Lufunjisho 2

Lesa Ye Mulundatu Wawamisha Ye Mwakonsha Kwikala Nanji

Kwikala mulunda na Lesa kyo kintu kyawamisha kyafwainwa kumweka kwi anweba. Lesa ukemufunjisha bya kwikala basangalala ne bavimbilwa; ukemukasulula ku lwitabilo lubi ne ku byubilo bincha. Ukomvwa milombelo yenu. Kabiji ukemukwasha kwiyowa mutende wa mu milangwe ne luketekelo mwi aye. (Masalamo 71:5; 73:28) Lesa ukemukwasha mu kimye kya malwa. (Masalamo 18:18) Kabiji Lesa wimupa bupe bwa bumi bwa myaka ne myaka.—Loma 6:23.

Inge mwafwenya kwipi ne Lesa, mukafwenyenya ne ku balunda na Lesa. Nabo bakekala ke balunda nenu. Kya kine, bakekala ke balongo ne banyenga yenu. Bakasekela kwi mufunjisha pe Lesa kabiji bakemukwasha ne kwi mutundaika.

Kechi twaesakana pamo ne Lesa ne. Pa kusampa bulunda na Lesa, mwafwainwa kukwatankanya kishinka kimo kyanema. Bulunda na Lesa kechi bulunda bwa pakachi ka bantu baesakana ne. Ye mukote wa kala kene kabiji wa kishinka mu mana ne mu bulume kukila byo tuji mu mana kabiji uji na bulume bwakila pa bwetu. Ye kalama wetu. Onkao mambo inge tusaka kwikala balunda nanji, twafwainwa kuteleka kwi aye ne kuba kyo etubula. Kuba kino kimye kyonse kikaleta byawama kwi atweba.—Isaya 48:18.