Kitango 121

Bamutwajile ku Kije Kikatampe, Kepo Bamufikizhe kwi Pilato

BUFUKU bwajingatu pepi kukya. Petelo wakaine Yesu ja busatu kabiji ba mu Kije Kikatampe po po bapwishishetu kumwendeleka kabiji bapalañene. Nangwa byonkabyo, pa Kitanu lukelo bakonkene jibiji mu kibamba mo bachibilanga mambo. Bakebelenga kumwesha’mba mambo o bachibile bufuku ayijilemo na mizhilo. Yesu byo bamuletele kwi abo, bamwambijile byonka byo bamwambijile pa bobwa bufuku amba: “Tubule umvwe wi Kilishitu.”

Yesu wibakumbwile’mba: “Nangwatu nemubule kechi musakuswa ne. Kabiji umvwe nemushikishe kechi musakukumbula ne.” Nangwa byonkabyo, Yesu kwa kubula moyo wiyukanyikishe’mba: “Kufuma luno Mwana muntu ukekala ku kuboko kwa kilujo kwa bulume bwa Lesa.”

Bonse bamushikishe’mba: “Nanchi obewa wi Mwana Lesa nyi?”

Yesu wibakumbwile’mba: “Anwe bene mwaamba amba, yami iye.”

Uno mukumbu kwi abo wawaine, mambo bano bantu baimenetu pa kukeba kumwipaya. Baambilenga amba ubena kwamba mwenga. Baambile’mba: “Bishiino ka bikwabo byo tusakukeba? Mambo atwe bene twiumvwina byo akumbula.” Ponkapo bakashile Yesu, bamulupwilemo ne kumutwala kwi kitumbafumu wa bena Loma aye Pontiusa Pilato.

Yudasa wasolwele Yesu, wamwenengako byo bamutotolweshenga. Byo amwene’mba Yesu bamuchibila mambo amba afwe, waubile bulanda. Onkao mambo, wayile ku bañanga bakatampe ne bakulumpe kuba’mba ebabwezhezhe mali a siliva 30 ne kwamba’mba: “Nalenga mambo byo nasolwele muntu waoloka.”

Na mambo a kubula lusa bamukumbwile amba: “Awo ke mambo obe, kechi etu ne!” Onkao mambo, Yudasa watayile mali a siliva panshi mu nzubo ya Lesa, waya ne na kwikujika. Nangwa byonkabyo, kichi Yudasa kyo akashileko lutambo kyamweka kyatebukile, waponejile pa mabwe ne jivumo jasabikile.

Bañanga bakatampe bakankelwe kuyuka bya kuba na oa mali a siliva. Baambile’mba: “Kechi kyawama kubika ano mali mu kilambwilo kyazhila ne, mambo ke mali a mashi.” Panyuma ya kwisambapo, aa mali bapotelemo bujimi bwa mbumbi bwa kuzhikamo benyi. Onkao mambo, buno bujimi bwatongolwanga amba “Bujimi bwa Mashi.”

Lwajinga lukelo kimye Yesu kyo bamutwajile ku kipango kya kitumbafumu. Bino Bayudea bo ayilenga nabo bakaine kutwela mambo bayukile’mba kupwanañana na bantu ba mu bisaka bikwabo kwakonsheshe kwibazhilulula. Onkao mambo, pa kuba’mba Pilato esambe nabo walupukile pangye ne kwibashikisha’mba: “Ñanyi mambo o mwamulobela uno muntu?”

Abo bamukumbwile’mba: “Umvwe uno muntu kechi wauba kyatama ne, inge kechi twamuleta kwi anweba ne.”

Pilato byo abujile kukeba kwivwangamo mu ano mambo, wibabujile’mba: “Musendai anwe bene mukamuchibile mambo monka mwayila mizhilo yenu.”

Bayudea basolwele milanguluko yabo ya bumbanzhi byo baambile’mba: “Mizhilo kechi ituswisha kwipaya muntu nangwa umo ne.” Umvwe baipayile Yesu pa Kijiilo kya Lupitailo, inge bantu baletele kiwowo mambo bavula banemekele bingi Yesu. Bino umvwe balengela bena Loma kumwipaya pa mambo a kuba’mba wasatukila bufumu bwabo, kino kyakonsheshe kulengela kubula kwibapamo mambo ku bantu.

Onkao mambo, bantangi ba bupopweshi byo babujile kusolola byo batotolweshenga Yesu bufuku po bamuzhachishe amba ubena kwamba mwenga, bakebelepo jishinda jikwabo ja kumupelamo mambo. Batongwele bintu bisatu bya kumupelamo mambo amba: “Uno muntu twamutaine [1] saka ajimbaika kisaka kyetu, ne [2] kukanya kupana misonko kwi Kesala ne [3] kwamba amba aye mwine ye Kilishitu mfumu.”

Mambo o bapelemo Yesu a kuba’mba ubena kwitela’mba mfumu o alengejile Pilato kutako muchima. Ponkapo watwelele mu kipango jibiji ne kwita Yesu ne kumushikisha’mba: “Nanchi obewa wi Mfumu wa Bayudea nyi?” Mu jishinda jikwabo, Pilato washikishenga amba, nanchi walala muzhilo na mambo a kwitela obe mwine amba wi mfumu wasatukila Kesala nyi?

Yesu wakebelenga kuyuka Pilato byo ayukilepo pe aye, onkao mambo wamushikishe’mba: “Nanchi anwe bene mwiambila kino nyi, inyi paji wimubula pe amiwa?”

Pilato wamwesheshe’mba kechi wamuyukile ne, kabiji wasakishe kuyuka byavula pe aye. Waambile’mba: “Nanchi amiwa ne Muyudea nyi? Kisaka kyobe ne bañanga bakatampe bo bakuleta kwi amiwa. Ki ka kyo wauba?”

Yesu kechi wakebele kwifya amba mfumu ne. Jishinda jakumbwijilemo Yesu jalengejile Pilato kukumya bingi. Luka 22:66–23:3; Mateo 27:1-11; Mako 15:1; Yoano 18:28-35; Byubilo 1:16-20.

▪ Mambo ka ba mu Kije Kikatampe o bakonkenejile jibiji lukelo?

▪ Yudasa wafwile byepi, kabiji mali a siliva 30 beengijishe byepi?

▪ Mu kifulo kya kumwipaya abo bene, mambo ka Bayudea o bakebejile amba bena Loma bepaye Yesu?

▪ Ñanyi mambo Bayudea o bapelemo Yesu?