Kitango 125

Wamanamine pa Kichi

YESU bamutwajilenga pamo na tupondo tubiji na kwibepaya. Byo pabujile kulepa na muzhi, bantu baimene pa mpunzha patelwanga amba Ngolongota nangwa’mba Mpunzha ya Kiboyongolo.

Bano bakaili bebavujile bivwalo byabo. Kepo banengezhezhe binyu byo bavwangileko byalula. Kyamweka banabakazhi ba mu Yelusalema bo bebinengezhe, kabiji bena Loma bapananga bino binyu ku boba bo bapopanga. Nangwa byonkabyo, Yesu byo atompelepo, wakaine kwibitoma. Mambo ka o akanyijile? Kyamweka wakebelenga kukishala na maana a kulanguluka byo apichilenga mu lweseko lukatampe lwa lwitabilo lwanji.

Yesu bamulaajikile pa kichi ne maboko anji saka beabika peulu ya mutwe wanji. Kepo bashilikale bamupopele masunga akatampe ku maboko ne ku maulu. Masunga byo atwelelenga mu misunyi ne mu manungi, wajinga mu misongo ikatampe. Kichi byo bekimikile, misango yabaijileko bingi mambo a kinemenezhi kya mubiji kyatabwilenga mwapichile masunga. Mu kifulo kya kwibachinya, Yesu walombejileko bashilikale bena Loma amba: “Tata, balekelaiko mambo, mambo kechi bayuka kyo babena kuba ne.”

Pilato wabikile kiyukilo pa kichi kyo anembelepo amba: “Yesu mwina Nazala Mfumu wa Bayudea.” Kyamweka wanembele bino byambo kechi na mambo a kunemekatu Yesu ne, bino ne na mambo a kushikwa bañanga ba Bayudea pa byo bamukanjikizhe amba epaye Yesu. Pa kuba’mba bonse batange kino kiyukilo, Pilato wikinembele mu milaka isatu, ko kuba’mba mu Kihebelu, Kilatini ne mu Kingiliki kyapela.

Bañanga bakatampe kuvwangakotu ne Kaifasa ne Anasa kechi bayukile kya kuba ne. Bino byambo byo anembele byaonawine kwitumbijika kwabo. Onkao mambo, bamwambijile’mba: “Kange munembe amba ‘Mfumu wa Bayudea’ ne, bino munembe amba uno waambile amba, ‘Amiwa ne Mfumu wa Bayudea.’” Pilato byo azhingijile na mambo a kumwingijisha ku bañanga kuba kyo bakebelenga, wibakumbwile na mukeyu amba: “Kyo nanemba, nanemba kala.”

Bañanga pamo na jibumba jikatampe bakonkenejile pa mpunzha po bamwipayijile, kabiji bañanga bakaine kuswa byambo byanembelwe pa kiyukilo. Babwezhezhepo byambo byabubela byo baambile kimye kyo bamutotolweshenga mu Kije Kikatampe. O ene mambo, bantu bapichilenga o bamwambijilenga mwenga saka benauna mitwe yabo ne kwamba na mukeyu amba: “Obewa waambilenga amba, wakonsha kukundula nzubo ya Lesa ne kwiishimika mu moba asatu, ipulushe obe mwine! Umvwe wi Mwana Lesa, fuma po po pa kichi kya lumanamo!”

Bañanga bakatampe ne balunda nabo ba mu bupopweshi baambilenga amba: “Wapulushanga bakwabo; bino wakankalwa kwipulusha aye mwine; Ye Mfumu wa bena Isalela; mulekai afume pa kichi kya lumanamo ne atweba tusakumwitabila. Waketekela mwi Lesa; umvwe Lesa wamutemwa; lekai a mupulushe, mambo waambile amba, ‘Amiwa ne Mwana Lesa.’”

Bashilikale nabo bamwendelekelenga Yesu. Bamupelenga na mukeyu binyu byasasa, kampe kwibileta pa kanwa kauminetu totolo. Bamubilenga mukeyu amba: “Umvwe wi Mfumu wa Bayudea, ipulushe.” Ne boba batupondo, bajinga umo ku kuboko kwa kilujo kya kwa Yesu mukwabo ku kipiko kyanji bamwendelekelenga. Akikilangulukaipotu! Muntu waya nkuwa wajingako pano pa ntanda mo balengejilenga ne Yehoba Lesa bintu byonse, kumanama ku bintu bya uno mutundu!

Bashilikale bamuvujile Yesu bivwalo byanji bya peulu ne kwibyabanyapo pana. Batele bubale kuba’mba bamone usakwibisenda. Nangwa byonkabyo, kivwalo kya mukachi kechi kyajinga na mifumo ne, mambo bekisonene bulongo. Onkao mambo, bashilikale beambijile mulwabo amba: “Kange twikitabule ne, bino twayai tute bubale kuba amba tuyuke usakwikisenda.” Bafikizhe kinembelo kwa kubula kuyuka kyaamba’mba: “Beabenye bene bivwalo byami bya peulu kabiji batele bubale pa kivwalo kyami.”

Mu kyonkakya kimye, kapondo umo waambile’mba Yesu kine mfumu. Onkao mambo, wakajipijile mukwabo amba: “Nanchi obewa kechi wakamwa Lesa kuba amba uji mu luzhachisho lumo na uno muntu wabula mambo nenyi? Atweba kitufwainwa, mambo twazhatwa na bintu byo twaubile; pakuba uno muntu kafwako kintu kyatama kyo auba ne.” Kepo asashijile Yesu amba: “Anweba Yesu, mukamvuluke kimye kyo mukeya mu Bufumu bwenu.”

Yesu wamwambijile’mba: “Kine nakwambila lelo namba, Ukekala ne amiwa mu paladisa.” Uno mulaye ukafika kimye Yesu kyo akatatula kulama byo aji Mfumu mwiulu ne byo akasangula awa ngubabibi walapijile kwikala pano pa ntanda mu Paladisa ye bakawamishanga aba bakapuluka pa Amagedonyi ne balunda nabo. Mateo 27:33-44; Mako 15:22-32; Luka 23:27, 32-43; Yoano 19:17-24.

▪ Mambo ka Yesu o akanyijile kutoma binyu byo bavwangileko byalula?

▪ Mambo ka kiyukilo o bekibikijile peulu ya kichi po bapopejile Yesu, kabiji kino kyalengejile Pilato ne bañanga bakatampe kwiambila ñanyi byambo?

▪ Ñanyi mwenga ye bamwambijile Yesu byo ajinga pa kichi, kabiji ki ka kyalengejile?

▪ Bungauzhi bwafikile byepi pa byo baubile na bivwalo bya kwa Yesu?

▪ Kapondo umo waambile’mba ka, kabiji Yesu ukafikizha byepi byambo byaambile kapondo?