Lufuunjisho 7
Kufwenya Kwiipi ne Lesa mu Milombelo
Mamboka byokyanemena kulomba kimye kyonse? (1)
Kwiñanyi kotwafwainwa kulomba, kabiji byepi? (2, 3)
Ñanyi bintu byotwafwainwa kulomba? (4)
Kimyeka kyo mwafwainwa kulomba? (5, 6)
Nanchi Lesa umvwa milombelo yonse nyi? (7)
1. Kulombela ko kwikepesha pa kwisamba ne Lesa. Mwafwainwa kulomba kwi Lesa jonse. Mukuba byobyo mukeumvwa kufwenya kwiipi ne aye nobe ku mulunda nenu wapamuchima. Yehoba mukatampe kabiji wangovu, bino umvwa milombelo yetu! Mulomba kwi Lesa kimye kyonse nyi?—Masalamo 65:2; 1 Tesalonika 5:17.
2. Milombelo ke lubaji lwa kupopwela kwetu. Ko kuba mba, twafwainwa kulombatu kwi Lesa bunke, Yehoba. Yesu byoajinga panopantanda, kimye kyonse walombelenga kwi Bashanji, kechi ku muntu ungi ne. Ne atweba twafwainwa kuba byonkabyo. (Mateo 4:10; 6:9) Pano bino, milombelo yetu yonse yafwainwa kulombewa mujizhina ja Yesu. Kino kimwesha kuba mba tunemeeka lubaji lwa Yesu ne kwikala na lwiitabilo mu kitapisho kyanji kya kukuula.—Yoano 14:6; 1 Yoano 2:1, 2.
3. Pakulomba twafwainwa kwisamba ne Lesa kufuma mukachi ka michima yetu. Kechi twafwainwa kusunga milombelo yetu mu mutwe nangwa kwiitanga mu buuku wa milombelo ne. (Mateo 6:7, 8) Twakonsha kulomba mujishinda ja mushingi, pa kimye kyonse, kabiji ne pa kifulo kyonse. Lesa wakonsha kumvwa ne milombelo ya kishinshi mu michima yetu. (1 Samwela 1:12, 13) Kyawama kumonapo mpunzha imo yawama kwabula bantu kotwakonshesha kulombela milombelo palwetu atwebene.—Mako 1:35.
4. Ñanyi bintu byomwafwainwa kulomba? Kyonse kyakonsha kukatazha bulunda bwenu ne aye. (Filipai 4:6, 7) Lulombelo lwa kumwenako lwamwesha kuba mba twafwainwa kulombelela jizhina ja Yehoba ne kufuukula kwanji. Twakonsha kulomba ne byotwakajilwa ku mubiji kuba mba etupe, lulekelo lwa mambo etu, ne bukwasho bwa kushinda lweseko. (Mateo 6:9-13) Milombelo yetu kechi yafwainwa kwikala ya lwiso ne. Twafwainwa kulomba bintu byonka byaesakana na kyaswa muchima wa Lesa.—1 Yoano 5:14.
5. Mwakonsha kulombela kimye kyonse kyomukeba kumusanchila nangwa kumutota Lesa. (1 Byambo bya Moba 29:10-13) Mwafwainwa kulomba kimye kyomuji na lukatazho ne kimye kiji lwiitabilo lwenu mu lweseko. (Masalamo 55:22; 120:1) Kyawama kulombela sakamukyangye kuja kajo kenu ne. (Mateo 14:19) Yehoba witwita atweba kulomba “bimye byonse.”—Efisesa 6:18.
6. Kabiji twafwainwa kulomba kikatakata inge twalenga mambo akatampe. Pa bino bimye twafwainwa kulomba bibusa bya Yehoba ne lulekelo lwa mambo. Inge twasolola bubi bwetu koaji ne kuja nyenye, Lesa ‘waswila jimo kulekela mambo.’—Masalamo 86:5; Byambo bya Mana 28:13.
7. Yehoba umvwatu milombelo ya bantu baoloka. Pakuba’mba milombelo yenu yumvwanyike kwi Lesa, mwafwainwa kwesekaeseka kusunga mizhilo yanji. (Byambo bya Mana 15:29; 28:9) Mwafwainwa kwikepesha pa kulomba. (Luka 18:9-14) Mwafwainwa kwingijilapo pa byo mulomba. Inge mwauba byobyo, musakumwesha kubamba muji na lwiitabilo ne kuba’mba mubena kukebeshatu byomulomba. Yehoba popo akasukatu milombelo yenu.—Bahebelu 11:6.