘Amiwa nkakundula ino nzubo ya Lesa yo bashimikile na maboko ne mu moba asatu nkashimika ikwabo ya kubula kushimika na maboko.’”

Kaifasa wamushikishe’mba: “Nanchi kechi ukeba kukumbula nenyi? Usakwambapo amba ka pa bino bintu byo babena kukushiina?” Bino Yesu wazhindaminetu nzoo. Nangwatu mu ano mambo a bubela o bamupelengamo, kije kya Saniedilini bekilengeshe bumvu mambo batumonyi babo kechi baswañenenga mu byo baambilenga ne. Onkao mambo, ñanga mwine mukatampe wakebelepo jishinda jikwabo.

Kaifasa wayukile Bayudea byo balangulukanga umvwe muntu witela’mba ne Mwana Lesa. Pa bimye bibiji, baambijilenga Yesu amba ubena kwamba mwenga kabiji wafwainwa kufwa mambo abo balangulukilenga amba ubena kwiesakanya pamo ne Lesa. Onkao mambo, Kaifasa mu bujimuku wamukambizhe amba: “Nakukambizha namba uchipe kwi Lesa mumi kuba amba usakwamba bya kine ne kwitubula umvwe wi Kilishitu Mwana Lesa!”

Nangwa kya kuba Bayudea bamulangulukilanga mungi, Yesu kine wajinga Mwana Lesa. Kabiji umvwe wazhindaminepotu, kyakonsheshe kumwesha’mba wikana mwine amba kechi ye Kilishitu ne. Onkao mambo, Yesu na kuchinchika wakumbwile’mba: “Yami iye, kabiji anweba mukamona Mwana muntu saka aikala ku kuboko kwa kilujo kwa bulume kabiji saka eya mu makumbi.”

Pa mambo a kino, Kaifasa na bukaji watabwile kivwalo kyanji ne kwamba’mba: “Waamba mwenga! Bishiino ka bikwabo byo tusakukeba ku batumonyi? Mwaumvwa mwenga ye aamba. Musakwambapo amba ka?”

Kije kyonse kya Saniedilini kyabijikile amba: “Wafwainwa kufwa.” Kepo batatwile kumwendeleka ne kumwambila bintu bya mwenga. Bamuzhangawilemo mapi ku meso ne kumushipila mate. Bakwabo bamuvwetele ku meso ne kumupuma binkonyi ne kumwambila na mukeyu amba: “Aula kwi atweba, obewa Kilishitu, ñanyi wakupuma?” Bino byonse byubilo byatama byo bamubilenga, byajingako bufuku kimye kyo bamutotolweshenga. Mateo 26:57-68; 26:3, 4; Mako 14:53-65; Luka 22:54, 63-65; Yoano 18:13-24; 11:45-53; 10:31-39; 5:16-18.

▪ Kwepi Yesu ko bamutwajile patanshi, kabiji ki ka kyamumwekejile kokwa?

▪ Kwepi kukwabo Yesu ko bamutwajile kabiji mambo ka?

▪ Kaifasa walengejile byepi kije kya Saniedilini kwamba’mba Yesu wafwainwa kufwa?

▪ Ñanyi byubilo byatama byaubiwenga kimye kyo bamutotolweshenga?