Kitango 18

Nanchi Usanta Nyi?

LELO wajapo bya kuja nyi?— Ñanyi waji kuteka?— Kampe bainobe nangwatu muntu mukwabo ye waji kuteka. Pano, nga mambo ka o twafwainwa kumusanchila Lesa pa kano kajo?— Mambo Lesa ye umenesha kajo. Pano bino, twafwainwa kwibasanchila baji kuteka kajo nangwa baji kwikapana.

Kimye kimo tulubamo kusanchila bakwetu betubila bintu byawama, ke ibyo nenyi? Mufunjishi Wayukisha byo ajinga panopantanda, bantu bamo bajinga na mbumba kechi bamusanchijile ne.

Mbumba yo ika?— Mbumba ke kikola. Kino kikola kilengela mubiji wa muntu kunyomauka. Yesu byo ajinga panopantanda, bantu ba mbumba baikalanga kwa bunke bwabo. Kabiji umvwe wa mbumba wamona muntu ubena kwiya palutwe yanji, wabijikanga ne kusopesha yewo muntu kubula kusambakana nanji. Kyajinga bino kuba’mba bantu babulenga kusambakana na bantu ba mbumba kuchina nabo kusambula kino kikola.

Yesu wibobilanga bingi lusa bantu ba mbumba. Juba jimo, byo ayilenga ku Yelusalema, wapichile mu muzhi mucheche. Byo afikile kwipi na uno muzhi, bantu ba mbumba jikumi baishile na kumumona. Baumvwine’mba Yesu uji na bulume bwamupele Lesa bwa kubuka bikola byapusana pusana.

Bano bantu bajinga na mbumba kechi baishile kwipi ne Yesu ne. Baimenetu kwalepa. Pano bino bajinga na luketekelo lwa kuba’mba Yesu wakonsha kwibabuka. Onkao mambo byo bamwene Mufunjishi Wayukisha, babijikile’mba: ‘Yesu, Mufunjishi, tukwashai!’

Nanchi obewa umvwa lusa umvwe wamona bantu babela nyi?— Yesu waumvwine lusa. Wayukile’mba kyatama bingi kwikala na mbumba. Onkao mambo wibakumbwile’mba: “Yainga, mukemweshe ku bañanga.”—Luka 17:11-14.

Mambo ka Yesu o ebambijile kuba bino? Waubile bino mambo a muzhilo Yehoba ye apele bantu banji ku bantu baji na mbumba. Uno muzhilo waambile’mba, ñanga wa Lesa wafwainwe kumona mubiji wa muntu wa mbumba. Ñanga ye wafwainwe kubula muntu uji na mbumba umvwe kikola kyanji kyapwa nangwa ne. Umvwe kikola kyanji kyapwa, wakonsheshe kutendeka kwikala jibiji na bantu babula mbumba.—Bena Levi 13:16, 17.

Pano bino, abe bantu bakijingatu na mbumba. Nanchi bayile ku ñanga wa Lesa kwesakana na bibabujile Yesu nyi?— Ee, baubiletu aku wibabulatu batendeka ne kuya. Bano banabalume bafwainwa bajinga na lwitabilo amba Yesu usa kwibabuka. Ki ka kyamwekele?

Olo, byo bayilenga ku ñanga wa Lesa, kikola kyabo kyapwile. Babukilwe! Bamwenejilemo bingi mambo bajinga na lwitabilo amba Yesu uji na bulume bwa kwibabuka. Kino kintu byo kibaletejilepo lusekelo! Pa kuba’mba bamweshe amba kyawama, bano bantu bafwanyijilwe kuba ka? Umvwe wajinga obewa, inge waubile byepi?—

Pa boba bantu babukilwe, umotu ye waile kwi Yesu. Watendekele kutota Yehoba Lesa. Waubile bingi bulongo mambo bulume bwalengejile kuba’mba abukwe bwafumine kwi Lesa. Kabiji uno mwanamulume wafukamine ku maulu a Mufunjishi Wayukisha ne kumusanchila. Wajinga bingi na lusekelo na mambo a kintu kyaubile Yesu.

Nga aba banabalume bakwabo batanu na bana baubile byepi? Yesu waipwizhe’mba: ‘Nanchi kechi bajinga jikumi babukwa nenyi? Nga batanu na bana baji pi? Nanchi umotu ye yenka wabwela na kutumbijika Lesa nyi?’

Ee, ibyo. Umotu pa banabalume jikumi ye wabwelele ne kutumbijika Lesa kabiji ne na kumusanchila Yesu. Kabiji uno muntu wajinga mwina Samaliya, mwanamulume wafumine ku kyalo kingi. Aba bakwabo batanu na bana kechi basanchijile Lesa ne Yesu ne.—Luka 17:15-19.

Nga obewa uji nobe bañanyi pa bano banabalume? Twafwainwa kwikala nobe mwina Samaliya, ke ibyo nenyi?— Umvwe muntu witubila kintu kyawama, twafwainwa kuba ka?— Twafwainwa kumusanchila. Bantu javula kechi basanta ne. Pano bino, kyawama bingi kusanta. Umvwe twauba bino, Yehoba Lesa ne Mwananji, Yesu, bomvwa bingi bulongo.

Umvwe ulangulukishepotu, usa kutana’mba bantu bavula bakikubilapo kala bintu byawama bingi. Kya kumwenako, wakibelapo kala nyi?— Kampe kechi wakibelapo byonka byabelele boba banabalume jikumi ne, pano bino kampe wakibelapo kala mashika nangwa munda. Nanchi kujipo wakulaminengako nyi?— Bafwainwa bakupelenga muchi ne kukubilatu bintu bikwabo. Nanchi waumvwine bulongo pa ku kukwasha nyi?—

Mwina Samaliya wamusanchijile Yesu pa kumubuka, kabiji kino kyamuletejile Yesu lusekelo. Nanchi bashobe nangwa bainobe bakonsha kusekela umvwe wibasanchila pa bintu byo bakubila nyi?— Ee, bakekala bingi na lusekelo.

Bantu bamo bakubila bintu pa juba pa juba nangwa mulungu ne mulungu. Kampepo ye mwingilo ye bengila. Bakonsha kutemwa bingi kwingila yewo mwingilo. Pano bino kampepo kechi wakonsha kwibasanchila ne. Mufunjishi wobe wakonsha kwibikako kuba’mba akufunjishe. Uno ke mwingilo wanji. Pano bino mufunjishi wobe ukomvwa bingi bulongo inge wamusanchila pa ku kufunjisha.

Kimye kimo bakikubilapo kala bintu byapelapelatu. Nanchi bakikushinkwilapo kala kinzhilo nyi? Nangwa bakikubikilapo kala bya kuja ku tebulu nyi? Kyawama kusanta nangwa bakubilatu tubintu tucheche.

Umvwe ke twibasanchile bantu panopantanda, ne Shetu wa mwiulu naye tukamusanchilanga. Kuji bintu byavula bingi byo twafwainwa kumusanchila Yehoba! Witupa bumi ne bintu byonse byawama bilengela bwikalo bwetu kuwama. Onkao mambo, moba onse twafwainwa kumupanga Lesa lukumo.

Tanga byambo bikwabo bya lusanchilo byanembwa pa Salamo 92:1; Efisesa 5:20; Kolose 3:17; ne 1 Tesalonika 5:18.

[Kipikichala pa jipa 98, 99]

Abe bantu baji na mbumba Yesu ubena kwibambila amba ka?

[Kipikichala pa jipa 99]

Awe muntu wajinga na mbumba wavulukile kuba ka?

[Kipikichala pa jipa 100]

Wakonsha kuba byepi byonka byaubile awa muntu wa mbumba wabwelele kwi Yesu?

[Bipikichala pa jipa 101]

Mambo ka kusanta kyo kwanemena?