Kitango 124

Wamupaine Kabiji Bamutwajile

PILATO byo aesekele na ngovu kuba’mba amukasulule Yesu na mambo a byo bamuyanjishe, bañanga bakatampe bazhingijile bingi. Kechi bakebele kintu nangwa kimo kwibalengela kukankalwa kuba kintu kyatama kyo bafuukwilepo ne. Onkao mambo, batwajijile kubijika’mba: “Mupopai! Mupopai!”

Pilato wibambijile’mba: “Musendai anwe bene mukamupope.” (Kupusanako na byo baambile patanshi, Bayudea bajinga na lūsa lwa kwipaya bambanzhi balenganga mambo akatampe a kuzhilulula mizhilo ya bupopweshi.) Kepo Pilato abingishe Yesu ja butanu amba mambo ufwao, byo aambile’mba: “Amiwa kechi namutana na mambo ne.”

Bayudea byo bamwene’mba bakankalwa pa mambo o bamupelemo a kusatukila bufumu, bavulukile mambo o bamupelengamo a kuzhilulula mizhilo ya bupopweshi a kwamba mwenga kimye Yesu kyo bamutwajile mu Kije Kikatampe. Baambile’mba: “Tuji na muzhilo, kabiji kwesakana na uno muzhilo, uno muntu wafwainwa kufwa, mambo witela mwine amba mwana Lesa.”

Ano mambo Pilato kechi wiayukile ne, kabiji amulengejile kwakamwa bingi. Pa kikye kimye wayukile amba Yesu kechi wajinga muntutu ne, byonkatu ne mukazhanji byo alotele ne Yesu byo achinchikile. Pilato byo ayukile’mba Yesu wafumine ku Ngalilea, pa kumvwa amba “mwana Lesa” kyamukatezhe bingi. Kampe walangulukilenga amba, nanchi wajingako kala nyi? Pilato byo amubwezhezhe jibiji mu kipango, wamushikishe’mba: “Nanchi obewa wafuma pi?”

Yesu kechi wamukumbwile ne. Mambo patanshi wabujile Pilato amba ye mfumu kabiji Bufumu bwanji kechi bwa pano pa ntanda ne. Onkao mambo, kechi kyakebewenga kumulumbulwila byambo bikwabo ne. Nangwa byonkabyo, Pilato na mambo a kwilundumika wazhingijile bingi Yesu byo abujile kumukumbula, wamwambijile na bukaji amba: “Wabujila ka kunkumbula? Kechi wayuka amba nji na lūsa lwa kukukasulula nangwa lwa kukupopa pa kichi nenyi?”

Yesu na mushingi wamukumbwile’mba: “Anweba kechi muji na lūsa pe amiwa ne, kanatu bemupalo kwi Lesa.” Waambilenga pa lūsa Lesa lo apa bantu lwa kutangijila bintu bya pano pa ntanda. Yesu wanungilepo amba: “O ene mambo awa muntu wansolola kwi anweba, o aikela na mambo akatampe.” Ñanga mwine mukatampe aye Kaifasa, bo ajinga nabo ne Yudasa Isakaliota bajinga na mambo akatampe bingi kukila Pilato pa mambo a kumanyika Yesu kyanshiji.

Pilato waesekele jikwabo kukasulula Yesu mambo wamwene Yesu byo achinchikile kampe ne kuyuka’mba wafumine kwi Lesa. Nangwa byonkabyo, Bayudea bakaine byaambile Pilato. Babwezhezhepo mambo o bamupelengamo a kusatukila bufumu, ne kuchinya Pilato amba: “Umvwe mumukasulule uno muntu, ko kuba amba kechi mwi balunda ba kwa Kesala ne. Muntu yense witongola mwine amba ne mfumu, usatukila Kesala.”

Pilato byo abujile kwakamwa kisakumumwekela, walupwile Yesu pangye japelako ne kwibasashijila amba: “Talai! Mfumu wenu!”

“Mwipayai! Mwipayai! Mupopai!”

Pilato byo akankelwe kya kuba, wibashikishe amba: “Namupope mfumu wenu nyi?”

Bayudea kechi bebalamanga bulongo ku bufumu bwa bena Loma ne. Bashikilwe bingi bufumu bwa bena Loma! Pano bino, bañanga bakatampe mu bukamfutumfutu baambile’mba: “Atweba kechi tuji na mfumu ne, kana Kesala.”

Pilato byo aakaminwe pa mambo a kifulo kyanji ne munema wanji, wakokejile byakebelenga Bayudea. Wamupaine Yesu. Bashilikale bamuvujile Yesu kivwalo kyachiluluka ne kumuvwika bivwalo byanji bya peulu. Yesu byo bamutwajilenga na kumupopa, wisendejile mwine kichi kya lumanamo.

Pajinga pa Kitanu lukelo, Nisanyi 14; kampe kyanangijilenga ku kushinkimana juba. Yesu kechi walaajilepo tulo kufuma pa Kina lukelo ne, kabiji wapichile mu lumanamo lwakatazha bingi. Bulume bwanji bwapwile byo asendele kichi kyanemene bingi. Onkao mambo, muntu wapichilenga aye Shimona mwina Kilene wa mu Africa, bamukambizhe kumusendelako kino kichi. Byo bayilenga, bantu bavula kuvwangakotu ne banabakazhi bamulondejilenga saka bepumpaula na mambo a bulanda ne kujila Yesu.

Yesu byo atajile banabakazhi, wibambijile’mba: “Anweba banabakazhi ba mu Yelusalema, kilekai kunjila amiwa. Bino ijilai anwe bene ne baana benu mambo moba abena kwiya bantu o bakamba amba, ‘Batokwa bingi banabakazhi bañumba, ne boba babula kusemapo ne boba babula kwamishapo!’ . . . Umvwe boba bino bintu kichi saka kyakitalala, ki ka kikamweka umvwe kyauma?”

Kichi Yesu kyo aambilengapo ke kisaka kya Bayudea, kyakitalele na mambo a kwikalapo kwa kwa Yesu ne bashajilepo bamwitabijile. Bino bano byo bebafumishemo mu kisaka, kwashajiletu kichi kyafwile ku mupashi ko kuba’mba jibumba ja kisaka jaumine. Kine, bajijile bingi kimye nzhita ya bena Loma, Lesa yo aingijishe kwipailako bantu kyo yaonawine kisaka kya Bayudea! Yoano 19:6-17; 18:31; Luka 23:24-31; Mateo 27:31, 32; Mako 15:20, 21.

▪ Ñanyi mambo Yesu o bamupelemo ku bantangi ba bupopweshi byo bamwene’mba bakankalwa pa mambo o bamupelemo a kusatukila bufumu?

▪ Mambo ka Pilato o aakaminwe?

▪ Bañanyi bajinga na mambo akatampe pa mambo a bintu byamwekejile Yesu?

▪ Bañanga balengejile byepi Pilato kupana Yesu amba bamwipaye?

▪ Yesu wabujile banabakazhi bamujijilenga amba ka, kabiji watazhizhe mu ka byo aambile pa kichi amba “kyakitalala” kabiji amba “kyauma”?