Kitango 129

Wamwekele Javula

BAANA BA BWANGA bakijinga na bulanda. Kechi bakwatakenye kyalengejile kilende kushala kyashi ne, kabiji kechi baswile bibabujile banabakazhi ne. Onkao mambo, pa Mulungu, Kileopasa ne mukwabo mwana wa bwanga bafumine mu Yelusalema ne kuya ku Emasa pajinga makilomita 11.

Byo bayilenga saka besamba pa bintu byamwekele joja juba, muntu ye babujile kuyuka wayilenga nabo. Wibashikishe’mba: “Nanchi bintu ka byo mubena kwisambapo?”

Baana ba bwanga baimene saka bapopomenwa, kabiji Kileopasa wamushikishe’mba: “Nanchi wi mwenyi mu Yelusalema wabula kuyuka bintu byamweka kokwa mu ano moba nyi?” Uno muntu wibashikishe’mba: “Ñanyi bintu?”

Abo bamukumbwile’mba: “Bintu byamweka pe Yesu mwina Nazala, . . . ne bañanga betu bakatampe ne bantangi byo bamupaine kuba amba bamwipaye ne kumupopa pa kichi. Bino twaketekejile kuba amba uno muntu ye ukapokolola Isalela.”

Kileopasa ne mulunda nanji balumbulwile bintu bikatampe byamwekele joja juba, ko kuba’mba sawakya waambile pa kumweka kwa bamalaika ne kilende byo kyajinga kya kyashi, bino baambile patoka byo babujile kukwatakanya mwatajile bino bintu. Awa muntu ye babujile kuyuka wibambijile’mba: “Anweba mukankalwa kulanguluka ne kubula kwitabila bukiji bintu byonse byaambile bangauzhi! Nanchi Kilishitu kechi wafwainwe kumanama ku bino bintu kuba amba akatumbijikwe nenyi?” Kepo uno muntu ebalumbulwijile bintu bimo byajinga mu kinembelo kyaambilenga pe Kilishitu.

Ponkapo byo bafikile kwipi na muzhi wa Emasa, awa muntu ye babujile kuyuka waubile nobe ubena kupitaila. Byo batengejilenga kumvwinapo bintu bikwabo byavula, baana ba bwanga bamusashijile’mba: “Ikalai ne atweba, mambo ano ke mabanga.” Kabiji waikele nabo na kuja. Byo alombele ne kutebaula shinkwa ne kwibapa, po po bayukile’mba kine wajinga Yesu mu mubiji wa bumuntu. Ponkapo wazhimañene ku meso abo.

Pano po po bakwatakenye amba awa muntu wayukile bintu byavula bingi! Baambañenenga mulwabo amba: “Nanchi michima yetu kechi ibalukutenga kimye kyo aji kwisambanga ne atweba mu jishinda, ne kwitulumbulwila Binembelo nenyi?” Kwa kubula ne kutaya kimye ne, baimene ne kubwela ku Yelusalema ko bataine batumwa ne boba mo bakonkanejile pamo. Kileopasa ne mulunda nanji saka bakyangye kwamba kintu nangwa kimo ne, bakwabo bebabujile na lusekelo amba: “Kwambatu kine, Nkambo wasanguka kabiji wamwekele kwi Shimona!” Kepo bano babiji balumbulwile Yesu byo amwekele kwi abo. Kino kyajinga kimye kya buna pa joja juba po amwekele ku baana banji ba bwanga bapusana pusana.

Ponkapo Yesu wamwekele ja butanu. Nangwa kya kuba binzhilo byajinga bya kukiya na mambo a kuba baana ba bwanga bachiinenga Bayudea, watwelele ne kwimana pakachi kabo ne kwibambila’mba: “Mutende ekale ne anweba.” Abo baakaminwe bingi mambo balangulukilenga amba bamona kilengwa kya mupashi. Onkao mambo, byo ebalumbulwijile amba kechi bamona kimonwamonwa ne, Yesu waambile’mba: “Mambo ka o mwaubila moyo, kabiji mambo ka o mubena kuzhinaukila mu michima yenu? Akitalai maboko ami ne maulu ami, kuba amba yami iye; nkwatai ne kumona, mambo kilengwa kya mupashi kechi kiji na nyama ne bikupa byonka byo mubena kummona byonji ne.” Napotu bakizhinaukilenga.

Pa kuba’mba ebakwashe kuyuka’mba ye iye Yesu, wibashikishe amba: “Nanchi muji na kajo kuno nyi?” Byo atambwile jisabi jakosha ne kwijija, waambile’mba: “Bino byo byambo byami byo nemwambijile kimye kyo najinga nenu [saka nkyangye kufwa] kuba amba bintu byonse byanembelwe pe amiwa mu Mizhilo ya Mosesa, Bangauzhi ne Masalamo, byafwainwa kufika.”

Byo aubile nobe wibafunjishenga lufunjisho lwa Baibolo, Yesu wibafunjishe’mba: “Kyanembelwe amba Kilishitu ukamanama kabiji ukasanguka kufuma mu bafu pa juba ja busatu, kabiji na mambo a jizhina janji, bantu bakasapwila lulapilo ku bisaka byonse kuba amba Lesa ukebalekelako mambo abo. Kutatwila mu Yelusalema kufika ne ku mapunzha akwabo, kabiji mukasapwila bino bintu byo mwamona.”

Pa jije juba janemene po bapwijile pa Mulungu bufuku Tomase kechi wajingapo ne. Onkao mambo, juba jalondejilepo, bakwabo bamubujile na lusekelo amba: “Twamumona Nkambo!”

Tomase wakaine amba: “Amiwa nsakwitabatu kana mmone bito mwapichile masunga mu maboko anji ne kukulamo munwe wami ne kumukwata mu mbavu yanji.”

Panyuma ya moba atanu na asatu, baana ba bwanga bapwijile jibiji mu nzubo. Pa kikye kimye Tomase wajingapo. Nangwa kya kuba binzhilo byajinga bya kukiya, Yesu waimene pakachi kabo ne kwibambila’mba: “Mutende ekale ne anweba.” Kepo aambijile Tomase amba: “Kula munwe wobe mu bito biji mu maboko ami kabiji unkwate ne mu mbavu, uleke kuzhinauka, witabile.”

Tomase waambile’mba: “Nkambo yami ne Lesa wami!”

Yesu wamushikishe’mba: “Nanchi waitabila na mambo a kuba amba wammona nyi? Batokwa aba betabila nangwa kya kuba kechi bamona ne.” Luka 24:11, 13-48; Yoano 20:19-29.

▪ Ñanyi kintu awa muntu ye babujile kuyuka kyo akebele kuyuka ku baana ba bwanga babiji bayilenga ku Emasa?

▪ Ñanyi bintu bibambijile awa muntu ye babujile kuyuka byalengejile michima ya baana ba bwanga kulukuta?

▪ Baana ba bwanga bamuyukile byepi awa muntu ye babujile kuyuka patanshi?

▪ Kileopasa ne mulunda nanji byo babwelele ku Yelusalema, ñanyi sawakya wawama ye baumvwine?

▪ Ñanyi kimye kya butanu Yesu kyo amwekele ku baana banji ba bwanga, kabiji ñanyi kintu kyamwekele pa kikye kimye?

▪ Ñanyi bintu byamwekele pa juba ja butanu na busatu panyuma ya kuba Yesu wamweka ja butanu, kabiji Tomase washiinwe byepi amba Yesu ke mumi?