Lufunjisho 6

Paladisa Uji Pepi!

Bintu byatama bibena kumweka pano pa ntanda bitumwesha kuba’mba Paladisa uji pepi. Baibolo yashimuna kuba’mba Paladisa saka akyangye kufika ne, tukekala mu bimye byakatazha. Bino byo byobyo bimye byo tujimo! Bino byo bintu bimo Baibolo byo yaamba kuba’mba bikamweka:

Makondo akatampe. “Mukoka ukemena mukoka mukwabo, ne bufumu bukemena bufumu bukwabo.” (Mateo 24:7) Buno bungauzhi bwafikizhiwa. Kutendeka mu mwaka wa 1914, kwajinga makondo a ntanda yonsetu abiji ne makondo a acheache. Bantu mamilyoni avula bafwile mu ano makondo.

Myalo. “Ne kuntu kwavula kukekala ... myalo.” (Luka 21:11) Nanchi kino kyafikizhiwa nyi? Ee kyafikizhiwa. Kansa, kikola kya muchima, TB, malelya, muzezempuya (AIDS), ne bikolatu bikwabo byaipaya bantu mamilyoni avula bingi.

Kukepelwa kwa kajo. Kuzhokoloka ntanda yonse kuji bantu babula kajo kawaina. Kila-mwaka bantu mamilyoni avula bafwa ku nzala. Kano ko kayukilo kakwabo ka kuba’mba Paladisa katatakatu afike pano pa ntanda. Baibolo yaamba’mba: “Kukekala ne bipowe bya nzala.”—Mako 13:8.

Bitentanshi. “Kukekala ... bitentanshi ne kuku ne kuku.” (Mateo 24:7) Kino nakyo kyafikizhiwa mu kimye kyetu kya lelo. Kufuma mu 1914, bantu kukila pa milyoni umo bafwa ku bitentanshi.

Bangubabibi. Bantu bakekala “ba kutemwa mali” ne “ba kwitemwa abo bene.” Kabiji bakekala “ ba kutemwa bya lusangajiko, ne kutemwa Lesa ne.” Bana bakekala “ba kulengulula bebasema.” (2 Timoti 3:1-5) Nanchi kechi mwaswa kuba’mba lelo jino ko baji bantu bavula ba yewo mutundu ne nyi? Kechi banemeka Lesa ne, kabiji bakatazha bantu bakeba kufunda pe Lesa.

Bumbanzhi. Nangwatu “bubi bukavula.” (Mateo 24:12) Musakwitaba kuba’mba bumbanzhi bwavujilako kukila pa byo bwajinga myaka yapita. Kuji konse bantu baji mu lukatazho lwa kwibebila, kubepwa, nangwa kukatazhiwa.

Bino byonse bibena kumwesha kuba’mba Bufumu bwa Lesa buji pepi. Baibolo yaamba’mba: “Pa kumona bibye bintu saka bibena kufika, yukai amba, bufumu bwa Lesa buji pepi.” (Luka 21:31) Bufumu bwa Lesa bo buka? Ye kamfulumende wa mwiulu wa kwa Lesa ao ukalula ino ntanda ke Paladisa. Bufumu bwa Lesa bukapinga pa makamfulumende a bantu.—Danyela 2:44.