Bunsatuki Bwatendekele Mwiulu
Satana byo aingijishe muloolo kwisamba ne Evwa, naye wasatukijile Lesa
Bilengwa bya mupashi byonse byalengele Yehoba byawamine. Bino malaika umo wasatukile. Uno malaika ke Satana Diabola. Satana wakebelenga’mba bantu bamupopwelenga, kechi kupopwela Yehoba ne. Kyamwekele ke kino:
Mu bujimi bwa Edena, mwajinga bichi byavula byajinga na bipangwa byawama. Yehoba waambijile Adama ne Evwa amba bakonsha kuja ku bino bichi. Bino kwajingatu kichi kimo Lesa kyo ebakainye kujako. Wibambijile’mba inge bajako, kine bakafwa.—Ntendekelo 2:9, 16, 17.
Juba jimo, Evwa wajingatu bunke kabiji muloolo watendekele kwisamba nanji. Bino kechi wajinga muloolo yenkawetu waambilenga ne, Satana Diabola ye waambilenga kwingijisha uno muloolo. Satana waambijile Evwa amba inge waja ku kichi kyo bebakainye, ukekala nobe Lesa. Kabiji wamwambijile’mba kechi ukafwa ne. Buno bonse bwajinga bubela. Nangwa byonkabyo, Evwa waumvwijile Satana ne kuja kipangwa. Palutwe kacheche, wapelepo ne Adama kabiji naye wajiile.—Ntendekelo 3:1-6.
Ku kino kyamwekele, tufunjilako kuba’mba Satana ke nsatuki kabiji wa bubela. Waambijile Evwa amba inge wasatukila Lesa, kechi ukafwa ne. Buno bwajinga bubela. Evwa ne Adama bonse bafwile. Satana kechi wafwile pa kyokya kimye ne, bino ukafwa kulutwe mambo walengele mambo. Pa kino kimye koaji kabiji watwajijila na kujimbaika bantu. Ne lunotu wa bubela kabiji ukeba bantu kulala mizhilo ya Lesa.—Yoano 8:44.
Bamalaika Bakwabo Basatukile
Palutwe kacheche, bamalaika bakwabo basatukile. Bano bamalaika batendekele kukomoka banabakazhi balamba bajinga pano pa ntanda kabiji bakebelenga kwilaala nabo. Onkao mambo, baishile pano pa ntanda ne kuvwala mibiji ya bumuntu. Kepo basongwele banabakazhi bonka bo besajijilenga abo bene. Byo baubile kechi byo byakebelenga Lesa ne.—Ntendekelo 6:1, 2; Yuda 6.
Bamalaika batama baishile pano pa ntanda na kwilaala na banabakazhi
Na mambo a byaubile bano bamalaika, balengejile bantu kumanama bingi. Banabakazhi bo basongwele basemene baana batama bingi. Bano baana bajinga babiyangala kabiji bashinchile bingi. Pa kupitapo kimye, pa ntanda payujile bukapondo kabiji kino kyalengejile Yehoba konauna bantu batama na muyulo. Bantu bapulukiletu Muyulo ke Nowa ne kisemi kyanji.—Ntendekelo 6:4, 11; 7:23.
Nangwa byonkabyo, bano bamalaika batama kechi bafwile ne, babwelele mwiulu. Bino kechi bebaswishishe kubwela mu kisemi kya Lesa kya bamalaika baoloka ne. Kabiji Yehoba kechi wibaswishishe kuvwala mibiji ya bantu jikwabo ne. Lesa ukazhachisha bano bamalaika mu juba janji jikatampe ne kwibonauna.—2 Petelo 2:4; Yuda 6.
Satana Bamupangile Mwiulu
Satana ne bandemona banji batama bebapangile mwiulu
Mu 1914, mwiulu mwabuukile nkondo. Buku wa Lumwekesho waamba kyamwekele’mba: “Kabiji mwiulu mwabuukile nkondo: Mikela [Yesu Kilishitu ye basangwile] ne bamalaika banji [bawama] balwile na nsuñunyi [Satana], ne uno nsuñunyi ne bamalaika banji [batama] balwile nabo, bino bakankelwe kushinda, kabiji kechi mwajingapo mpunzha mwiulu ya kwikalamo abo ne. Onkao mambo, nsuñunyi mukatampe bamutayile panshi, yenka aye muloolo wa kala, utelwa’mba Diabola kabiji Satana, yenka ubena kujimbaika bantu ba pano pa ntanda ponse; bamutayile pa ntanda ne bamalaika banji [batama] bebatayile pamo nanji.”
Ñanyi kintu kyafuminemo? Jishimikila jatwajijila’mba: “Onkao mambo, sekelai anweba meulu ne anweba mwikalamo!” Bamalaika bawama bajinga na lusekelo mambo Satana ne bamalaika batama, nangwa’mba mipashi kechi bajinga mwiulu ne. Pano kyajinga byepi ku bantu pano pa ntanda? Baibolo waamba’mba: “Malwa kwi anweba ntanda ne kalunga ka mema, mambo Diabola waikila ko muji, saka azhingila bingi, mambo wayuka’mba washalatu na kakimye kacheche.”—Lumwekesho 12:7-9, 12.
Ibyo, Satana ne bandemona banji batama babena kujimbaika bantu ne kuleta malwa a kabotoka pano pa ntanda. Bano bamalaika batama bebatela’mba bandemona. Ke balwanyi ba Lesa. Bano bamalaika bonse boba byatama.