BUTALA BWA MABUKU BWA PA INTANETI
Kyamba kya Usopa
BUTALA BWA PA INTANETI
Kikaonde
Pa kukebela
  • Bisopelo
  • BAIBOLO
  • MABUKU
  • KUPWILA
  • be lufunjisho 10 p. 115-p. 117 jifu. 4
  • Kizaku

Vidyo ufwamo.

Yakana kushinkuka.

  • Kizaku
  • Mwenaimo mu Sukulu wa Lufunjisho lwa Mwingilo wa Lesa
  • Byambo Bipashako
  • Kufunjisha na Kizaku
    Mutanchi wa Kupwila kwa Bwikalo ne Mwingilo Wetu wa Bwina Kilishitu—2021
  • Kwamba Bintu Bifunjisha Bantu
    Mwenaimo mu Sukulu wa Lufunjisho lwa Mwingilo wa Lesa
  • Kwamba na Kizaku
    Teshaiko Muchima ku Kutanga ne Kufunjisha
  • Kwamba Kwa Kulalumukatu
    Mwenaimo mu Sukulu wa Lufunjisho lwa Mwingilo wa Lesa
Monai Bikwabo
Mwenaimo mu Sukulu wa Lufunjisho lwa Mwingilo wa Lesa
be lufunjisho 10 p. 115-p. 117 jifu. 4

LUFUNJISHO 10

Kizaku

Mwafwainwa kuba byepi?

Ambai jashi na lusekelo ne kumwesha byo mubena kwiumvwa ku muchima pa mambo a buneme bwa byo mubena kwambapo.

Mambo ka o kwanemena?

Umvwe kemwambe na kizaku, mukalengela bantu kutesha muchima ku byo mubena kwamba; kabiji kyakonsha ne kwibalengela kuba bintu byo babena kumvwa. Umvwe muji na kizaku mu bintu byo mubena kwamba, ne bantu bo mubena kwambako nabo bakekala na kizaku.

KIZAKU kilengela jashi kumvwanyika kimenge. Nangwa kya kuba kyanema bingi kwikala na byambo byakonsha kukwasha bantu, kwibyamba na kizaku ko kulengela bantu kuteshako bingi muchima. Mwakonsha kwamba na kizaku kechi na mambo a nkomeno yenu nangwa bumuntu bwenu byo buji ne.

Ambai mo Kibena Kukebewa. Byo esambilenga na mwanamukazhi mwina Samaliya, Yesu waambile’mba aba bapopwela Yehoba bafwainwa kumupopwela “na mupashi ne na bukine.” (Yoa. 4:24) Mpopwelo yabo yafwainwa kutundaikwa na muchima wa lusanchilo kabiji ne kwikela mwayila bukine butanwa mu Mambo a Lesa. Inge muntu waikala na luno lusanchilo lukatampe, lukamwekelanga mu jishinda jo ambilamo bintu. Ukakebeshanga bingi kubulako bakwabo bintu byawama byanengezha Yehoba. Mwekelo ya kilungi kyanji, ñingijishisho ya binungwa bya mubiji ne jiwi janji bikamweshanga byo eumvwa.

Pano mambo ka ñambi watemwa Yehoba kabiji waitabila mu bintu byo abena kwamba o akonsha kukankelwa kwamba na kizaku? Kechi wafwainwa kupelelatu mu kunengezha bintu byo akamba ne. Wafwainwa kwijumvwisha bulongo jashi jonse. Twambe’mba bamupa kwamba pa kitapisho kya bukuzhi bwa Yesu Kilishitu. Umvwe ñambi keambe jino jashi, byambo byanji kechi byafwainwa kwikalatu bishinka byonka ne, byafwainwa ne kumweshanga lusanchilo lwa kusanchila kitapisho kya Yesu byo kyamukwasha aye ñambi mwine ne bantu bo abena kwambako. Wafwainwa kuvuluka lusanchilo lwanji kwi Yehoba Lesa ne Kilishitu Yesu pa mambo a luno lunengezho lwawamisha. Kabiji wafwainwa kulanguluka pa bwikalo bwawama kitapisho bo kyashinkwila bantu—lusekelo lwa myaka ne butuntulu bwa mubiji bwalumbuluka mu paladisa panopantanda! Onkao mambo, wafwainwa kwivwangamo na muchima wanji yense.

Pa mambo a Ezela munembeshi, kabiji mufunjishi mu bena Isalela, Baibolo waamba’mba, “watesheshe” nangwa’mba wanengezhezhe “muchima wanji mu kufunda bya mu buku wa mizhilo ya Yehoba ne mu kwibyuba, ne mu kufunjisha . . . mu Isalela.” (Eze. 7:10) Umvwe ne atweba ketube byonkabye—kunengezha byambo kabiji ne michima yetu—tukambanga kufuma panshi ya muchima. Kwamba byambo bya bukine mu jino jishinda kukakwasha bingi bo tubena kwambako kukomesha butemwe bwa kine bwa kutemwa bukine.

Langulukai pa Bantu bo Mukambangako. Kintu kikwabo kyanema kikwasha kwamba na kizaku, ke kusumininwa’mba bantu bo mukambangako bakakebanga bingi kumvwa byo mukambanga. Kino kibena kulumbulula’mba, kimye kyo mubena kunengezha bya kukamba, kechi mwafwainwatu kukonkanya pamo byambo byanema ne, bino mwafwainwa ne kulomba kwi Yehoba kwimutangijila pa kukebyamba kuba’mba bikakwashe bo mukambangako. (Sala. 32:8; Mat. 7:7, 8) Langulukishaipo pa ene mambo bantu bo mukambangako o bafwainwa kumvwa byobyo byambo, byo bikebakwasha kabiji ne byo mukakonsha kwibyamba kya kuba bakomvwishe buneme bwabyo.

Pitulukishaimo mu byambo byo mukamba poso mwatanamo kintu kimutokela ku muchima. Kechi kyakonsha kwikala kyakatataka ne, pano bino jishinda jo mukekyambilamo jo jikakonsha kwikimwesha nobe kyakatataka. Umvwe mwanengezha kintu kyakonsha kukwasha bantu bo mukambangako kukosesha bulunda bwabo ne Yehoba, kumusanchila pa bintu byanji byo anengezha, kuyuka mwa kubila na makatazho a mu buno bwikalo bukote, nangwa kwingila bulongo mu mwingilo wabo, ko kuba’mba muji na bishinka bya kwambila na kizaku.

Pano ibyepi umvwe jashi jenu ja kutanga ku mvula bantu? Pa kuba’mba mutange na kizaku, kechi mwafwainwa kutangatu byambo byonka kabiji ne kwibitanchikatu bulongo ne. Pitulukishaimo bulongo mu byobyo byambo. Umvwe mukatanga kitango kya mu Baibolo, pesapesaipo. Monai’mba mwikyumvwisha mo kyatala. Langulukaipo pa byo kyakonsha kwimukwasha anweba ne bantu bo mukatangangako, apa bino mutange na mulanguluko wa kukamwesha kino ku banteleki benu.

Abya mubena kunengezha kuya mu mwingilo wa mu bujimi nyi? Pitulukaimo mu mutwe ye mubena kukeba kuya na kwisambapo ne binembelo byo mwanengezha kwingijisha. Kabiji langulukainga ne pa biji mu michima ya bantu. Kintu ka kyamweka kyo babena kwambapo? Makatazho ka o babena kupitamo? Umvwe mwinengezha bulongo kumwesha bantu amba Mambo a Lesa akonsha kwibakwasha kuyuka mwa kubila na makatazho o babena kupitamo, mukakebesha bingi kwibakwasha, kabiji kechi kikemukatazha kwamba na kizaku ne.

Mweshainga Kizaku Kupichila mu Kwamba na Lusekelo. Javula kizaku kimwekela mu kwamba jashi na lusekelo. Kino kyafwainwa kumweka mu mwekelo ya kilungi kyenu. Mwafwainwa kumvwanyika basumininwa, pano bino kechi kuminatu kumo ne.

Kwesakanya bintu ko kukebewa. Bamo bakonsha kusangalalatu pa kintu kyonse. Kyawama kukwasha bantu ba uno mutundu kuyuka’mba, umvwe ñambi wakilamo kusangalala, bantu bo abena kwambako bakata muchima kwi aye mu kifulo kya kuta muchima ku bintu byo abena kwamba. Kabiji aba baji na bumvu nabo bakebewa kwibatundaikako kuba’mba bakasulukenga pa kwamba.

Kizaku kisambuzhana. Umvwe mubena kutajisha bulongo bantu mu luonde kabiji ne kwamba na kizaku, nabo bakekala na kizaku. Apolosa wamweshanga bulume bukatampe mu byo aambanga, kabiji watelelwe ne kuba’mba ñambi wayuka kwamba. Umvwe mwauba lupata na mupashi wa Lesa, ñambilo yenu ya lusekelo ikalengela bantu babena kwimuteleka kubila bintu monka mo mwaambila.—Byu. 18:24, 25; Loma 12:11.

Kizaku Kyayilamo na Byambo byo Mubena Kwambapo. Kechi mwafwainwa kukizhamo kwamba na kizaku jashi jonse kya kuba bantu bo mubena kwambako batendeka ne kumvwa bibi ne. Mambo kechi bakomvwa mikambizho yonse yo mukakeba’mba beilondele ne. Kino kimwesha buneme bwa kunengezha jashi bulongo kuba’mba muyuke po mwafwainwa kwambila na kizaku. Pano bino, kange mwambenga nobe kechi mubena kukeba ne. Umvwe mwasala bulongo bishinka bya kwamba, mukakebesha bingi kwibyamba. Bino bishinka bimo bikebewa kwibyamba na kizaku kukila bikwabo, kabiji mwafwainwa kwibivwangankanya bulongo mu jashi jonse.

Bishinka bikatampe byafwainwa kikatakata kwibyamba na kizaku. Jashi jafwainwa kwikala na po jibena kumvwanyikila bulongo. Byo kiji kuba’mba bino byo bishinka bikatampe bya jashi jenu, bikekala bishinka byo mwanengezha kutundaikilamo bantu bo mukambangako. Umvwe mwalengela bantu bo mubena kwambako kusumininwa mu byo mubena kwamba, mwafwainwa kwibatundaika kabiji ne kwibamwesha buwame buji mu kwingijisha byo mwafumatu na kwamba. Kwamba na kizaku kukemukwasha kufika banteleki benu pa michima. Kechi mwafwainwa kwikanjikizha kwamba na kizaku ne. Pafwainwa kwikala kine kintu kya kwambila na kizaku, kabiji bintu byo mukambangapo byo bikemukwasha kuyuka kyokyo kintu.

BYA KUMWESHA KIZAKU

  • Kange munengezhengatu byambo byonka byo mukamba ne, bino mwafwainwa ne kunengezha muchima wenu; mu jino jishinda mukambanga kufuma panshi ya muchima.

  • Langulukishaipo bulongo pa bishinka byo mukambapo ne kumona byo bikakwasha bo mukambangako.

  • Yukai mbaji yo mwafwainwa kwambishapo na kizaku.

  • Ambainga na kizaku. Monainga ne kuba’mba mwekelo ya kilungi kyenu ibena kumwesha byo mubena kwiumvwa. Ambainga na bulume.

MWINGILO WA KUBA: Balaulai Yoshua kitango 1 ne 2, mumone po mwakonsha kutanga jino jishimikila na kizaku. Tangaimo javula na jiwi jasansuka kabiji ne na kizaku kyafwainwa.

    Mabuku a mu Kikaonde (1992-2025)
    Shinkai
    Shinkulai
    • Kikaonde
    • Tuminaiko Bakwenu
    • Byo Mukeba
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Shinkulai
    Tuminaiko Bakwenu